ខេត្តស្វាយរៀង ៖ លោក ថន ថាវុទ្ធា និងលោក ថោង រស់ អភិបាលរងស្រុកស្វាយជ្រំ តំណាងលោក សុទ្ធ គឹមច័ន្ទ អភិបាលស្រុកនារសៀលថ្ងៃសុក្រ០៩កើត ខែកក្កិក ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៦ ខែវិច្ឆិកា ឆ្នាំ២០១៨នេះ បានអញ្ជើញជាអធិបតីក្នុងពិធីបើកការដ្ឋានកែលម្អផ្លូវក្រាលគ្រួសក្រហមចំនួន១ខ្សែ ប្រវែង៤៧០០ម៉ែត្រ ស្ថិតក្នុងភូមិត្របែកប្រហោង ភូមិត្រោក និងភូមិបឹងអណ្តែង ឃុំតាសួស ស្រុកស្វាយជ្រំ ខេត្តស្វាយរៀង។
ពិធីនេះក៏មានការអញ្ជើញចូលរួមផងដែរពីសំណាក់លោកនាយយករដ្ឋបាលសាលាស្រុក លោកស្រីប្រធានការិយាល័យអន្តរវិស័យស្រុក លោកមេឃុំតាសួស លោក លោកស្រីក្រុមប្រឹក្សាឃុំ លោកមេភូមិ តំណាងក្រុមហ៊ុនសាងសង់ផ្លូវ និងបងប្អូនប្រជាពលរដ្ឋចូលរួមប្រមាណ១០០នាក់។
មានប្រសាសន៍ទៅកាន់បងប្អូនប្រជាពលរដ្ឋលោក ថន ថាវុទ្ធា បានលើកឡើងពីការរីកចម្រើនលើគ្រប់វិស័យនៅកម្ពុជាចាប់ពីទីក្រុងដល់ជនបទ ហើយនៅថ្ងៃនេះបងប្អូនប្រជាពលរដ្ឋនៅឃុំតាសួសបានទទួលនូវសមិទ្ធិផលថ្មីមួយទៀត គឺផ្លូវក្រាលគ្រួសក្រហមឆ្លងកាត់ចំនួន៣ភូមិ ក្រោមគម្រោងមូលនិធិស្រុកដែលបានទទួលថវិកាពីក្រសួងសេដ្ឋកិច្ច និងហិរញ្ញវត្ថុពីការផ្តល់រង្វាន់ក្នុងការប្រកួតប្រជែងគម្រោងសមទ្ធិកម្មរដ្ឋបាលថ្នាក់ក្រោមជាតិឆ្នាំ២០១៨។
លោកអភិបាលរងស្រុកបានបន្តថា ក្រោមការដឹកនាំរបស់សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា លោកជាប្រមុខដឹកនាំដ៏ឈ្លាសវៃបានដឹកនាំនាវាកម្ពុជាឆ្ពោះទៅកាន់សុខសន្តិភាព និងការអភិវឌ្ឍលើគ្រប់វិស័យដូចសព្វថ្ងៃនេះ មានដូចជា ផ្លូវ ទឹក ភ្លើង ស្ពាន សាលារៀន មន្ទីរពេទ្យជាដើម ដូច្នេះស្នាដៃរបស់សម្ដេចតេជោបានធ្វើឲ្យយុវជនជំនាន់ក្រោយមានការកោតសរសើរ និងចងចាំជានិច្ចចំពោះការដឹកនាំដ៏ប៉ិនប្រសព្វ ធ្វើអោយប្រទេសជាតិមានការអភិវឌ្ឍន៍ និងរីកលូតលាស់បន្តទៅមុខទៀត។
លោកអភិបាលរងស្រុកក៏បានលើកឡើងពីបញ្ហា ភូមិ ឃុំ មានសុវត្ថិភាពនៅក្នុងមូលដ្ឋានដើម្បីអោយបងប្អូនយកចិត្តទុកដាក់ក្នុងការប្រុងប្រយ័ត្ន។ ម្យ៉ាងទៀតក៏បានសំណូមពរ និងផ្តាំផ្ញើដល់បងប្អូនប្រជាពលរដ្ឋទាំងអស់ដែលរស់នៅជាប់បណ្តោយផ្លូវកំពុងបើកការដ្ឋាននៅថ្ងៃនេះ សូមមានការយោគយល់និងអធ្យាស្រ័យ ក្នុងចូលរួមសហការជាមួយក្រុមហ៊ុនបើមានការប៉ះពាល់ដល់ការកែលម្អផ្លូវដូចជាការត្រួសត្រាយកាប់ដើមឈើ ឬប៉ះទៅលើរបងផ្ទះរបស់បងប្អូនជាដើម ៕ ដោយ ៖ វ៉ៃគោ
