យោងតាម SCMP និស្សិតប្រុសស្រីជាង ២០ នាក់ មកពីមហាវិទ្យាល័យផ្សេងៗគ្នា បានកំពុងប្រារព្ធពិធីថ្ងៃខួបកំណើតរបស់ទារកនៅខែវិឆ្ឆិកា នៅឯសកលវិទ្យាល័យ Baptist នៅបរិវេន Kowloon Tong ក្នុងទីក្រុងហុងកុង ។ ពួកគេកំពុងស្ថិតនៅបន្ទប់មួយ ស្ថិតនៅជាន់ទី១២ ហើយបាននាំយកនំខេកខួបកំណើត សម្រាប់មិត្តៗភក្តិរបស់ពួកចូលរួម កាលពីថ្ងៃទី២២ វិច្ឆិកា វេលាម៉ោងប្រហែល ១ រំលងអាធ្រាត្រ ។
ពួកគេបានដុតភ្លើងទៀន និងចាប់ផ្តើមច្រៀងចម្រៀងបឺស្តេ សម្រាប់មិត្តៗភក្តិរបស់ពួកគេ ។ ប៉ុន្តែ បន្ទាប់ ស្រាប់តែនរណាម្នាក់បញ្ចេញម្សៅមួយចំនួន ហើយចាប់ផ្តើមគ្រវែងឡើងលើ ដើម្បីប្រារព្ធពិធី ខណៈភ្លើងទៀននៅតែឆេះ ។ ជាអកុសល ករណីនេះបានបង្កឲ្យផ្ទុះឆាបឆេះភ្លើងសន្ធោសន្ធៅ បណ្តាលឲ្យនិស្សិតយ៉ាងតិច ១២ នាក់ រងរបួសពីការរលាកភ្លើងគួរឲ្យអាសូរ ។
ក្រុមពន្លត់អគ្គីភ័យ បានប្រញាប់ប្រញាល់ទៅកាន់កន្លែងកើតហេតុ ដើម្បីពន្លត់ភ្លើង ខណៈនិស្សិតរងរបួសត្រូវបានបញ្ជូនទៅកាន់មន្ទីរពេទ្យ Queen Elizabeth និង Kwong Wah ស្ថិតក្នុងស្ថានភាពរលាកនៅត្រង់ មុខ, ក, ដៃ និងជើងរបស់ពួកគេ ។ ករណីនេះត្រូវបានគេរាយការណ៍ឲ្យដឹងថា និស្សិតស្រីៗចំនួន ៨ នាក់ ហើយប្រុស ៤ នាក់ មានអាយុចន្លោះពី ១៨ ទៅ ២៣ ឆ្នាំ បានរងរបួស ។
ភាគច្រើនៃពួកគេ បានរងរបួសស្រាល ហើយកំពុងស្ថិតក្នុងលក្ខខណ្ឌស្ថេរភាព ប៉ុន្តែ សម្រាប់និស្សិតស្រីម្នាក់ឈ្មោះ Chen អាយុ ២១ ឆ្នាំ បានរងរបួសធ្ងន់ធ្ងរ ៕ ដោយ៖ ឧត្តម (ប្រភព៖ Worldofbuzz)
