រឿងរ៉ាវទាក់នឹងតារាកំប្លែងដ៏ល្បីឈ្មោះអ្នកនាងខ្ញុង ចេញវីដេអូនិយាយត្អូញត្អែរអំពីការដែលពិបាកក្នុងស្វែងរកផ្ទះសំណាក់គេង និងជាពិសេសតម្លៃសណ្ឋាគារថ្លៃកប់ពពក នៅក្រុងកំពង់សោម ដែលមនុស្សសាមញ្ញធម្មតាមិនអាចមានលទ្ធភាពស្នាក់នៅបាននោះ បានបង្កការវែកញែកផ្អើលពេញផ្ទៃប្រទេសតែម្តង ។
ក្រោយពីអ្នកនាងខ្ញុង បានចេញវីដេអូនិយាយការពិតនូវអ្វីដែលនាងជួបផ្ទាល់នៅឯកំពង់សោម ជាពិសេសអំពីតម្លៃសណ្ឋាគារស្នាក់នេះរហូតដល់ជាង 100$ ជាហេតុធ្វើឲ្យមនុស្សមួយចំនួន ក៏ដូចជាម្ចាស់ផ្ទះសំណាក់នៅទីនោះ បានចេញមុខប្រតិកម្ម ។ ប៉ុន្តែ ទោះជាយ៉ាងណា មានមហាជនជាច្រើនទៀតបានគាំទ្រយ៉ាងពេញទំហឹង ចំពោះអ្វីដែលតារាកំប្លែងស្រីរូបនេះបានលើកឡើង ។
ដោយឡែក រដ្ឋមន្ត្រីក្រសួងព័ត៌មានឯកឧត្តម ខៀវ កញ្ញារិទ្ធ ក៏បានបង្ហោះសារមុននេះបន្តិចដែរ ដែលមានខ្លឹមសារដូច្នេះថា៖ «ឃើញគេឈ្លោះគ្នារឿងតម្លៃផ្ទះសំណាក់នៅក្រុងកំពង់សោម ហេតុអីខាងមន្ទីរទេសចរណ៍មិននិយាយអីបកស្រាយសោះអញ្ចឹង?» ៕ ដោយ៖ ឧត្តម