កំពត ៖ កម្លាំងនគរបាលខេត្តកំពត បានចាប់ខ្លួនបានភ្លាមៗមនុស្សចំនួន៣នាក់ ក្នុងនោះមានមន្ដ្រីយោធាម្នាក់ ចេញពីផឹកស៊ីក្នុងហាងខារ៉ាអូខេរ៉ូយ៉ាល់កំពត ដកកាំភ្លើងបាញ់ ដោយគ្មានមូលហេតុ នៅយប់ថ្ងៃទី១៩ ខែវិច្ឆិកា ឆ្នាំ២០១៨ ស្ថិតក្នុងភូមិទ្វីខាងជើង សង្កាត់អណ្តូងខ្មែរ ក្រុងកំពត ខេត្តកំពត តែត្រូវ។
លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត បានប្រាប់ថា មុនពេលកើតហេតុ មានមនុស្សមួយក្រុមមានគ្នា៦នាក់ មិនទាន់ស្គាល់អត្តសញ្ញាណ ជិះម៉ូតូចំនួន៤គ្រឿង ក្រោយចេញពីខារ៉ាអូខេរ៉ូយ៉ាល់ ហើយបានដកកាំភ្លើងខ្លី បាញ់ឡើងលើមួយគ្រាប់ ហើយជិះម៉ូតូគេចចេញបាត់។ ក្រោយមកទៀត ខ្មាន់កាំភ្លើងដដែល បានបាញ់ឡើងលើនៅ២កន្លែងផ្សេងទៀត ដោយមួយកន្លែងនៅលើស្ពានព្រែកកំពង់បាយ និងនៅក្បែរខារ៉ាអូខេរ៉ូយាល់ ដដែល ហើយគេខ្លួនបាត់ស្រមោល។
លោកឧត្តមសេនីយ៍ទោ ម៉ៅ ច័ន្ទមធុរិទ្ធ បានបញ្ជាឲ្យកម្លាំងនគរបាលជំនាញ បើកការស្រាវជ្រាវភា្លមៗ រហូតដល់ទៀបភ្លឺថ្ងៃទី២០ ខែវិច្ឆិកា ឆ្នាំ២០១៨ ទើបឃាត់ខ្លួនបានជនសង្ស័យ៣នាក់ ដោយម្នាក់ជាមន្ដ្រីយោធា ជាជនដៃដល់។ ជនសង្ស័យទី១៖ ឈ្មោះ ហេង ចិន្តា ហៅចិន អាតុ៣៣ឆ្នាំ ជាមន្ដ្រីយោធា រស់នៅភូមិអណ្តូងខ្មែរ សង្កាត់អណ្តូងខ្មែរ ក្រុងកំពត ដកហូតបានកាំភ្លើងខ្លីទំនើបមួយដើម ម៉ាក Glock 19 លេខLL T620 បង់១ មានអត្តសញ្ញាណប័ណ្ណទាហាន និងប័ណ្ណសម្គាល់អាវុធសមូហភាព ទី២៖ឈ្មោះលាង សំបូរ ហៅម៉ាប់ អាយុ៣១ឆ្នាំ មានទីលំនៅភូមិអណ្តូងខ្មែរ សង្កាត់អណ្តូងខ្មែរ ក្រុងកំពត ខេត្តកំពត និងទី៣៖ឈ្មោះ ប៊ូ សុភា ហៅម៉ៅ អាយុ៣៣ឆ្នាំ នៅភូមិតាដឹប សង្កាត់អណ្តូងខ្មែរ ក្រុងកំពត ជាបក្ខពួកពេលផឹកស៊ីជាមួយគ្នា។
បច្ចុប្បន្នជនសង្ស័យ ត្រូវបានកម្លាំងនគរបាលជំនាញ នៃស្នងការដ្ឋាននគរបាលខេត្តកំពត កំពុងកសាងសំណុំរឿង ដើម្បីបញ្ជូនទៅតុលាការចាត់តាមច្បាប់៕ ដោយ ៖ បញ្ញាស័ក្តិ