ខេត្តស្វាយរៀង ៖ លោក សុទ្ធ គឹមចន្ទ អភិបាល នៃគណៈអភិបាលស្រុកស្វាយជ្រំរួមជាមួយនឹងមន្ទីរបរិស្ថានខេត្តស្វាយរៀងនាព្រឹកថ្ងៃអង្គារ ១៣កើត ខែកក្កិក ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២០ ខែវិច្ឆិកា ឆ្នាំ២០១៨នេះ បានរៀបចំទិវាអនាម័យបរិស្ថានជាតិ២៣ ខែវិច្ឆិកា ឆ្នាំ២០១៨ ក្រោមប្រធានបទ”រួមគ្នាដើម្បីបរិស្ថានស្អាត” នៅសាលាស្រុកស្វាយជ្រំ ព្រមទាំងមានការអញ្ជើញចូលរួមពីសំណាក់ លោកប្រធានក្រុមប្រឹក្សាស្រុក លោក លោកស្រី សមាជិកក្រុមប្រឹក្សាស្រុក លោក លោកស្រី អនុប្រធានមន្ទីរបរិស្ថាននិងមន្ត្រីបរិស្ថាន លោក លោកស្រី អភិបាលរងស្រុក លោកនាយក នាយករងរដ្ឋបាលស្រុក លោក លោកស្រីប្រធាន អនុប្រធានការិយាល័យចំណុះសាលាស្រុក មន្ត្រីសាលាស្រុក កងកម្លាំងទាំង៣ប្រភេទ លោកប្រធានមន្ទីរពេទ្យបង្អែកស្រុកនិងបុគ្គលិក លោក លោកស្រីសមាជិកក្រុមប្រឹក្សាឃុំ មេឃុំ លោកនាយក.នាយករង វិទ្យាល័យស្វាយជ្រំ និងសិស្សានុសិស្សជាច្រើនរូបទៀត បានរួមគ្នាធ្វើពលកម្ម សម្អាតបរិស្ថាននៅទីតាំងបរិវេននានាដូចជា សាលាស្រុក តាមទីសាធារណៈ តាមដងផ្លូវ តាមទីប្រជុំជនជុំវិញផ្សារស្វាយជ្រំជាដើម…។
មន្ត្រីសាលាស្រុកស្វាយជ្រំបានឱ្យដឹងថា ៖ ការរៀបចំពិធីនេះឡើងគឺមានគោលបំណងបណ្តុះគំនិតប្រជាពលរដ្ឋឱ្យចេះស្រលាញ់បរិស្ថាន ធ្វើអោយបរិស្ថានស្អាត គ្មានសម្រាមពាសវាសវាលពាសកាល បណ្តុះគំនិតស្មារតី អោយមហាជនទូទៅមានការយល់ដឹងនិងការទុកដាក់សម្រាមឱ្យបានត្រឹមត្រូវ ដើម្បីលើកកម្ពស់សោភ័ណភាព អនាម័យ ផាសុខភាព ជាកន្លែងដែលចង់រស់នៅទាំងអង្គភាពរដ្ឋ វិស័យឯកជនទូទៅ ដែលជាការរួមចំណែកក្នុងអភិវឌ្ឍសេដ្ឋជាតិផងដែរ ពិសេសស្របពេល ដែលរដ្ឋបាលខេត្តស្វាយរៀងបាននឹងកំពុងជម្រុញអោយប្រជាពលរដ្ឋចូលរួមថែរក្សាអនាម័យបរិស្ថាន រួមទាំងការកែលម្អសោភ័ណភាពនៅទីរួមខេត្តដូចជា ច្រាំងទន្លេ កន្លែងហាត់ប្រាណ សួនច្បារសាធារណៈ រៀបចំហេត្ថារចនាសម្ព័ន្ធនានាជុំវិញខេត្តដើម្បីឆ្លើយតប ទៅនឹងការប្រឡងប្រណាំងទីក្រុងស្អាត ប្រចាំឆ្នាំផងដែរ។
សូមរំឮកផងដែរថា ៖ នៅថ្ងៃទី១៥ ខែកញ្ញា ឆ្នាំ២០១៨កន្លងទៅ ប្រជាពលរដ្ឋប្រមាណជាង ២០ លាននាក់ ក្នុងបណ្ដាប្រទេស ១៥០ លើពិភពលោករួមទាំងកម្ពុជាផងនោះ បានរួមគ្នារៀបចំទិវាសម្អាតអនាម័យពិភពលោកក្រោមប្រធានបទ «រួមគ្នាដើម្បីពិភពលោកស្អាត» ខណៈដែលសំរាមនៅតែត្រូវបានគេបោះចោលពាសវាលពាសកាលនៅតាមទីសាធារណៈនានា ។ ជាមួយនេះដែរ ក្រសួងបរិស្ថាន បានចេញសារាចរណែនាំដល់គ្រប់បណ្ដាមន្ទីរ ស្ថាប័ន និងអង្គភាពរួមទាំងបុគ្គលពាក់ព័ន្ធទាំងអស់ចូលរួមបញ្ឈប់ការបោះចោលសំរាម និងកាកសំណល់គ្រប់ប្រភេទពាសវាលពាសកាល ដោយទាមទារឲ្យមានការបែងចែក និងវេចខ្ចប់សំរាមឲ្យបានត្រឹមត្រូវតាមលក្ខណៈបច្ចេកទេស។មិនតែប៉ុណ្ណោះបានដាក់ចេញនូវការផាកពិន័យយ៉ាងធ្ងន់ធ្ងរផងដែរដល់ជនទាំងឡាយណាដែលបន្តបោះចោលសំរាមដោយឥតសណ្ដាប់ធ្នាប់លើទី សាធារណៈ ៕ ដោយ ៖ វ៉ៃគោ