ចោរស្ទាវម្នាក់ដែលបានប៉ុនប៉ងប្លន់ទូរស័ព្ទនៅ Jorge Teixeira ដែលជាតំបន់ជិតខាង Manaus ប្រទេសប្រេស៊ីល កាលពីពេលថ្មីៗនេះ បានទទួលរងនូវមេរៀនដ៏ឈឺចាប់បំផុត ពីសំណាក់ស្រីស្អាតវ័យក្មេងម្នាក់ចេះតៃក្វាន់ដូ ។
យោងតាម The Sun នារីស្រស់ស្អាតឈ្មោះ Sabrina Leite អាយុ ២២ ឆ្នាំ បានកំពុងព្យួរហាលខោអាវ នៅមុខផ្ទះរបស់នាង នៅពេលនោះ បុរស២នាក់បានជិះម៉ូតូមកឈប់ពីមុខនាង ។ ម្នាក់ក្នុងចំណោមពួកវា បានចុះពីម៉ូតូដើរសំដៅមកកាន់នាង ហើយបានសម្លុតនាងឲ្យប្រគល់ទូរស័ព្ទរបស់នាងភ្លាមៗ ។ ប៉ុន្តែ វាជារឿងច្រឡំធំហើយ អាអូន… ។
Sabrina បាននិយាយថា៖ «ខ្ញុំបានសង្កេតឃើញថា ពួកវាពុំមានអ្វីៗ (អាវុធ) នោះទេ ពួកវាចូលមកគ្រាន់តែគំរាមឲ្យខ្ញុំហុចទូរស័ព្ទប៉ុណ្ណោះ ។ ខ្ញុំបានសន្មត់ថា ពួកវាពុំមានអាវុធនៅនឹងដៃនោះ ខ្ញុំក៏បានប្រតិកម្មតប ។ ប្រសិនជាពួកវាមានអាវុធវិញនោះ ខ្ញុំក៏មិនហ៊ានតបតនោះដែរ» ។
បន្ទាប់ពីនោះ Sabrina បានឆ្លើយតបយ៉ាងលឿន ដោយបានគប់ទូរស័ព្ទរបស់នាងចូលក្នុងផ្ទះរបស់នាង ដែលធ្វើឲ្យចោរទាំងពីរភ្ញាក់ផ្អើល និងព្យាយាមជិះម៉ូតូគេចខ្លួន ។ ទោះយ៉ាងណា ពួកវាត្រូវបានជួយរារាំងដោយអ្នកជិតខាងម្នាក់ដែលជិះរថយន្តឆ្លងកាត់ទីនោះ ។
Sabrina បន្ថែមថា៖ «ខណៈចោរម្នាក់នោះបានកំពុងរត់គេចខ្លួន នៅពេលនោះ អ្នកជិតខាងខ្ញុំម្នាក់ក៏បានបើករថយន្តដេញតាម ហើយកៀរវា ។ បន្ទាប់មក ខ្ញុំក៏បានរត់ទៅចាប់ក្លេវាជាប់តែម្តង ។ ខ្ញុំបានដេកទៅនឹងដី ហើយបន្តក្លេ» ។
Sabrina ក៏បានបញ្ជាក់ថា៖ «តិចនិចទាំងអស់នេះ គឺខ្ញុំកំពុងហ្វឹកហាត់អស់រយៈពេល ៤ ឆ្នាំ មកហើយ ។ ទោះយ៉ាងណា ខ្ញុំនៅតែមិនទាន់ទទួលបានខ្សែក្រវ៉ាត់ខ្មៅនោះទេ ។ ប៉ុន្តែ រឿងឡើងលំដាប់ថ្នាក់ ឬ ខ្សែក្រវ៉ាត់ វាមិនមែនជាបញ្ហាសំរាប់ខ្ញុំទេ»
ឈុតឆាកដ៏គួរឲ្យភ្ញាក់ផ្អើលនេះ ត្រូវបានកត់ត្រាដោយអ្នកដំណើរម្នាក់ ហើយវីដេអូនៃហេតុការណ៍នេះ ក៏បានរីករាលដាលនៅលើបណ្តាញសង្គម ។ ដៃម្ខាងរបស់វាត្រូវបានកៀបជាប់នឹងភ្លៅរបស់ Sabrina ដែលជាហេតុធ្វើឲ្យវាស្រែកឈឺចាប់យ៉ាងខ្លាំង នៅពេលនាងរឹតខ្លាំងម្តងៗ រហូតទាល់តែប៉ូលីសមកអន្តរាគមន៍ ៕ ដោយ៖ ឧត្តម (ប្រភព៖ worldofbuzz)