ករណីប្តីកំហូចដែលបានលួចទៅរៀបការជាមួយស្រីថ្មី ដែលជាក្មួយថ្លៃខ្លួនឯងដ៏ហួសចិត្តបំផុត ហើយត្រូវប្រពន្ធតាមទាន់រហូតធ្វើឲ្យនាងស្លុតចិត្តដួលសន្លប់នៅមុខរោងការ បង្កការភ្ញាក់ផ្អើលដល់ភ្ញៀវមកចូលរួមស៊ីការ កាលពីថ្ងៃទី១៨ ខែវិច្ឆិកា ឆ្នាំ២០១៨ ស្ថិតនៅក្នុងភូមិអង្គរកា ឃុំអង្កាញ់ ស្រុកទ្រាំង ខេត្តតាកែវ ពេលនេះ ឈានដល់ការដោះស្រាយគ្នាឡើងបែកអូរហូរស្ទឹង នៅឯសាលាឃុំហើយ ។
មុននឹងឈានដោះស្រាយគ្នា ទៅតាមដំណាក់កាលនីមួយៗ ប្រពន្ធដើមដែលពោរពេញដោយកំហឹងឈឺចាប់ បានធ្វើការដៀលត្មិះឲ្យធ្ងន់ៗទៅលើប្តីកំហូច និងជាពិសេសម្តាយក្មេកថ្មីដែលត្រូវជាបងប្អូននឹងគ្នាសោះថា ជាអ្នកបញ្ចុកបញ្ស៊ីអូសទាញប្តីរូបនេះរហូតរៀបការជាមួយកូនស្រីខ្លួនលួចលាក់ មិនឲ្យងើបមុខតតាំងនឹងនាងបានឡើយ ។
យោងតាមវីដេអូឃ្លីបចំនួន៣ ដែលត្រូវបានបង្ហោះដោយគណនីហ្វេសប៊ុកឈ្មោះ Khouch Mfc បន្ទាប់ពីធ្វើការដោះស្រាយគ្នាដ៏ចម្រូងចម្រាស់មួយសន្ទុះធំ ក្រោមការដឹកនាំរបស់មេឃុំ ទីបំផុត ប្តីកំហូចរូបនេះបានបង់ទៅតាមការទាមទាររបស់ប្រពន្ធ ដើម្បីចិញ្ចឹមកូន៣នាក់ នូវទឹកប្រាក់ចំនួន ១៥០០០ ដុល្លារ ដោយធ្វើកិច្ចសន្យានឹងទម្លាក់លុយ១ខែ ៥០០ ដុល្លារ ៕ ដោយ៖ ចន្ទី