ភ្នំពេញ ៖ ស្នងការនគរបាលរាជធានីភ្នំពេញ លោក ឧត្តមសេនីយ៍ឯក ស ថេត បានលើកឡើង ដើម្បីលុបបំបាត់បទល្មើសឆក់ ប្លន់ គ្រឿងញៀន ការបង្ក្រាបទីតាំងទូហ្គេមនៅទីក្រុងភ្នំពេញ ជាពិសេសតំបន់ទេសចរណ៍ និងក្បែរផ្ទះថ្នាក់ដឹកនាំកំពូលៗ ត្រូវតែធ្វើឲ្យបានល្អ និងមិនអនុញ្ញាតឲ្យបើកឡើយ បើនរណាអនុញ្ញាត អ្នកនោះទទួលខុសត្រូវចំពោះមុខច្បាប់។
លោក ឧត្តមសេនីយ៍ឯក ស ថេត បានលើកឡើង ” អរគុណបងប្អូនដែលផ្តល់ព័ត៌មានមកខ្ញុំអំពីបញ្ហាទូហ្គេមបាញ់ត្រីដែលបង្កប់ទៅដោយបញ្ហាគ្រឿងញៀន ក្មេងទំនើងល្បែងស៉ីសង និងបញ្ហាផ្សេងទៀត”។
យប់មិញកាលពីវេលាម៉ោង១១និង៤០នាទី ថ្ងៃទី១៦ ខែវិច្ឆិកា ឆ្នាំ២០១៨ តាមបណ្តោយផ្លូវបេតុងនៅចំណុច ក្នុងមជ្ឈមណ្ឌលកោះពេជ្រ ស្ថិតនៅក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ លោក ឧត្តមសេនីយ៍ឯក ស ថេត បានដាក់បទបញ្ជាឲ្យកម្លាំងព្រហ្មទណ្ឌកំរិតស្រាលរបស់ស្នងការនគរបាលរាជធានីភ្នំពេញ បានចុះប្រត្តិការបង្ក្រាបទូហ្គេមបាញ់ត្រីនៅក្នុងមជ្ឈមណ្ឌលកោះពេជ្រ ចាប់ចំនួន២ទីតាំង សរុបទូហ្គេមបាញ់ត្រីចំនួន១៣ទូ និងអ្នកចូលទៅលេងចំនួនជិត៣០នាក់៕ ដោយ ៖ បញ្ញាស័ក្តិ
