ខេត្តព្រះសីហនុ ៖ កាលពីរសៀលថ្ងៃទី១៨ ខែវិច្ឆិកា ឆ្នាំ២០១៨ កម្លាំងនគរបាល នៃស្នងការដ្ឋាននគរបាលខេត្តព្រះសីហនុ បានឱ្យដឹងថា បានបញ្ជូនជនសង្ស័យ៣នាក់ ទៅសាលាដំបូងខេត្ត ដើម្បីផ្តន្ទាទោសពីបទជម្លោះហិង្សា បណ្តាលឱ្យជនរងគ្រោះម្នាក់ស្លាប់។
ក្នុងនោះជនសង្ស័យមានគ្នា ៣នាក់ ដែលបានប្រព្រឹត្តកាលពីយប់ថ្ងៃទី១៦ ខែវិច្ឆិកា ឆ្នាំ២០១៨ វេលាម៉ោង ២៣ និង០០នាទី នៅចំណុចផ្លូវកោះព្រាប (ក្បែរកន្លែងនគរបាលព្រំដែនទឹក)។ សមត្ថកិច្ចនគរបាលឱ្យដឹងថា ជនសង្ស័យទាំង៣នាក់មានឈ្មោះ ៖
១- ឈ្មោះ ឆាយ ស្រ៊ ភេទប្រុស អាយុ២៤ឆ្នាំ មុខរបរកូនដៃទូកអូរប៊័រ ក្រុមហ៊ុន ស៊ី.ស៊ី.ប្ល៊ូ.ស៊ី ស្នាក់នៅលើអូរប៊័រ។
២- ឈ្មោះ ឆាយ កុងស៊ុន ភេទប្រុស អាយុ២៣ឆ្នាំ មុខរបរកូនដៃ ទូកអរប៊័រ ស៊ី.ស៊ី.ប្ល៊ូ.ស៊ី ស្នាក់នៅលើអូរប៊័រ ។
៣- ឈ្មោះ ប៊ុន ដារា ភេទប្រុស អាយុ២១ ឆ្នាំ មុខរបរ កូនដៃទូកអូរប៊័រ ស៊ី.ស៊ី.ប្ល៊ូ.ស៊ី ស្នាក់នៅលើអូរប៊័រ។
ចំណែកជនរងគ្រោះ(សព) ឈ្មោះ ស៊ុន វិច្ឆិកា ភេទ ប្រុស អាយុ២៨ឆ្នាំ មុខរបរ កូនដៃទូកអូរប៊័រក្រុមហ៊ុនចិន ស្នាក់នៅលើអូរប៊័រ ស្រុកកំណើតនៅភូមិ ទួលទទឹង ឃុំទួលទទឹង ស្រុកព្រៃនប់ ខេត្តព្រះសីហនុ។
កម្លាំងនគរបាលខេត្តព្រះសីហនុ បញ្ជាក់ថា មូលហេតុដំបូង ដែលនាំឱ្យជនសង្ស័យទាំង
៣នាក់ និងជនរងគ្រោះ(សព) គឺពួកគេបានផឹកស៊ីជាមួយគ្នា នៅលើចិញ្ចើមផ្លូវកន្លែងកើតហេតុ ដោយជនរងគ្រោះស្រវឹងជោគជាំ ហើយបានទាស់ពាក្យសម្ដីគ្នា រួចក៏វាយប្រតាយប្រតប់គ្នា បណ្ដាលឱ្យ ឈ្មោះ ស៊ុន វិច្ឆិកា (សព) ធ្លាក់ពីលើផ្លូវ បុកថ្ម បែកក្បាល បាក់ ក ស្លាប់នៅកន្លែងកើតហេតុតែម្ដង៕ ដោយ៖ ដែន សីមា
