ខេត្តព្រះសីហនុ ៖ អនុប្រធានសាខាកាំកុងត្រូលខេត្តព្រះសីហនុ លោក ជា ប៉ិច កាលពីព្រឹកថ្ងៃទី២៧ ខែវិច្ឆិកា ឆ្នាំ២០១៨ បានដឹកនាំមន្ត្រីជំនាញកាំកុងត្រូល ដោយសហការជាមួយមន្ត្រីសាលាខេត្ត និងមន្ត្រីពាក់ព័ន្ធ បានបន្តចុះត្រួតពិនិត្យគុណភាពម្ហូបអាហារ ដែលអាជីវករដាក់លក់នៅក្នុងផ្សារលើក្រុងព្រះសីហនុ។
នាឱកាសនោះដែរ លោក ជា ប៉ិច បានប្រកាសថា ចាប់ពីពេលនេះតទៅ មន្ត្រីកាំកុងត្រូល និងដាក់កម្លាំងប្រចាំការជាអចិន្ត្រៃយ៍ នៅក្នុងផ្សារលើក្រុងព្រះសីហនុ ចាប់ពីថ្ងៃចន្ទ័ដល់ថ្ងៃសៅរ៍ ដើម្បីឃ្លាំមើល និងទប់ស្កាត់ការដាក់លាយសារធាតុគីមីហាមឃាត់ក្នុងម្ហូបអាហារ ដែលនាំឱ្យប៉ះពាល់ដល់សុខភាពអ្នកប្រើប្រាស់។
លោកបន្តថា សកម្មភាពខាងលើនេះ នឹងបន្តចុះអនុវត្តដូចគ្នា ទៅកាន់ទីផ្សារធំៗមួយចំនួនទៀត ក្នុងខេត្តព្រះសីហនុ នាពេលខាងមុខទៀត។ ត្រង់ចំណុចនេះ អនុប្រធានសាខាកាំកុងត្រូលខេត្តព្រះសីហនុ លោក ជា ប៉ិច បានអះអាងថា ចំណីអាហារ ឬម្ហូបអាហារចម្រុះ ដែលបានពិនិត្យនៅក្នុងផ្សារលើ កាលពីថ្ងៃម្សិលមិញនេះ មន្ត្រីជំនាញរកមិនឃើញមានដាក់លាយសារធាតុគីមីហាមឃាត់នោះទេ។
ផ្តើមពីបញ្ហានេះ មន្ត្រីសាខាកាំកុងត្រូលខេត្តព្រះសីហនុ បានអំពាវនាវដល់ប្រជាពលរដ្ឋ ពិសេសក្រុមអាជីវករ ឱ្យបន្តសហការជាមួយមន្ត្រីជំនាញកាំកុងត្រូល ឱ្យបានច្រើនថែមទៀត ប្រយោជន៍ដើម្បីឈានទៅជួយរក្សាសុខភាពប្រជាពលរដ្ឋ ឱ្យមានសុខភាពល្អទាំងអស់គ្នា៕ ដោយ ៖ ដែន សីមា