ខេត្តព្រះសីហនុ ៖ លោកឧត្តមសេនីយ៍ទោ ជួន ណារិន្ទស្នងការនគរបាលខេត្តព្រះសីហនុ បានអោយដឹងថា កម្លាំងនគរបាលបានបង្ក្រាបករណីលួចមានស្ថានទម្ងន់ទោស (ឆក់ទូរស័ព្ទដៃជនបរទេស) ដែលជនសង្ស័យបានប្រព្រឹត្តកាលពីថ្ងៃទី២៣ ខែវិច្ឆិកា ឆ្នាំ២០១៨ វេលាម៉ោង ១៩ និង០០នាទី ស្ថិតនៅម្តុំតំបន់ឧតុនិយម ភូមិ៣ សង្កាត់៣ ក្រុង-ខេត្តព្រះសីហនុ។
សមត្ថកិច្ចឱ្យដឹងថា ក្រោយទទួលបានព័ត៌មានខាងលើភ្លាមៗ កម្លាំងជំនាញផែនព្រហ្មទណ្ឌ បានសហការជាមួយកម្លាំងអធិការនគរបាលក្រុង ប៉ុស្តិ៍នគរបាលរដ្ឋបាល បានធ្វើការប្រដេញ និងស្ទាក់ ចាប់បានជនសង្ស័យចំនួន២នាក់ នៅចំណុចលោកយាយម៉ៅ ហើយបន្ទាប់មកសមត្ថកិច្ចនគរបាល បានបន្តចុះស្រាវជ្រាវចាប់ខ្លួនជនសង្ស័យបានចំនួន៣នាក់ ថែមទៀត សរុបចំនួន ៥នាក់។
មន្ត្រីនគរបាលបានឱ្យដឹងថា ជនរងគ្រោះជាជនជាតិចិន មិនស្គាល់អត្តសញ្ញាណ បច្ចុប្បន្ននេះពុំទាន់បានមកដាក់ពាក្យបណ្តឹងនៅស្ថាប័ននគរបាលនៅឡើយទេ។
ចំណែកជនសង្ស័យចំនួន ៥នាក់ មានឈ្មោះដូចខាងក្រោម៖
១- ឈ្មោះ យិន ទីទី ភេទប្រុស អាយុ១៦ឆ្នាំ មុខរបរជាងភ្លើង មានទីលំនៅ ភូមិ២ សង្កាត់២ ក្រុង-ខេត្តព្រះសីហនុ (ជនដៃដល់)។
២- ឈ្មោះ សាន ប្រុស ភេទប្រុស អាយុ១៦ឆ្នាំ មុខរបរមិនពិតប្រាកដ មានទីលំនៅ ភូមិ២ សង្កាត់២ ក្រុង-ខេត្តព្រះសីហនុ (ជនដៃដល់)។
៣- ឈ្មោះ និត ម៉ាណាន់ ភេទប្រុស អាយុ១៦ឆ្នាំ មុខរបរសិស្ស មានទីលំនៅភូមិ៣ សង្កាត់៤ ក្រុង-ខេត្តព្រះសីហនុ(ជនដៃដល់)។
៤- ឈ្មោះ ឆៀង វឌ្ឍនៈ ភេទប្រុស អាយុ១៧ឆ្នាំ មុខរបរ មិនពិតប្រាកដ មានទីលំនៅភូមិ២ សង្កាត់៤ ក្រុង-ព្រះសីហនុ (ជនដៃដល់)។
៥- ឈ្មោះ ស ម៉េង អាយុ២៨ឆ្នាំ មុខរបរ រត់ម៉ូតូឌុប មានទីលំនៅភូមិ១ សង្កាត់៤ ក្រុង-ខេត្តព្រះសីហនុ (អ្នកទទួលផលចោរកម្ម)។
សមត្ថកិច្ចបញ្ជាក់ថា យុទ្ធនាការខាងលើនេះ សមត្ថកិច្ចចាប់វត្ថុតាងបានមួយចំនួនរួមមាន៖
– ម៉ូតូម៉ាកសេ១២៥ ឆ្នាំ២០១៨ ពណ៌ខ្មៅ ១គ្រឿង(មធ្យោបាយធ្វើសកម្មភាព)។
– ទូរស័ព្ទ ២ គ្រឿង (អាយហ្វូន១គ្រឿង និង ម៉ាកOPPO ១ គ្រឿង)។
បច្ចុប្បន្ន ជនសង្ស័យ និងវត្ថុតាងខាងលើ កំពុងបន្តនីតិវិធី នៅការិយាល័យនគរបាលព្រហ្មទណ្ឌស្រាល ដើម្បីកសាងសំណុំរឿងទៅសាលាដំបូងខេត្តព្រះសីហនុផ្តន្ទាទោសតាមច្បាប់៕ ដោយ៖ ដែន សីមា