ខេត្តព្រះសីហនុ ៖ ក្រុមគ្រូបង្រៀនមួយចំនួន នៅវិទ្យាល័យក្រុងព្រះសីហនុ បានសំណូមពរដល់មន្ត្រីជំនាញស្ថាប័នពាក់ព័ន្ធ ឱ្យជួយក្រឡេកមើលតារាងកីឡា មានតារសងបាល់ទះជាដើម និងអាគារស្នាក់នៅរបស់សិស្ស ដែលកំពុងសាងសង់ ដោយសិស្សមិនទាន់បានចូលស្នាក់នៅផង ក៏ត្រូវជ្រាបទឹកទាំងមិនទាន់បានចូលស្នាក់នៅ។
ត្រង់ចំណុចនេះ ក្រុមគ្រូបង្រៀន និងសិស្សានុសិស្សមួយចំនួន រិះគន់ថា ការស្ថាបនា តារាងបាល់ទាត់ ដែលទើបស្ថាបនាថ្មី គឺមិនអាចលេងបាល់ទះ និងមិនអាចលេងកីឡាផ្សេងៗទៀតបានទេ ត្រូវដក់ទឹកគ្មានប្រព័ន្ធបង្ហូរទឹកចេញពីតារាងកីឡាទាំងនោះទេ។
គ្រូបង្រៀននិយាយថា តារាងកីឡាមួយចំនួននោះ ការស្ថាបនាមិនបានរាបស្មើ ឬផ្អៀង និងមានទឹកដក់ក្នុងតារាង ឬមួយក៏ស្ថាបនាខុសបច្ចេកទេស។
ជាងនេះទៀត ក្រុមគ្រូបង្រៀននៅវិទ្យាល័យក្រុងព្រះសីហនុ ក៏បានឱ្យដឹងដែរថា ចំពោះអាគារសម្រាប់សិស្សស្នាក់នៅ គឺមិនទាន់ទាំងបើកឱ្យសិស្សចូលស្នាក់នៅផង ក៏ឃើញមានទឹកស្រក់តាមពិដានបាត់ទៅហើយ។
ក្រុមគ្រូបង្រៀនបានឱ្យដឹងទៀតថា សម្រាប់អាគារស្នាក់នៅ និងតារាងលេងកីឡាមួយចំនួនទៀត ដែលកំពុងស្ថាបនា នៅក្នុងវិទ្យាល័យក្រុងព្រះសីហនុរាល់ថ្ងៃនេះ គឺជាជំនួយឧបត្ថម្ភ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាជាអ្នកផ្តល់ជូន។
ត្រង់ចំណុចនេះ ក្រុមគ្រូបង្រៀនមួយចំនួន នៅវិទ្យាល័យក្រុងព្រះសីហនុ បានលើកជាសំណូមពរ ដល់ថ្នាក់ដឹកនាំរដ្ឋបាលខេត្តព្រះសីហនុ ជាពិសេសថ្នាក់ដឹកនាំក្រសួងមន្ទីរស្ថាប័នជំនាញពាក់ព័ន្ធ ប្រដើសិនបើពិតជា បានគាំទ្រ ឬអាណិតស្រឡាញ់ និង គោរពសម្ដេច ហ៊ុន សែន ពិតប្រាមែននោះ សូមឱ្យថ្នាក់ដឹកនាំស្ថាប័នមានសមត្ថកិច្ចពាក់ព័ន្ធទាំងអស់ មេត្តាបញ្ជូនមន្ត្រីជំនាញឯករាជ្យចុះពិនិត្យបញ្ហាមិនប្រក្រតី នៃការសាងសង់អាគារស្នាក់នី និងតារាងកីឡា នៅក្នុងវិទ្យាល័យក្រុងព្រះសីហនុឱ្យបានឆាប់ ដើម្បីកុំឱ្យការសាងសង់ សមិទ្ធិផលនានា របស់សម្តេចតេជោ ហ៊ុន សែន ជ្រុលហួសពេល នាំខាតបង់ថវិកា ដែលជាជំនួយឧបត្ថម្ភ របស់សម្តេចតេជោ ហ៊ុន សែន ត្រូវចំណាយលុយខាតឥតប្រយោជន៍៕ ដោយ៖ ដែន សីមា