កម្ពុជា-វៀតណាម ៖ ឯកឧត្តម ឧត្តមនាវីឯក អ៊ុក សីហា មេបញ្ជាការរងកងទ័ពជើងទឹក មេបញ្ជាការមូលដ្ឋានសមុទ្រ កាលពីថ្ងៃទី២៧ ខែវិច្ឆិកា ឆ្នាំ២០១៨ បានដឹកនាំគណៈប្រតិភូក្រុមការងារកងទ័ពជើងទឹកមូលដ្ឋានសមុទ្រ ព្រមទាំងអង្គភាព និងស្ថាប័នពាក់ព័ន្ធមួយ ចំនួនទៀត បានអញ្ជើញទៅចូលរួមក្នុងកិច្ចប្រជុំ ដកបទពិសោធន៍លើកទី២៦ ស្តីពីការងារល្បាតរួមលើកទី៥១-៥២ នៅបញ្ជាការដ្ឋានតំបន់៥ កងទ័ពជើងទឹកប្រជាជនវៀតណាម។
មន្ត្រីកងទព័ជើងទឹកកម្ពុជាបានឱ្យដឹងថា ដោយអនុវត្តន៍តាមកិច្ចព្រមព្រៀង របស់ក្រសួងការពារជាតិ អគ្គមេបញ្ជាការប្រទេសទាំងពីរ និងផ្អែកតាមបទបញ្ជា និងសច្ចាប័ន របស់មេបញ្ជាការកងទ័ពជើងទឹកប្រទេសទាំងពីរ មូលដ្ឋានសមុទ្រ និងតំបន់៥ បានចាត់តាំងសហការណ៍អនុវត្តការងារល្បាតរួមលើកទី៥១ និងលើកទី៥២ ឆ្នាំ២០១៨ ក្នុងតំបន់ទឹកប្រវត្តិសាស្ត្រ ដោយទទួលបានលទ្ធផលយ៉ាងល្អប្រសើរ នូវសកម្មភាពមួយចំនួនដូចជា ៖ សកម្មភាពហ្វឹកហ្វឺនរុករកសង្គ្រោះលើផ្ទៃសមុទ្រ ហ្វឹកហ្វឺនទង់សញ្ញាដៃ ភ្លើងសញ្ញាអន្តរ ជាតិ ទទួល និងផ្សាយតាមរលកវិទ្យុ ជាភាសាកម្ពុជា វៀតណាម និងអង់គ្លេស ដើម្បីលើកកំពស់សមត្ថភាពយល់ដឹង ដល់នាយនាវី នាយនាវីរង និងពលនាវិកប្រទេសទាំងពីរ។
មន្ត្រីកងទព័ជើងទឹកកម្ពុជាដដែលបន្តថា តំបន់ទឹកប្រវត្តិសាស្ត្រជាតំបន់មួយហ៊ុំព័ទ្ធ ទៅដោយឆ្នេរ កោះ ទីប្រជុំកោះ ដែលពាក់ព័ន្ធផ្ទាល់ដល់សន្តិសុខជាតិ ប្រទេសនីមួយៗ ហើយក៏ជាតំបន់សំបូរណ៌ទៅដោយនាវា និងទូកនេសាទ របស់ប្រជាពលរដ្ឋប្រទេសទាំងពីរធ្វើដំណើរឆ្លងកាត់ទៅមកប្រកបអាជីវកម្មរកស៊ីតាមធម្មតាជាប្រពៃណីយ៍។
មន្ត្រីដដែល ឱ្យដឹងថា ឆ្លងតាមរយៈការងារល្បាតរួមចំនួន ៥២លើក កិច្ចប្រជុំដកបទពិសោធន៍ ២៦លើក កងទ័ពជើងជើងទឹក និងស្ថាប័នជំនាញប្រទេសទាំងពីរ បាន ចែករំលែកបទពិសោធន៍ ចែករំលែកព័ត៌មាន បានទាន់ពេលវេលា សហការដោះស្រាយ នូវរាល់សភាពការណ៍ ដែលកើតមានឡើង ដោយឈរលើស្មារតីសាម្គីភាព មិត្តភាព កិច្ចសហប្រតិបត្តិការល្អ មានជំនឿទុកចិត្តយោគយល់គ្នាទៅវិញទៅមក រក្សាបាននូវសន្តិសុខ សុវត្ថិភាព សណ្តាប់ធ្នាប់ក្នុងតំបន់ព្រំដែនទឹក បំរើឱ្យផលប្រយោជន៍ប្រទេសទាំងពីរ៕ ដោយ៖ ដែន សីមា
