មន្ត្រីមន្ទីរទេសចរណ៍ខេត្តព្រះសីហនុ បានឲ្យដឹងថា ចំនួនភ្ញៀវទេសចរ ដែលចូលទៅទស្សនាខេត្តជាប់ឆ្នេរសមុទ្រមួយនេះ ក្នុងរយៈពេល៣ថ្ងៃ នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំនេះបានថយចុះ បើប្រៀបធៀបពេលវេលាដូចគ្នាឆ្នាំមុន។
ប្រតិបត្តិករទេសចរបំរើសេវាលក់ម្ហូបអាហារ នៅតាមឆ្នេរសមុទ្រមួយចំនួនមានឆ្នេរអូរត្រេះ ឆ្នេរព្រែកត្រែង និងឆ្នេរអូរឈើទាលជាដើម បានទទួលស្គាល់ថាចំនួនភ្ញៀវទេសចរ ពិតជាមានការថយចុះនាឱកាសព្រះរាជពិធីបុណ្យអុំទូកឆ្នាំនេះពិតមែន។
អនុប្រធានមន្ទីរទេសចរណ៍ខេត្ដព្រះសីហនុ លោក វ៉េង ស៊ីសុវង្ស បានបង្ហាញស្ថិតិចំនួនភ្ញៀវទេសចរជាតិអន្តរជាតិ ដែលចូលមកទស្សនាខេត្តនេះ ក្នុងរយៈពេល៣ថ្ងៃ នៃព្រះរាជពិធីបុណ្យអុំទូក បណ្ដែតព្រះទីប និងសំពះព្រះខែ អកអំបុកឆ្នាំ២០១៨នេះបង្ហាញថា ខេត្តព្រះសីហនុ ទទួលបានភ្ញៀវទេសចរសរុបប្រមាណ ៦៣,០០០ម៉ឺននាក់ គឺបានថយចុះ ២៥.៨៨%។ ក្នុងនោះភ្ញៀវជាតិ មានចំនួនប្រមាណ ៥០,២៣០នាក់ គឺបានថយចុះ៣២.០៧% និងភ្ញៀវអន្តរជាតិ មានចំនួនប្រមាណ ១២,៧៧០នាក់ គឺកើនឡើងប្រមាណ១៥.៥៦%។
លោក វ៉េង ស៊ីសុវង្ស បញ្ជាក់ថា ភ្ញៀវទេសចរ ដែលទៅកម្សាន្តនៅតាមបណ្តាកោះនានា គឺមានចំនួនសរុប ៦,៤៨៩នាក់ ស្រី២,៨៥៥នាក់ កើនឡើង៨,៣៦%។ ក្នុងនោះភ្ញៀវជាតិមានចំនួន ៣,០០១នាក់ ស្រី១,២៣៥នាក់ គឺថយចុះ៨៧.៨៩% និងភ្ញៀវអន្តរជាតិ មានចំនួន៣,៤៨៨នាក់ ស្រី១,៧០០នាក់ គឺកើនឡើង ២៧.៧០%។
ស្ថិតិដដែលបង្ហាញថា ចំពោះភ្ញៀវទេសចរចូលមកទស្សនាខេត្តព្រះសីហនុ តាមអាកាសយាន្តដ្ឋានអន្តរជាតិខេត្តព្រះសីហនុ គឺមានចំនួនសរុប៥,៤០០នាក់។ ក្នុងនោះភ្ញៀវជាតិចំនួន៥០នាក់ និងបរទេស៥,៣៥០នាក់។
តាមរបាយការណ៍ របស់មន្ទីរទេសចរណ៍ខេត្តព្រះសីហនុ បានឲ្យដឹងថា កាលពីថ្ងៃទី២២ ខែវិច្ចិកា ឆ្នាំ២០១៨ មាននាវាទេសចរណ៍មួយគ្រឿងបានចូលចតនៅកំពង់ផែអន្តរជាតិក្រុងព្រះសីហនុ និងមានភ្ញៀវសរុប ១,៨៥៤នាក់ មានស្រី ៩៦១នាក់ មាននាវឹកសរុប ៧៩៣នាក់ ស្រី១២៧នាក់។
