តៃកុងយន្តហោះម្នាក់ (Pilot) នៅក្នុងប្រទេសអូស្ត្រាលី កំពុងស្ថិតក្រោមការស៊ើបអង្កេត បន្ទាប់ពីគាត់ដេកលក់ពេលកំពុងហោះហើរ ហើយបណ្តាលឲ្យយន្តហោះទៅហួសគោលដៅ ៤៦គីឡូម៉ែត្រ។
អ្នកបើកយន្តហោះម្នាក់នោះ បានដេកលក់ ហើយបណ្តាលឲ្យយន្តហោះ ហោះហួសកោះ King Island ដែលជាកន្លែងគោលដៅចុះចត។
យន្តហោះទេសចរណ៍ប្រភេទ Piper PA-31 បានធ្វើដំណើរពីទីក្រុង Devonport ក្នុងគោលដៅឆ្ពោះទៅកាន់កោះ King Island ប៉ុន្តែស្រាប់តែទៅហួសគោលដៅទៅវិញ ដោយសារអ្នកបញ្ជាដេកលង់លក់។ ប្រតិបត្តិការហោះហើរនោះគ្រប់គ្រងដោយក្រុមហ៊ុនអាកាសចរណ៍ Vortex Air។
បន្ទាប់ពីមានការដេកលក់របស់តៃកុង និងហោះហួសគោលដៅ ក្រុមហ៊ុនបានចេញសេចក្តីថ្លែងការណ៍មួយ ដោយបានបញ្ជាក់ថា ការហោះហើរនោះជាការបញ្ជាលើកដំបូងរបស់តៃកុងនោះ បន្ទាប់ពីគាត់ខកខានធ្វើអស់ជាយូរ។
ក្រុមហ៊ុនបានព្យាយាមបញ្ជាក់ថា ការហោះហើររបស់ពួកគេគឺមានបទពិសោធន៍គ្រប់គ្រាន់ និងបានធ្វើការហោះហើរជាច្រើនលើកច្រើនសារ ដោយគ្មានហេតុការណ៍អាក្រក់ណាមួយកើតឡើងឡើយ។
បើតាមទិន្នន័យចាប់ការហោះហើរនោះកាលពីថ្ងៃទី ៨ ខែវិច្ឆការ បានបង្ហាញថា យន្តហោះទេសចរណ៍នោះបានចាកចេញពីទីក្រុង Devonport នៅម៉ោង ៦និង២១នាទីព្រឹក ប៉ុន្តែបែរជាហោះហួសកោះ King Island និងបានធ្វើដំណើរត្រឡប់ក្រោយវិញ ហើយចុងបញ្ចប់បានដល់គោលដៅនៅម៉ោង ៧និង២១នាទីព្រឹកដដែល៕ សុភ័ក្ត្រ
ប្រភព៖ news.sky