តាមកាសែត VIETNAM EXPRESS ONLINE ចេញផ្សាយថ្ងៃទី ១៥ ខែវិច្ឆិកា ទើបដឹងថា លោកប្រធានាធិបតីហ្វីលីពីន Duterte បានបោះបង់ព្រឹត្តិការណ៍ ៤ នៃសន្និសីទអាស៊ាន ប្រព្រឹត្តទៅនៅថ្ងៃទី ១៤ ខែវិច្ឆិកា ។ រីឯមូលហេតុគឺ ព្រោះតែ “ឆ្លៀតធ្មេចភ្នែកបន្តិច” ។
ប្រធានាធិបតី ហ្វីលីពីន Duterte ក្នុងកិច្ចប្រជុំមួយនៅសិង្ហបុរី ។
ដោយសារតែការ “ឆ្កឹះឆ្កៀល” របស់អ្នកកាសែត ទើបអ្នកនាំពាក្យការិយាល័យប្រធានាធិបតីហ្វីលីពីន Salvador S Panelo ឆ្លើយប្រាប់នៅថ្ងៃទី ១៥ ខែវិច្ឆិកា ថា លោក Duterte បានបោះបង់ព្រឹត្តិការណ៍ជិតពាក់កណ្តាល ក្នុងចំណោមព្រឹត្តិការណ៍ចំនួន ១១ នៃកម្មវិធីថ្ងៃទី ១៤ ខែវិច្ឆិកា រួមទាំងពិធីលាងសាយភោជន៍របស់នាយករដ្ឋមន្ត្រី លី សៀនឡុង រៀបចំ។
អ្នកនាំពាក្យនេះពោល ៖ “លោកគេងបង្គ្រប់ ព្រោះធ្វើការដល់យប់អាធ្រាត ហើយសម្រាកពុំបាន ៣ម៉ោងផង” ។ ប៉ុន្តែសុខភាពរបស់លោកល្អទាំងស្រុង (!) ។
នៅព្រឹកថ្ងៃទី ១៥ ខែវិច្ឆិកា ២០១៨ ពេលជួបអ្នកកាសែត លោក Duterte បានពោលទៅកាន់អ្នកយកព័ត៌មានថា ៖ “មានអ្វីខុសបើខ្ញុំធ្មេចភ្នែក?” លោកថា ៖ ដំណេកខ្លីៗ តែក៏វាមិនគ្រប់ដើម្បីរក្សាកម្លាំងទ្រាំទ្រឲ្យដល់ថ្ងៃបញ្ចប់ដែរ ។
ប្រធានាធិបតីកូរ៉េខាងត្បូងក៏ “ឆ្លៀតធ្មេចភ្នែក” នាពេលរង់ចាំប្រជុំនឹងអនុប្រធានាធិបតីអាមេរិក ។
តាម BBC លោក Duterte ពុំមែនជាបុគ្គលម្នាក់ត្រូវបានឆ្មក់ចាប់ ខណៈពេល “ឆ្លៀតឱកាស”ទេ ព្រោះអ្នកកាសែត Washington Post បានផ្តិតជាប់រូបភាពលោក Moon Ja-in កំពុង “គេងអង្គុយ” ប្រមាណ ១៥នាទី នាឱកាសរង់ចាំប្រជុំនឹងអនុប្រធានាធិបតីអាមេរិក Mike Pence ។
ណ្ហើយចុះ! វាជារឿងរបស់គេ ប៉ុន្តែសូមលើកឡើងគ្រាន់សម្រាប់ប្រិយមិត្តយល់ថា ៖ ប្រមុខរដ្ឋាភិបាលកម្ពុជាយើងពិតជាអស្ចារ្យម្យ៉ាងដែរ នៅស្វិតមាំល្អណាស់! ៕ បូព៌ា