ករណីអ្នកនាងខ្ញុង ដែលបានចេញវីដេអូឃ្លីបត្អូញត្អែរថា នៅកំពង់សោមឥឡូវនេះ ពិបាករកផ្ទះសំណាក់គេងណាស់ ហើយបើនិយាយពីសណ្ឋាគារវិញតម្លៃក្នុង១យប់រហូតជាង 100$ បានកំពុងក្លាយជាប្រធានបទដ៏ក្តៅគគុកនៅលើបណ្តាញសង្កមហ្វេសប៊ុក ។ ទោះយ៉ាងណា ការបញ្ចេញមតិលើកឡើងយ៉ាងនេះរបស់អ្នកនាងខ្ញុង ត្រូវបានមហាជនយ៉ាងច្រើនគាំទ្រ ខណៈមនុស្សមួយចំនួនតូចទៀត បានសម្តែងការមិនពេញចិត្តតែម្តង ។
ស្របពេលដែលមានមនុស្សប៉ុន្មាននាក់ បានចេញវីដេអូប្រតិកម្មខ្លាំងៗ ទៅកាន់អ្នកនាងខ្ញុង ហើយធ្វើឲ្យមនុស្សយ៉ាងច្រើនទៀតដែលគាំទ្រខ្ញុង បានផ្ទុះកំហឹងវាយបកទៅកាន់ពួកគេវិញយ៉ាងសាហាវរហូតមកទល់ពេលនេះនោះ ថ្មីៗនេះ ស្ត្រីម្នាក់ដែលជាម្ចាស់ផ្ទះសំណាក់ដែលមានស្លាកយីហោឈ្មោះថា «ផ្ទះសំណាក់អ៊ឹងវិសាល» មានទីតាំងស្ថិតនៅជាប់របងស្នងការខេត្តព្រះសីហនុ ក៏បានចេញវីដេអូបដិសេធចំពោះរឿងកំពុងផ្ទុះកក្រើកនេះ ។
បងស្រីម្ចាស់ផ្ទះសំណាក់អ៊ឹងវិសាល បានបញ្ជាក់ថា ផ្ទះសំណាក់របស់នាងមាន ២៨ បន្ទប់ ដោយក្នុងនោះមានបន្ទប់តម្លៃពី ១៥ ទៅ ២០ ដុល្លារ ប៉ុណ្ណោះ ពុំមានដល់ថ្នាក់ជាង 100$ ដូចគេនិយាយតៗគ្នាបែបនេះទេ ។ បងស្រីរូបនេះនៅបានបន្តថា ការដែលគេនិយាយបែបនេះ គឺមកពីគេមិនចង់ឲ្យបងប្អូនមកលេងកំពង់សោម ខណៈបុណ្យចូលឆ្នាំសកលជិតមកដល់ ហេតុនេះ សូមបងប្អូនអញ្ជើញមក ផ្ទះសំណាក់អ៊ឹងវិសាល រីករាយនឹងស្វាគមន៍ ៕ ដោយ៖ ឧត្តម