សៀមរាប ៖ គណៈកម្មការដឹកនាំ និងសម្របសម្រួលរៀបចំសណ្តាប់ធ្នាប់អ្នកលក់ដូរក្នុងរមណីយដ្ឋានអង្គរ ដែលមានសមាសភាពចម្រុះគ្នារវាងអាជ្ញាធរជាតិអប្សរា សាលាខេត្តសៀមរាប មន្ទីរពាក់ព័ន្ធជុំវិញខេត្ត រួមទាំងអាជ្ញាធរមូលដ្ឋានដែលស្ថិតនៅក្នុងតំបន់រមណីយដ្ឋានអង្គរ បានជួបប្រជុំពិភាក្សាគ្នារកដំណោះស្រាយលើការរៀបចំសណ្តាប់ធ្នាប់តូបលក់ដូរនៅមុខក្រុមប្រាសាទព្រះពិធូរ នាព្រឹកថ្ងៃទី១៦ ខែវិច្ឆិកា ឆ្នាំ២០១៨ នៅសាលាខេត្តសៀមរាប។
លោក សុខ សង្វារ អគ្គនាយករងនៃអាជ្ញាធរជាតិអប្សរា និងជាប្រធានគណៈកម្មការដឹកនាំ និងសម្របសម្រួលរៀបចំសណ្តាប់អ្នកលក់ដូរក្នុងរមណីយដ្ឋានអង្គរ បានបញ្ជាក់ក្នុងអង្គប្រជុំថា សណ្តាប់ធ្នាប់នៃតូបលក់ដូរ និងការចតយានជំនិះមុខក្រុមប្រាសាទព្រះពិធូរសព្វថ្ងៃមិនមានសណ្តាប់ធ្នាប់របៀបរៀបរយ ដែលធ្វើឲ្យបិទបាំងប្រាសាទ និងទេសភាពល្អប្រណីតររបស់ប្រាសាទ។ មិនត្រឹមតែប៉ុណ្ណោះ ក្លិនឆ្អេះឆ្អាបនៃការតូបលក់ដូរម្ហូបអាហារ សំឡេងម៉ាស៊ីនភ្លើងជាប្រចាំក៏បានបង្កភាពរំខានដល់ភ្ញៀវទេសចរដែលចូលទៅទស្សនាប្រាសាទផងដែរ។
លោក បញ្ជាក់ថា ការរៀបចំអង្គប្រជុំនេះឡើង គឺជាការឆ្លើយនឹងអនុសាសន៍ណែនាំរបស់អ្នកជំនាញនៃគណៈកម្មាធិការ ICC-Angkor និងស្ថាប័ន KOICA របស់ប្រទេសកូរ៉េ និងស្ថានទូតកូរ៉េដែលបានទទួល ជួយជួសជុលក្រុមប្រាសាទព្រះពិធូរ តាមរយៈមូលនិធិបេតិកភណ្ឌវប្បធម៌កូរ៉េ (KCHF) និងបានបញ្ចប់ជំហានរបស់ខ្លួនហើយនៅពេលថ្មីៗនេះ។
ថ្មីៗនេះ អាជ្ញាធរជាតិអប្សរាបានបង្កើតគណៈកម្មការមួយដោយឡែក ដោយផ្តោតសំខាន់លើការសិក្សារកទីតាំងថ្មីសម្រាប់រៀបចំចំណត និងតូបលក់ដូរទាំងនេះ។ ទោះជាយ៉ាងនេះក្តី មន្ត្រីជំនាញនៅតែមិនទាន់សម្រេចបានទីតាំងសមស្របនៅឡើយ ដោយហេតុថា ទីតាំងនៅបរិវេណនោះសុទ្ធតែគ្របដណ្តប់ដោយព្រៃឈើ និងបុរាណដ្ឋានជាច្រើន។ កិច្ចប្រជុំនៅពេលនេះ គឺដើម្បីប្រមូលគំនិតយោបល់បន្ថែមពីគណៈកម្មការ ដើម្បីមន្ត្រីជំនាញបានជាមូលដ្ឋានសម្រាប់យកទៅសិក្សាបន្តទៀត។
លោកវរសេនីយ៍ត្រី ម៉ាន់ ឈឿន អនុប្រធាននាយកដ្ឋានទទួលបន្ទុកអង្គភាព ការពារបេតិកភណ្ឌប្រចាំតំបន់អង្គរ បញ្ជាក់ថា តូបលក់ដូរក្នុងតំបន់អង្គរ ពិតជាជួបភាពស្មុគស្មាញខ្លាំងមែន តែក្រុមការងារត្រៀមខ្លួនជានិច្ច ដើម្បីសហការគ្រប់ពេលវេលា។
គួររំលឹកថា ព្រះពិធូរ ជាឈ្មោះក្រុមប្រាសាទចំនួន៥ ដែលស្ថិតនៅទល់មុខទីលានស្តេចគម្លង់ ក្នុងបរិវេណរាជធានីអង្គរធំគឺ ប្រាសាទកោរសក់ ប្រាសាទជម ប្រាសាទតាទួត ប្រាសាទដូនមា និងប្រាសាទសណ្តកយក្ស។ ប៉ុន្តែ មានមនុស្សតិចតួចប៉ុណ្ណោះ ដែលបានស្គាល់ និងបានទៅទស្សនាប្រាសាទទាំងនេះ ដោយសារតែប្រាសាទទាំងនេះ បិទបាំងដោយរបាំងព្រៃឈើ និងជាពិសេស គឺតូបលក់ដូរជាច្រើននៅពីមុខផង៕ ដោយ ៖ បញ្ញាស័ក្តិ