ត្បូងឃ្មុំ ៖ រថយន្តម៉ាក TOYOTA ពណ៌ទឹកប្រាក់ បើកបរតាមបណ្តោយផ្លូវជាតិលេខ៧ បានរេចង្កូតទៅធ្លាក់លូកន្លែងការដ្ឋានរៀបចំប្រព័ន្ធលូថ្មី នៅចំណុចភូមិសង្គមមានជ័យ ឃុំមេមត់ ស្រុកមេមត់ ខេត្តត្បូងឃ្មុំ (មិនបង្កឲ្យមានគ្រោះថ្នាក់ដល់អាយុជីវិត) វេលាម៉ោងប្រមាណជា ១០ ព្រឹក នៅព្រឹកថ្ងៃ ២៤ វិច្ឆិកា ២០១៨ ។
អធិការដ្ឋាននគរបាលស្រុកមេមត់ បានលើកឡើងថា អ្វីដែលយើងធ្វើការបង្ហោះនេះ គឺតែចង់សួរថា ៖ តើគាត់ម្ចាស់រថយន្តមានការឆ្លងកាត់ចូលរៀនបើកបរ និងទទួលបានពាក់មីសាលាជំនាញណាមួយហើយឬនៅ ? តើគាត់មានឃើញផ្លាក់សញ្ញា ការដ្ឋានជួសជុលផ្លូវដែរឬទេ? តើគាត់បានពិនិត្យលើបច្ចេកទេសរបស់គាត់ហើយឬនៅ? តើគាត់បានស្វែងយល់អំពីច្បាប់ចរាចរណ៍ផ្លូវគោក ដែលមានចែងជាច្បាប់ នៅព្រះរាជាណាចក្រកម្ពុជាដែលឬទេ ? ។
អធិការដ្ឋាននគរបាលស្រុកមេមត់ បានសំណូមពរសុំឲ្យមានការប្រុងប្រយ័ត្នក្នុងពេលបើកបរ ដោយដាក់នូវខ្សែក្រវ៉ាត់សុវត្ថិភាព មិនពិសារគ្រឿងស្រវឹង អត់អោនឲ្យគ្នាទៅវិញទៅមក ប្រកាន់ស្តាំ មិនវ៉ាឆ្វេងក្នុងស្ថានភាពគ្រោះថ្នាក់ មិនបើកបរហួសល្បឿនកំណត់ ។ល។
សូមបញ្ជាក់ជូនថា មិនមែនជាការស្តីបន្ទោសទេ សុំអធ្យាស្រ័យផង ព្រោះចង់ឲ្យបងប្អូនប្រជាពលរដ្ឋ មើលឃើញហើយគោរព និងអនុវត្តច្បាប់ចរាចរណ៍ផ្លូវគោក ឲ្យបានល្អទាំងអស់គ្នា ។
គោរពអនុវត្តច្បាប់ចរាចរណ៍ គឺគោរពស្រឡាញ់ជីវិតអ្នក និងអ្នកដទៃ៕ ដោយ ៖ បញ្ញាស័ក្តិ