វីដេអូមួយដែលបង្ហាញឲ្យឃើញបុរសជាឪពុកម្នាក់ បានធ្វើសកម្មភាព «ស្និទ្ធស្នាល» ដ៏មិនធម្មតាដែលពុំអាចទទួលយកបាន ទៅលើកូនស្រីតូចរបស់ខ្លួនដែលពុំមានការជួយអន្តរាគមន៍ នៅលើរថភ្លើង កាលពីពេលកន្លងទៅនេះ បានបង្កឲ្យមានការរិះគន់ធ្ងន់ៗ និងការខឹងសម្បារយ៉ាងខ្លាំងក្លា ពីសំណាក់អ្នកប្រើប្រាស់អ៊ីនធើរណែតយ៉ាងច្រើន ។ ប៉ុន្តែ ករណីនេះ បែរជាត្រូវបានប៉ូលីសនិយាយដ៏ហួសចិត្តថា ឪពុករូបនេះពុំបានធ្វើដូចការចោទប្រកាន់នោះទេ ។
គេហទំព័រ Shanghaiist បានចុះផ្សាយឲ្យដឹងថា វីដេអូឃ្លីបនៃហេតុការណ៍ដែលបង្កឲ្យមានក្តីរន្ធត់ និងរលកកំហឹងនៅលើអ៊ិនធើរណែតនេះ បាននាំឲ្យប៉ូលីសរថភ្លើងនៅក្នុង Nanchang ខេត្ត Jiangxi បើកការស៊ើបអង្កេត និងស្វែងរកចាប់ខ្លួនបុរសនោះ ។
ទោះយ៉ាងណា កាលពីយប់ថ្ងៃអង្គារ៍ ប៉ូលីសបានប្រកាសបញ្ចប់ការស៊ើបអង្កេតរបស់ពួកគេ ដោយនិយាយថា ពួកគេបានកំណត់អត្តសញ្ញាណបុរសរូបនោះហើយ ដែលគាត់មានឈ្មោះ Zhou អាយុ ៣០ ឆ្នាំ គឺជាឪពុករបស់ក្មេងស្រីរងការបៀតបៀនអាយុ ៥ ឆ្នាំ ហើយថា អាកប្បកិរិយារបស់គាត់មិនមែនជាការយាយីផ្លូវភេទនោះទេ ។
ប៉ុន្តែ ការប្រកាសបែបនេះ វាបង្កឲ្យក្តៅក្រហាយកាន់តែខ្លាំង ដោយអ្នកប្រើប្រាស់អ៊ិនធើរណែតម្នាក់បានចោទសួរថា៖ «តើអស់លោកកំពុងនិយាយថា ឪពុករូបនេះពុំបានធ្វើបាបកូនស្រីរបស់គាត់មែនទេ ? ពិតជាហួសចិត្តណាស់!!» ។ ចំណែកអ្នកដទៃទៀតថា៖ «ប្រសិនបើករណីស្តែងៗនៅទីសាធារណៈបណ្តឹងហើយ ប៉ូលីសថាជារឿងធម្មតា នោះចូរបងប្អូនស្រមើស្រមៃនូវអ្វីៗដែលស្ថិតនៅពីក្រោយការបិទបញ្ចប់រឿងនេះទៅ!!» ៕ ដោយ៖ ឧត្តម (ប្រភព៖ Shanghaiist)
