រឿងរ៉ាវបុរសជាប្តីលួចទៅរៀបការជាមួយកូនក្រមុំដែលត្រូវជាក្មួយថ្លៃរបស់ខ្លួន ហើយត្រូវប្រពន្ធតាមទាន់ រហូតស្លុតស្មារតីដួលសន្លប់នៅពីមុខរោងការ បង្កឲ្យមានការភ្ញាក់ផ្អើលដល់ភ្ញៀវមកចូលរួមស៊ីការ កាលពីល្ងាចថ្ងៃទី១៨ ខែវិច្ឆិកា ឆ្នាំ២០១៨ នៅភូមិអង្គរកា ឃុំអង្កាញ់ ស្រុកទ្រាំងនោះ បានឈានដល់ភាគីទាំងសងខាង (ប្តីកំហូច និងប្រពន្ធដើម) មកដោះស្រាយគ្នានៅសាលាឃុំរួចហើយ ដោយបុរសជាប្តីបានធ្វើតាមការទាមទាររបស់ប្រពន្ធនូវទឹកប្រាក់ចំនួន ១៥០០០ ដុល្លារ ដោយបង់ឲ្យ១ខែ ៥០០ ដុល្លារ ។ នេះបើយោងតាមការបញ្ជាក់ប្រាប់ពីបុរសជាប្តីរូបនេះ នៅឯសាលាឃុំ ។
ទោះយ៉ាងណា ខណៈពេលនេះ យើងខ្ញុំសូមឲ្យប្រិយមិត្តមកដឹងរឿងច្បាស់បន្ថែមទៀត ចំពោះករណីដែលបុរសជាប្តីកំហូចនេះហ៊ានសម្រេចចិត្តរៀបការ ទាំងមេភូមិមេឃុំពុំចេញច្បាប់អនុញ្ញាត និងមិនទទួលខុសត្រូវ ។
បើតាមលោក យឹម សំអាត មេឃុំអង្កាញ់ ស្រុកទ្រាំង បានឱ្យដឹងថា ដើមហេតុនៃរឿងនេះ គឺមុនថ្ងៃការ១សប្តាហ៍ ឪពុកម្តាយខាងកូនក្រមុំបានមកសុំច្បាប់រៀបការ តែលោកក៏បានប្រាប់ថា មិនអនុញ្ញាតឱ្យរៀបការនោះទេ លុះត្រាតែមានសំបុត្រកូនកំលោះមកបញ្ជាក់ឲ្យបានត្រឹមត្រូវ ទើបអនុញាតឲ្យរៀបការបាន ។ លោកបន្តថា តែបើនៅតែរៀបការ នោះលោកមិនទទួលខុសត្រូវចំពោះអាពាហ៍ពិពាហ៍នេះឡើយ ។
លោក យឹម សំអាត បានឲ្យដឹងទៀតថា នៅពេលលោកបដិសេធរឿងនេះ នៅពេលនោះ ឪពុកម្តាយខាងស្រីបានប្រាប់លោកវិញថា កូនស្រីគាត់ពោះធំទៅហើយ តើត្រូវដោះស្រាយបែបណា? ។ ទោះយ៉ាងណា លោកបានបញ្ជាក់ទៅវិញថា មិនទទួលខុសត្រូវនោះទេ ។ លោកបន្តថា លុះនៅថ្ងៃទី១៨ វិច្ឆិកា ស្រាប់តែមេបាខាងស្រីមានះរៀបការ ហើយក៏លេចឮមានប្រពន្ធដើមមកទាន់ និងហាមឃាត់មិនឱ្យការបង្កការភ្ញាក់ផ្អើលតែម្តង ៕ ដោយ៖ ចន្ទី