ភ្នំពេញ ៖ លោកឯកអគ្គរដ្ឋទូតអាមេរិក William A. Heidt បានសម្តែងនូវឆន្ទៈ ក្នុងការបន្តលើកកម្ពស់ និងគាំទ្រ ដល់ការវិនិយោគ របស់អាមេរិក នៅក្នុងប្រទេសកម្ពុជា លើវិស័យភ័ស្តុភារកម្ម និងហេដ្ឋារចនាសម្ព័ន្ធ។
នៅថ្ងៃអង្គារ ទី២០ ខែវិច្ឆិកា ឆ្នាំ២០១៨ នៅទីស្តីការក្រសួងសាធារណៈការ និងដឹកជញ្ជូន លោកទេសរដ្ឋមន្ត្រី ស៊ុន ចាន់ថុលបានទទួលជួបសម្ដែង ការគួរសម និងជម្រាបលា ពីសំណាក់លោក William A. Heidt ឯកអគ្គរដ្ឋទូតសហរដ្ឋអាមេរិក ប្រចាំព្រះរាជាណាចក្រកម្ពុជា។
លោកទេសរដ្ឋមន្ត្រី ស៊ុន ចាន់ថុល បានថ្លែងអំណរគុណយ៉ាងជ្រាលជ្រៅ និងការកោតសរសើរចំពោះកិច្ចខិតខំប្រឹងប្រែង និងសមិទ្ធផលរបស់ឯកអគ្គរដ្ឋទូតក្នុងអាណត្តិរបស់ខ្លួន។ លោកទេសរដ្ឋមន្ត្រី បានជម្រាបជូនលោកឯកអគ្គរដ្ឋទូតអំពីគំនិតផ្តួចផ្តើមកំណែទម្រង់ដែលកំពុងដំណើរការរបស់ក្រសួង និងបានកត់សម្គាល់ជាក់លាក់លើការចូលរួមចំណែករបស់ ក្រុមហ៊ុន General Electric និងក្រុមហ៊ុនអាមេរិកដទៃទៀតក្នុងការអភិវឌ្ឍប្រទេសកម្ពុជា។
លោក William A. Heidt បានសម្តែងអំណរគុណនិងកោតសរសើរយ៉ាងជ្រាលជ្រៅចំពោះឱកាស និងការគាំទ្រដែលអាចជួយឲ្យឯកឧត្តបានបំពេញការងាររបស់ខ្លួនជាឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា។
លោកឯកអគ្គរដ្ឋទូត បានសម្តែងនូវឆន្ទៈបន្ថែមទៀត ក្នុងការបន្តលើកកម្ពស់ និងគាំទ្រ ដល់ការវិនិយោគរបស់អាមេរិកបន្ថែមទៀត នៅក្នុងប្រទេសកម្ពុជា លើវិស័យភ័ស្តុភារកម្ម និងហេដ្ឋារចនាសម្ព័ន្ធ។
លោកទេសរដ្ឋមន្ត្រី បានជូនពរសូមឲ្យលោកឯកអគ្គរដ្ឋទូត ទទួលបានជោគជ័យ ក្នុងមុខតំណែងនាពេលអនាគត របស់ខ្លួន និងបានថ្លែងអំណរគុណយ៉ាងជ្រាលជ្រៅ ចំពោះទំនាក់ទំនងមិត្តភាព ជាមួយប្រជាជនកម្ពុជា៕ ដោយ ៖ កូឡាប
