ខេត្តព្រះសីហនុ ៖ មន្ត្រីរដ្ឋបាលសាលាខេត្តព្រះសីហនុ បានឱ្យដឹងថា កាលពីព្រឹកថ្ងៃទី២០ ខែវិច្ឆិកា ឆ្នាំ២០១៨ លោកឧត្តមសេនីយ៍ត្រី អ៊ី សុខា ស្នងការរងនគរបាលខេត្តព្រះសីហនុ បានដឹកនាំកម្លាំងនគរបាលចរាចរណ៍ផ្លូវគោក ចុះអប់រំ ណែនាំឱ្យម្ចាស់ការដ្ឋានសាងសង់សំណង់ក្រុមហ៊ុនចិនមួយកន្លែង ត្រូវលាងសម្អាតផ្លូវឱ្យបានស្អាត។
ការចុះអន្តរាគមន៍នេះ បន្ទាប់ពីការដ្ឋានខាងលើនេះ មានរថយន្តបើកចេញចូល បណ្ដាលឱ្យប្រឡាក់ផ្លូវ ត្រង់ចំណុចផ្លូវកែងកូនសោរ វិមានឯករាជ្យ និងចាប់រថយន្តមួយចំនួន ដែលដឹកដីធ្លាក់ប្រឡាក់ផ្លូវ នាំយកមករក្សាទុក នៅការិយាល័យនគរបាលចរាចរណ៍ផ្លូវគោក ដើម្បីដោះស្រាយបន្តតាមនីតិវិធី។ វិធានការនេះធ្វើឡើងតាមបទបញ្ជារបស់ឯកឧត្តម យន្ត មីន អភិបាលខេត្តព្រះសីហនុ ដែលតម្រូវឱ្យសមត្ថកិច្ចពាក់ព័ន្ធទាំងអស់ចាត់វិធានការទប់ស្កាត់ និងឃាត់ចាប់រថយន្តដឹកដី ដែលដឹកដីធ្លាក់ប្រឡាក់ផ្លូវ ក្នុងក្រុងព្រះសីហនុ៕ ដោយ៖ ដែន សីមា
