កុលសម្ព័ន្ធ Apache បានដឹងពីវត្តមាននៃឃ្លាំងផ្ទុកពេញដោយមាស នៅភ្នំ Superstition ចំណុះរដ្ឋ Arizona អាមេរិក។
កំណប់មហាសាលនេះត្រូវបានការពារដោយបណ្តាសាដ៏សាហាវ ហើយជាក់ស្តែងមនុស្សជាច្រើនដែលទៅស្វែងរុករកវា ពុំមានជីវិតវិលត្រឡប់មកវិញទេ។
វាបានក្លាយទៅជារឿងព្រេងនិទានរបស់កុលសម្ព័ន្ធ Apache បានតំណាលអំពីកំណប់មាសដែលកប់ទុកនៅកំពូលភ្នំជំនឿ (Superstition Mountains) ក្នុងរដ្ឋ Arizona អាមេរិក។ ប៉ុន្តែវាផ្សារភ្ជាប់ជាមួយនឹងបណ្តាសាដ៏កាចសាហាវ។
ជនជាតិ Apache បាននិទានអំពីទេវតារន្ទះនិងការសងសឹករបស់ទេវតានោះចំពោះអ្នកដែលប៉ងទៅយកមាសដែល កប់ទុកលើកំពូលភ្នំជំនឿ
ដោយមើលរំលងពាក្យបណ្តាសា មនុស្សមួយចំនួននៅតែសម្រេចចិត្តស្វែងរកកំណប់ទ្រព្យលើកំពូលភ្នំនោះដើម្បីក្លាយជាអ្នកមាន។ ប៉ុន្តែក្នុងអំឡុងពេលរុករក អ្នកទាំងនោះបានបាត់បង់ជីវិត។
រឿងដែលគេកត់ត្រាទុក គឺករណីលោក Don Miguel Peralta ដែលធ្លាប់ប្រកាសថាបានរកឃើញតម្រុយកំណប់ទ្រព្យនៅលើកំពូលភ្នំ ប៉ុន្តែគាត់បានត្រូវកុលសម្ព័ន្ធ Apache សម្លាប់ចោលនៅឆ្នាំ១៨៤៥។
ដល់ឆ្នាំ១៨៨០ ទាហានវ័យក្មេង២នាក់ដែលទើបបំពេញកាតព្វកិច្ចយោធាចប់ បានមកសុំធ្វើការក្នុងរ៉ែ Silver King របស់លោក Aaron Mason ។ នៅតាមផ្លូវដើរទៅកាន់ភ្នំជំនឿ ទាហានពីររូបនេះរើសបានមាសមួយចំនួនដែល មានគុណភាពខ្ពស់។ មាសទាំងនេះនៅរប៉ាត់រប៉ាយក្នុងច្រកផ្លូវតូចមួយ ប៉ុន្តែគេរើសបានមួយផ្នែកតូចប៉ុណ្ណោះ។
លោក Mason ពេលឃើញមាសដែលទាហានទាំងពីររើសបាន មានការងឿងឆ្ងល់យ៉ាងខ្លាំង ហើយស្នើឱ្យពួកគេលក់ឱ្យខ្លួន។ទន្ទឹមនោះលោកក៏សំណូមពរឱ្យអ្នកទាំងពីរវិលត្រឡប់ទៅរុករកមាសនៅទីនោះ ដោយខ្លួនគាត់ជាអ្នកផ្តល់ឧបករណ៍ចាំបាច់។ អ្នកទាំងពីរពិតជាមានជំនឿ ព្រោះគេបានទៅដល់ ហើយរើសយកដុំមាសពិតៗ។ ប៉ុន្តែទាហានទាំងពីរនាក់នេះគ្មាននៅសល់ជីវិតត្រឡប់មកវិញទេ
ពីរសប្តាហ៍ក្រោយគ្មានដំណឹងអ្វី លោកMason បានចាត់មនុស្សមួយក្រុមទៅរុករក។ពួកគេបានរកឃើញសាកសព ម្នាក់ដេកនៅតាមផ្លូវលំសំដៅទៅភ្នំក្នុងសភាពអាក្រាតកាយ ហើយត្រូវបាញ់ចំក្បាល។មួយថ្ងៃក្រោយមក គេបានរកឃើញសាកសពទាហានទីពីរដែលស្លាប់ក្នុងសភាពដូចគ្នា។ ការស្លាប់របស់ទាហានទាំងពីរនាក់នេះគឺធ្វើឱ្យគេកាន់តែជឿជាក់ថាពាក្យបណ្តាសាប្រាកដជាមាន៕លីសា