ថ្មីៗនេះ NST បានរាយការណ៍ថា ត្រីបាឡែន១ក្បាល ដែលបានងាប់អណ្តែតនៅឯឧស្យានឥណ្ឌូនេស៊ី ហើយពួកមន្ត្រីនៅទីនោះបានរកឃើញថា នៅក្នុងក្រពះរបស់វាផ្ទុកទៅដោយកាកសំណល់ប្លាស្ទិកជិត ៦ គីឡូក្រាម ។
ពួកមន្ត្រីឧស្យានក៏បានបញ្ចេញថា កាកសំណល់ប្លាស្ទិកនោះ រួមមាន ពែងចំនួន ១១៥ នៅក្រពះរបស់វា ។ សត្វដ៏ធំប្រវែង ៩.៥ ម៉ែត្រ នេះ ត្រូវបានរកឃើញងាប់នៅជិតដែនទឹកកោះ Kapota -កោះដែលជាផ្នែកមួយនៃឧស្យានជាតិ Wakatobi ស្ថិតនៅភាគអាគ្នេយ៍នៃ Sulawesi ។
ពួកគេបានពន្យល់ថា មូលហេតុដែលបណ្តាលឲ្យត្រីបាឡែនេះងាប់ គឺនៅតែជាអាថ៌កំបាំង ប៉ុន្តែ ពួកគេបានរកឃើញរបស់របរជាច្រើនដែលជាកាកសំណល់របស់មនុស្សដទៃ ទៀតក្រៅពីពែងជ័រនៅក្នុងពោះរបស់វាមានផ្ទុកដូចជា៖
- ដបជ័រ
- ស្បោង
- ស្បែកជើង
- ថង់មួយផ្ទុកទៅដោយខ្សែផ្សេងៗជាង ១.០០០ សរសៃ
តាមរយៈនេះ គេបានធ្វើការព្រមានម្តងហើយម្តងទៀតថា កាកសំណល់បានកំពុងសម្លាប់ជីវិតសត្វលោកនៅលើផែនដីនេះជាសន្សឹមហើយ ជាពិសេសនៅលើមហាសមុទ្រ ដែលមានសត្វជាច្រើនរស់នៅក្នុងនោះ ។
យោងតាមរបាយការណ៍ឆ្នាំ២០១៥ របស់មជ្ឈមណ្ឌលអភិរក្សមហាសមុទ្រ និង សម្រាប់ពាណិជ្ជកម្ម និងបរិស្ថាន McKinsey នោះប្រទេសចំនួន ៥ នៅក្នុងអាស៊ី ជាអ្នកទទួលខុសត្រូវសម្រាប់ «កាកសំណល់ ៦០% ដែលបានលេចធ្លាយចូលក្នុងមហាសមុទ្រ» ។
ប្រទេសនៅក្នុងអាស៊ីទាំង៥នោះរួមមាន៖
- ចិន
- ឥណ្ឌូនេស៊ី
- ហ្វីលីពីន
- វៀតណាម
- ថៃ
ដោយ៖ ឧត្តម (ប្រភព៖ worldofbuzz)