ចំណែកភ្ញៀវ ដែលចូលមកកម្សាន្តតាមរមណីយដ្ឋាននានារួមមាន៖ រមនីយដ្ឋានក្បាលឆាយ មានចំនួនសរុបប្រមាណ៤,៧៩៥នាក់ ក្នុងនោះមានភ្ញៀវបរទេស ៦០នាក់ ស្រី១៧នាក់។ រមនីយដ្ឋានថ្មរូង មានភ្ញៀវសរុបប្រមាណ១៨៨០នាក់ ស្រី៥៦៤នាក់ បរទេស២៧០នាក់ និងរមនីយដ្ឋានពិចនិច មានភ្ញៀវទេសចរសរុបប្រមាណ១៨៥០នាក់ ក្នុងនោះភ្ញៀវបរទេស៣៣០នាក់ ស្រី១០០នាក់។
នាឱកាសព្រះរាជពិធីបុណ្យអុំទូកនេះដែរ លោក វ៉េង ស៊ីសុវង្ស អនុប្រធានមន្ទីរទេសចរណ៍ខេត្តព្រះសីហនុ ក៏បានឲ្យដឹងដែរថា ចំពោះបញ្ហាតម្លៃសេវាកម្មស្នាក់នៅ គឺសណ្ឋាគារមួយចំនួនបានតម្លើងតម្លៃចន្លោះពី ២០% ទៅ៣៥% និងផ្ទះសំណាក់មួយចំនួន ក៏បានតម្លើងតម្លៃចន្លោះពី ៣០% ទៅ៥០%។ចំណែកម្ហូបអាហារគ្រឿងសមុទ្រ ក៏បានតម្លើងតម្លៃប្រមាណ ២០%ផងដែរ នាពិធីបុណ្យអុំទូកឆ្នាំនេះ ទោះបីថ្នាក់ដឹកនាំរដ្ឋបាលខេត្តព្រះសីហនុ និងស្ថាប័នពាក់ព័ន្ធបានស្នើឲ្យរក្សាតម្លៃថេរដូចថ្ងៃធម្មតាបែបណាក្តី។
ត្រង់ចំណុចនេះ អភិបាលខេត្តព្រះសីហនុ លោក យន្ត មីន ក៏បានទទួលស្គាល់ថា ពិតជាមានករណីប្រតិបត្តិករទេសចរមួយចំនួន បានតម្លើងតម្លៃសេវាម្ហូបអាហារ និងតម្លើងតម្លៃសេវាស្នាក់ កើនលើសថ្ងៃធម្មតាពិតប្រាកដមែន នាឱកាសព្រះរាជពិធីបុណ្យអុំទូកឆ្នាំនេះ។
យ៉ាងនេះក្តី លោក យន្ត មីន បានអំពាវនាវដល់ប្រជាពលរដ្ឋ ពិសេសភ្ញៀវទេសចរជាតិអន្តរជាតិ ឲ្យបន្តចូលមកសម្រាកកម្សាន្តខេត្តឆ្នេរសមុទ្រមួយនេះ ឲ្យបានច្រើនថែមទៀតនាថ្ងៃខាងមុខ ជាពិសេសថ្ងៃបុណ្យឆ្លងឆ្នាំសកល២០១៨-២០១៩ខាងមុខនេះឲ្យបានច្រើនកុះករ ព្រោះថាបច្ចុប្បន្ននេះ រដ្ឋបាលខេត្តព្រះសីហនុ បានស្ថាបនាផ្លូវ ដាក់ប្រព័ន្ធលូបង្ហូរទឹក បំពាក់ភ្លើងបំភ្លឺ និងពង្រាយកម្លាំងសមត្ថកិច្ចចម្រុះ ដើម្បីការពារសន្តិសុខជូនភ្ញៀវ ដោយការទទួលខុសត្រូវខ្ពស់នៅគ្រប់ច្រកល្អកទាំងនៅលើដីគោក និងលើដីកោះ។
