តាកែវ ៖ អគ្គស្នងការនគរបាលជាតិ នាយឧត្តមសេនីយ៍ នេតសាវឿន បានចាត់វិធានការ ផ្អាកការងារមន្ត្រីអធិការនគរបាលក្រុងដូនកែវ លោកឆាយ សាវុធ ក្រោយហេតុការណ៍ប្រើអំពើហិង្សា វាយដំមកលើ ភរិយារបស់ខ្លួន ។
ការចាត់វិធានការជាបន្ទាន់នេះ ក្រោយអ្នកស្រីពៅសុភាពដែលជាភរិយា អធិការនគរបាលក្រុងដូនកែវនោះ បានបង្ហោះរូបភាពអំពើហិង្សារបស់ លោកវរសេនីយ៍ឯក ឆាយ សាវុធ ជាប្តី ដែលបានវាយភរិយារបស់ខ្លួនឯង ក្នុងពេលដែលភរិយាបានតាមទាន់នូវ អំពើផិតក្បត់ កាលពីវេលាម៉ោង១០យប់ថ្ងៃទី១៥វិច្ឆិកា។
លោកវរសេនីយ៍ ឯក ឆាយ សាវុធ បានទះកំផ្លៀងភរិយារបស់ខ្លួនឯង នៅចំពោះមុខស្រីស្នេហ៍ បណ្តាលឲ្យមានស្នាមរបួស នៅ លើ មុខ។ លោកវរសេនីយ៍ឯក ឆាយ សាវុធ បានសារភាព ថាលោកពិតជាបានទះកំផ្លៀងភរិយារបស់ខ្លួនឯងពិតមែន ក្រោមមូលហេតុថាភរិយារបស់លោក បានបើករថយន្ត បុកពីក្រោយរថយន្តលោកបណ្តាលឲ្យរថយន្តខូចខាត។
ក្រោយការបង្ហោះរូបភាព អគ្គស្នងការនគរបាលជាតិ បានប្រញាប់ដាក់បញ្ជា៣ចំណុចទៅស្នងការ នគរបាលខេត្តតាកែវ។
បទបញ្ជាទាំង៣ រួមមាន ១/ សូមផ្អាកការងារអធិការនគរបាលរូបនេះសិន ដើម្បីធ្វើការស៊ើបអង្កេត។ ២/ ពិនិត្យ អង្គហេតុនិងធ្វើការសម្រុះសម្រួលជាមួយ នឹងក្រុមគ្រួសារ។ បើសិនជាសម្របសម្រួលមិនបានទេ ត្រូវ កសាង សំណុំរឿងនិងបញ្ជូនទៅតុលាការ។ និងទី ៣/ ត្រូវអនុវត្តវិន័យកងកម្លាំងនគរបាលដោយចេញលិខិតព្រមាន ផ្អាកការងារអធិការនគរបាលរូបនេះ៕ ដោយ៖បញ្ញាស័ក្តិ
