ភ្នំពេញ៖ ក្រសួងមហាផ្ទៃបានប្រកាសឱ្យអភិបាលរាជធានី-ខេត្ត រៀបចំការប្រកាសចូលកាន់តំណែង ប្រធានក្រុមប្រឹក្សា មេឃុំចៅសង្កាត់ ជំទប់ ចៅសង្កាត់រង សមាជិកក្រុមប្រឹក្សាឃុំ/សង្កាត់ ជំនួសតំណែងទំនេរ ផ្អែកតាមប្រកាសរបស់ក្រសួងមហាផ្ទៃ។
តាមការប្រកាសរបស់ក្រសួងមហាផ្ទៃ កាលពីថ្ងៃទី៧ខែធ្នូ លោកសក់ សេដ្ឋា រដ្ឋលេខាធិការក្រសួងមហាផ្ទៃ បានឱ្យដឹងថា ផ្អែកលើលទ្ធផលនៃការបែងចែកអាសនៈក្រុមប្រឹក្សាឃុំ សង្កាត់ ដែលនៅទំនេររបស់ គណៈកម្មាធិការជាតិរៀបចំការបោះឆ្នោត ក្រសួងមហាផ្ទៃនឹងចេញប្រកាសទទួលស្គាល់សមាសភាពប្រធានក្រុមប្រឹក្សា មេឃុំ ចៅសង្កាត់ ជំទប់ ចៅសង្កាត់រង និងសមាជិកក្រុមប្រឹក្សាឃុំ សង្កាត់ទាំងនោះ ស្របតាមច្បាប់ និងគោលការណ៍នីតិវិធីដែលបានកំណត់។ ដើម្បីឱ្យការរៀបចំប្រកាសចូលកាន់តំណែង របស់ប្រធានក្រុមប្រឹក្សា មេឃុំ/ចៅសង្កាត់ ជំទប់ ចៅសង្កាត់រង សមាជិកក្រុមប្រឹក្សាឃុំ/សង្កាត់ថ្មី ជំនួសតំណែងទំនេរ ឱ្យប្រព្រឹត្តទៅប្រកបដោយរលូន និងទាន់ពេលវេលាកំណត់ ក្រសួងមហាផ្ទៃ សូមធ្វើការណែដូចក្នុងលិខិតខាងក្រោមនេះ ៖
១)ការពិនិត្យ និងផ្ទៀងផ្ទាត់ឈ្មោះ៖ បន្ទាប់ពីទទួលបានប្រកាសក្រសួងមហាផ្ទៃស្តីពីការទទួលស្គាល់ប្រធានក្រុមប្រឹក្សា មេឃុំ ចៅសង្កាត់ ជំទប់ ចៅសង្កាត់រង និងសមាជិកក្រុមប្រឹក្សាឃុំសង្កាត់ អភិបាលរាជធានី ខេត្តនីមួយៗ ត្រូវចាត់ចែង និងណែនាំជាបន្ទាន់ដល់ទីចាត់ការគ្រប់គ្រងធនធានមនុស្ស ឲ្យធ្វើការពិនិត្យ និងផ្ទៀងផ្ទាត់ឈ្មោះប្រធានក្រុមប្រឹក្សា មេឃុំ ចៅសង្កាត់ ជំទប់ ចៅសង្កាត់រង និងសមាជិកក្រុមប្រឹក្សាឃុំសង្កាត់ ដែលមានក្នុងប្រកាសរបស់ក្រសួងមហាផ្ទៃ ជាមួយនឹងបញ្ជីលទ្ធផលជាផ្លូវការនៃការបែងចែកអាសនៈ ក្រុមប្រឹក្សាឃុំសង្កាត់ ដែលនៅទំនេររបស់គណៈកម្មាធិការជាតិរៀបចំការបោះឆ្នោត។ ករណីមានការខុសឆ្គងដោយប្រការណាមួយ ត្រូវរាយការណ៍ជាបន្ទាន់មកក្រសួងមហាផ្ទៃ។
២)ការធ្វើនីត្យានុកូលកម្ម៖ អភិបាលរាជធានី ខេត្ត ត្រូវចាត់ចែងធ្វើនីត្យានុកូលកម្មលើប្រកាសស្តីពីការទទួលស្គាល់បប្រធានក្រុមប្រឹក្សា មេឃុំ ចៅសង្កាត់ ជំទប់ ចៅសង្កាត់រង និងសមាជិកក្រុមប្រឹក្សាឃុំសង្កាត់ រួចបញ្ជូនទៅរដ្ឋបាលក្រុង ស្រុក ខណ្ឌ និងឃុំ សង្កាត់ ក្នុងដែនសមត្ថកិច្ចរបស់ខ្លួន ដើម្បីចែកជូនដល់សាមីខ្លួន និងអង្គភាពពាក់ព័ន្ធនានា ដើម្បីចាត់ចែងតាមនីតិវិធី និងតម្កល់ទុកជាឯកសារ។
៣)ការប្រកាសចូលកាន់មុខតំណែង៖ អភិបាលរាជធានី ខេត្ត ត្រូវណែនាំដល់រដ្ឋបាលក្រុង ស្រុក ខណ្ឌ ដើម្បីសម្របសម្រួល និងគាំទ្រដល់ក្រុមប្រឹក្សាឃុំ សង្កាត់នីមួយៗ ឲ្យរៀបចំការប្រកាសចូលតំណែងប្រធានក្រុមប្រឹក្សា មេឃុំ ចៅសង្កាត់ ជំទប់ ចៅសង្កាត់រង និងសមាជិកក្រុមប្រឹក្សាឃុំ សង្កាត់ដែលក្រសួងមហាផ្ទៃចេញប្រកាសទទួលស្គាល់ឲ្យបានទាន់ពេលវេលា។ ការប្រកាសចូលកាន់តំណែងនេះ ត្រូវធ្វើឡើងនៅក្នុងកិច្ចប្រជុំសាមញ្ញ ឬកិច្ចប្រជុំវិសាមញ្ញរបស់ក្រុមប្រឹក្សាឃុំសង្កាត់សាមី។ ស្មៀនឃុំ សង្កាត់ ត្រូវធ្វើជាសេនាធិការឲ្យរដ្ឋបាលឃុំ សង្កាត់របស់ខ្លួនក្នុងការរៀបចំរបៀបវារៈ ខ្លឹមសារនៃកិច្ចប្រជុំ និងលិខិតអញ្ជើញសមាសភាពប្រធានក្រុមប្រឹក្សា មេឃុំ ចៅសង្កាត់ ជំទប់ ចៅសង្កាត់រង និងសមាជិកក្រុមប្រឹក្សាឃុំ សង្កាត់ ផ្អែកតាមឈ្មោះក្នុងប្រកាសរបស់ក្រសួងមហាផ្ទៃ។ លិខិតអញ្ញើញប្រជុំ ត្រូវចុះហត្ថលេខាដោយមេឃុំ ចៅសង្កាត់ ក្នុងមុខតំណែង ជំទប់ ចៅសង្កាត់រងដែលកំពុងបំពេញតួនាទីជាមេឃុំ ចៅសង្កាត់ស្តីទីនៅតាមរដ្ឋបាលឃុំ សង្កាត់នីមួយៗ៕ ដោយ៖បញ្ញាស័ក្តិ