ដោយឡែកចំពោះការងាររក្សាសន្តិសុខ និងសុវត្ថិភាព ជូនប្រជាពលរដ្ឋ និងភ្ញៀវទេសចរនាឱកាសព្រះរាជពិធីបុណ្យអុំទូកឆ្នាំនេះដែរ ថ្នាក់ដឹកនាំស្នងការនគរបាលខេត្តព្រះសីហនុ និងកងរាជអាវុធហត្ថខេត្តនេះ ក៏បានអះអាងថា បានពង្រាយកម្លាំងជំនាញ រង់ចាំរក្សាការពារសុវត្ថិភាពជូនភ្ញៀវទេសចរទាំងយប់ថ្ងៃនៅតាមគោលដៅនានា ជាពិសេសគោលដៅ ដែលមានភ្ញៀវទេសចរនិយមចូលទៅកម្សាន្ត ទាំងនៅលើដីគោក និងនៅលើដីកោះ។
មន្ត្រីជំនាញទាំងនោះ បានឲ្យដឹងថា ក្នុងរយៈពេល៣ថ្ងៃ នៃព្រះរាជពិធីបុណ្យអុំទូកឆ្នាំនេះ គឺមានសន្តិសុខ សណ្តាប់ធ្នាប់ល្អ ដោយកម្លាំងជំនាញ បានពង្រឹងសកម្មភាពចុះល្បាត និងប្រចាំការទាំងយប់ថ្ងៃ ដោយចិត្ដទុកដាក់ និងរៀបចំផែនការគ្រប់គ្រងយ៉ាងម៉ត់ចត់ ពីគណៈបញ្ជាការឯកភាពខេត្ដ ក៏ដូចជាស្នងការការនគរបាលខេត្ដ និងកងរាជអាវុធហត្ថខេត្ដព្រះសីហនុ ដើម្បីធ្វើយ៉ាងណារក្សាសន្ដិសុខ និងសុវត្ថិភាព ជូនប្រជាពលរដ្ឋ ជាពិសេសភ្ញៀវទេសចរ។ សមត្ថកិច្ចជំនាញបានអះអាងថា បុណ្យអុំទូកឆ្នាំនេះ គឺបានរក្សាសន្តិសុខសុវត្ថិភាពជូនភ្ញៀវទេសចរ មានលក្ខណៈល្អប្រសើរបំផុត ដោយក្នុងរយៈពេល ៣ថ្ងៃ នៃព្រះរាជពិធីបុណ្យអុំទូកឆ្នាំនេះ គឺ ពុំមានបទល្មើសចោរឆក់ លួច និងមនុស្សលង់ទឹកស្លាប់កើតឡើងនោះទេ។
ងាកទៅបញ្ហាបរិស្ថាន និងអនាម័យសាធារណៈវិញ មន្ត្រីរដ្ឋបាលខេត្តព្រះសីហនុ បានអះអាងថា មានលក្ខណៈល្អប្រសើរជាងឆ្នាំមុនៗ ដោយទាំងអាជីវករ ប្រជាពលរដ្ឋ ពិសេសភ្ញៀវទេសចរ ពួកគេបានចូលរួមសហការវេចខ្ចប់ និងទុកដាក់សំរាម នៅតាមទីតាំងប្រមូលសំរាមបានត្រឹមត្រូវ។
អភិបាលខេត្តព្រះសីហនុ លោក យន្ត មីន មានមោទនៈភាពថា ជាលទ្ធផល នៃការរៀបចំព្រះរាជពិធីបុណ្យអុំទូក បណ្ដែតប្រទីប និងអកអំបុក សំពះព្រះខែ ក្នុងរយៈពេល ៣ថ្ងៃចាប់ពីថ្ងៃទី២១ ដល់ថ្ងៃទី២៣ ខែវិច្ឆិកា គឺទទួលបានលទ្ធផលល្អប្រសើរ ហើយតាមការ សង្កេតឃើញថា ទាំងប្រជាពលរដ្ឋ និងភ្ញៀវទេសចរ បានចូល រួមអបអរសាទរយ៉ាងសប្បាយរីករាយ ទោះបីជាពិធីបុណ្យនេះ មិនមានការប្រារព្ធជាលក្ខណៈទ្រង់ទ្រាយធំ នៅខេត្តព្រះសីហនុបែបណាក្តី៕ ដោយ៖ ដែន សីមា
