ភ្នំពេញ ៖ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន នៅថ្ងៃទី២៧ ខែ វិច្ឆិកា ឆ្នាំ ២០១៨នេះ បានលើកឡើង ជាចម្ងល់ និងចោទជាសំណួរ លើបណ្តាញសង្គមហ្វេសប៊ុក របស់លោកថា ហេតុអ្វីមន្ទីរទេសចរណ៍ ខេត្តព្រះសីហនុ មិនចេញមុខបកស្រាយ ក្រោយមានការប៉ះទង្គិចសម្ដីគ្នា ជាបន្តបន្ទាប់ ជុំវិញបញ្ហាតម្លៃផ្ទះសំណាក់។
លោករដ្ឋមន្ត្រីក្រសួងព័ត៌មាន បានលើកឡើងបែបនេះ ក្រោយពីសាធារណជន ភ្ញៀវទេសចរ ក្រុមអាជីវករ និងតារាកំប្លែង នាង ខ្ញុង បានប៉ះសម្ដីគ្នា និងធ្វើការរិះគន់គ្នាទៅវិញទៅមក ជុំវិញបញ្ហាតម្លៃផ្ទះសំណាក់ នៅខេត្តព្រះសីហនុ ។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានសរសេរនៅលើបណ្ដាញទំនាក់ទំនង សង្គមហ្វេសប៊ុកថា” ឃើញគេឈ្លោះគ្នា រឿងតម្លៃផ្ទះសំណាក់ នៅក្រុងកំពង់សោម ហេតុអី ខាងមន្ទីរទេសចរណ៍ មិននិយាយអីបកស្រាយ សោះអញ្ចឹង”។
សូមរំលឹកថា ប្រតិកម្មនានា បានធ្លាក់មកជាបន្តបន្ទាប់ ក្រោយពីតារាកំប្លែង អ្នកនាង ស្រេង សុកាន់ដា ហៅ ខ្ញុង នៅពេលថ្មីៗនេះបានបង្ហោះ នូវវីដេអូមួយរៀបរាប់ និងចោទប្រកាន់ថា ផ្ទះសំណាក់ មានតម្លៃថ្លៃហួស៕ ដោយ ៖ បញ្ញាស័ក្តិ
