ខេត្តព្រះសីហនុ ៖ សមត្ថកិច្ចនគរបាល នៃស្នងការដ្ឋានខេត្តព្រះសីហនុ បានឱ្យដឹងថា មានរថយន្ត១គ្រឿង ត្រូវដែកបំពង់ទីប របស់ការដ្ឋានសំណង់១កន្លែង មានទីតាំងនៅជិតសាលាខេត្តព្រះសីហនុ គឺការដ្ឋានសំណង់ The Sea Gate បានធ្លាក់បំពង់ទីបដែក ពីជាន់លើចាក់ធ្លុះដំបូលរថយន្តទំនើប១គ្រឿង ដោយទម្លុះចូលដល់កន្លែងអង្គុយកៅអីខាងមុខ ប៉ុន្តែសំណាងល្អគ្មានមនុស្សរបួសឬស្លាប់។
សមត្ថកិច្ចឱ្យដឹងបន្តថា ហេតុការណ៍នេះ បានកើតឡើង កាលពីវេលាថ្ងៃត្រង់ថ្ងៃទី១៧ វិច្ឆិកា ឆ្នាំ២០១៨ ប៉ុន្តែចាត់ទុកជាសំណាង ដែលមិនមានមនុស្សរងគ្រោះថ្នាក់។
ហេតុការណ៍នេះ ទាំងសមត្ថកិច្ច មន្ត្រីរាជការ និងប្រជាពលរដ្ឋ ចាត់ទុកករណីនេះថា ជាការធ្វេសប្រហែស របស់មេការ ឬជាងសំណង់នៅក្នុងការដ្ឋានសំណង់ The Sea Gate។
ទាក់ទិនបញ្ហានេះ ប្រជាពលរដ្ឋ បានឱ្យដឹងថា ករណីដូចគ្នានេះ នៅតាមការដ្ឋានសំណង់មួយចំនួនទៀត ក្នុងក្រុងព្រះសីហនុ ជាបន្តបន្ទាប់មកនេះ កន្លងក៏ធ្លាប់មានសេចក្តីរាយការណ៍ ពីពលរដ្ឋមកថា មានការដ្ឋានជាច្រើនទៀត នៅក្នុងក្រុងព្រះសីហនុ ក៏មានករណីធ្លាក់ថ្ម ឈើ ឬដែកជាថើម ពីជាន់លើធ្លាក់មកក្រោម នាំឱ្យប៉ះពាល់ដល់ដំបូលផ្ទះ ជាពិសេសមានពេលខ្លះស្ទើរតែរងរបួសដល់មនុស្ស អ្នកជិតខាងជាបន្តបន្ទាប់ផងដែរ។
ត្រង់ចំណុចនេះ ប្រជាពលរដ្ឋរស់នៅក្នុងក្រុងព្រះសីហនុ បានសំណូមពរដល់អាជ្ញាធរស្ថាប័នពាក់ព័ន្ធ ជួយមានវិធាន ទៅម្ចាស់ការដ្ឋានសំណង់ទាំងអស់ ឱ្យបង្កើនការប្រុងប្រយ័ត្នដើម្បីកាត់បន្ថយគ្រោះថ្នាក់កើតឡើងនាថ្ងៃខាងមុខ។
ផ្តើមពីបញ្ហានេះ ប្រជាពលរដ្ឋ បានស្នើដល់ ថ្នាក់ដឹកនាំរដ្ឋបាលខេត្តព្រះសីហនុ ឱ្យជួយបញ្ជូនមន្ត្រីចុះពិនិត្យ ឬណែនាំដល់អ្នកទទួលខុសត្រូវការដ្ឋានសំណង់នានា ក្នុងក្រុងព្រះសីហនុ គប្បីបង្កើនការប្រុងប្រយ័ត្នឱ្យបានខ្ពស់ ដោយប្រើប្រព័ន្ធបច្ចេកទេស ដាក់សំណាញ់ ឬរបាំងការពារឱ្យបានត្រឹមត្រូវ។ ក្នុងនោះ ការចុះត្រួតពិនិត្យជាប្រចាំ ទៅលើការដ្ឋានសំណង់នានា ពីសំណាក់អាជ្ញាធរមានសមត្ថកិច្ចស្ថាប័នពាក់ព័ន្ធ នៃរដ្ឋបាលខេត្តព្រះសីហនុ គឺជាកិច្ចការចាំបាច់បំផុត៕ ដោយ៖ ដែន សីមា