ភ្នំពេញ ៖ សារលិខិត សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ផ្ញើជូនជនរួមជាតិ ក្នុងឱកាសដែល ល្ខោនខោលរបស់កម្ពុជាត្រូវបានដាក់បញ្ចូលជាផ្លូវការនៅក្នុងបញ្ជីបេតិកភ័ណ្ឌអរូបីយនៃមនុស្សជាតិ នៅទីក្រុងព័រល្វីស សាធារណរដ្ឋម៉ូរីស នៅថ្ងៃទី ២៨ វិច្ឆិកា ឆ្នាំ ២០១៨នេះ។
ដើម្បីអបអរសាទរព្រឹត្តការណ៍ជាប្រវត្តិសាស្ត្រនេះ សម្ដេចតេជោ ហ៊ុន សែន បានណែនាំដល់គ្រប់ក្រសួង ស្ថាប័ន ថ្នាក់ជាតិថ្នាក់ ក្រោមជាតិ និងជនរួមជាតិកម្ពុជាគ្រប់រូប សូមចូលរួមអបអរសាទរ វាយគង ទូងស្គ ទះប៉ោត គោះត្រដោក នៅម៉ោង១០យប់ នាថ្ងៃទី ៣០ ខែវិច្ឆិកា ឆ្នាំ២០១៨ នៅទូទាំងប្រទេសកម្ពុជា។
នៅថ្ងៃទី ២៨ ខែវិច្ឆិកាឆ្នាំ ២០១៨នេះ នៅក្នុងកិច្ចប្រជុំលើកទី១៣ នៃគណៈកម្មការអន្តររដ្ឋាភិបាល សម្រាប់ការការពារបេតិកភណ្ឌវប្បធម៌អរូបី របស់អង្គការយូណេស្កូ នៅទីក្រុងព័រល្វី សាធារណរដ្ឋម៉ូរីស បានអនុម័តយល់ព្រមចុះល្ខោនខោល ចូលក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិតាមសេចក្តីសម្រេច Decision 13.COM.10.a.3 ។
ការសម្រេចរបស់គណៈកម្មការអន្តររដ្ឋាភិបាល នៃអង្គការយូណេស្កូនៅពេលនេះ គឺជាមោទនភាពជាតិដ៏ធំធេងថ្មីមួយទៀត ដែលកើតចេញពីការខិតខំប្រឹងប្រែង របស់រាជរដ្ឋាភិបាលកម្ពុជា និងការខិតខំពុះពារ ចូលរួមយ៉ាងសកម្មពីថ្នាក់ដឹកនាំ មន្ត្រីរាជការនៃក្រសួងវប្បធម៌ និងវិចិត្រសិល្បៈ ដោយមានកិច្ចសហការគាំទ្រ យ៉ាងផុសផុលពីសិល្បករ អង្គការសមាគម សង្គមស៊ីវិល ក្នុងវិស័យសិល្បៈវប្បធម៌ និងការជួយគាំទ្រលើកទឹកចិត្ត ពីមហាជន និងស្រទាប់យុវជនកម្ពុជា ទាំងមូលទើបយើង បានទទួលនូវលទ្ធផលជោគជ័យ នៃការដាក់បញ្ចូលនូវ ល្ខោនខោល នៅក្នុងបញ្ជីបេតិកភណ្ឌវប្បធម៌អរូបី នៃមនុស្សជាតិដ៏ត្រចះត្រចង់នេះ។ បេតិកភណ្ឌវប្បធម៌រូបី របស់ជាតិយើង បានរួមចំណែកធ្វើឲ្យកេរ្តិ៍ឈ្មោះ របស់ព្រះរាជាណាចក្រកម្ពុជា ល្បីរន្ទឺលើឆាកអន្តរជាតិ ព្រមទាំងជាតួអង្គមួយដ៏លេចធ្លោ នៅលើវេទិកាបេតិកភណ្ឌពិភពលោកថែមទៀតផង។
សូមបងប្អូនប្រជាពលរដ្ឋចូលរួម គាំទ្រថែរក្សាការពារ និងលើកតម្កើងតម្លៃបេតិកភណ្ឌវប្បធម៌ជាតិយើង។
សម្តេចតេជោ សំណូមពរផងដែរ ដល់បណ្ដាញផ្សព្វផ្សាយទាំងអស់ ចូលរួមសហការផ្សព្វផ្សាយព្រឹត្តិការណ៍ជាប្រវត្តិសាស្ត្រនេះ ឱ្យបានទូលំទូលាយ និង អធិកអធមជាទីបំផុត ។
ប្រមុខរាជរដ្ឋាភិបាលកម្ពុជា មានប្រសាសន៍បន្តថា ក្នុងឱកាសដ៏មហាប្រសើរនេះ សម្តេចតេជោ សូមព្រះរាជានុញ្ញាតសម្តែងនូវអំណរព្រះគុណដ៏ជ្រាលជ្រៅបំផុត ថ្វាយព្រះករុណាព្រះមហាក្សត្រ សម្តេចព្រះបរមនាថ នរោត្តម សីហមុនី ដែលព្រះអង្គតែងតែប្រោសប្រទាននូវការគាំទ្រដ៏ពេញទំហឹងជានិច្ចចំពោះកិច្ចប្រឹងប្រែងរបស់រាជរដ្ឋាភិបាល ដើម្បីបុព្វហេតុជាតិ និង មាតុភូមិយើង ។
ជាមួយគ្នានេះ សម្តេចតេជោ ហ៊ុន សែន សូមថ្លែងអំណរគុណជាពិសេសផងដែរ ជូនចំពោះបណ្ដាប្រទេសជាមិត្ត អង្គការយូណេស្កូ និង ឥស្សរជន ទាំងឡាយដែលបានទទួលស្គាល់នូវតម្លៃដ៏អស្ចារ្យជាសកល នៃល្ខោនខោល របស់ព្រះរាជាណាចក្រកម្ពុជា ហើយបានគាំទ្រចូលរួមសំណើរបស់រាជរដ្ឋាភិបាលកម្ពុជា ក្នុងការដាក់ស្នាដៃសិល្បៈដ៏វិសេសវិសាលរបស់កម្ពុជា នោះ ទៅក្នុងបេតិកភណ្ឌវប្បធម៌អរូបីនៃមនុស្សជាតិ ។
ចំណែកផេកហ្វេសប៊ុករបស់ព្រះបរមរាជវាំង Royal du Cambodge បាននអបអរសាទរការសម្រចដាក់បញ្ចូល ល្ខោនខោល នៃព្រះរាជាណាចក្រកម្ពុជា ចូលក្នុងបញ្ជីបេតិកភណ្ឌវប្បធម៌អរូបី នៃមនុស្សជាតិ របស់អង្គការយូណេស្កូ នៅថ្ងៃពុធ ទី២៨ ខែវិច្ឆិកា ឆ្នាំ២០១៨ ។ មោទនាភាពជាតិខ្មែរ៕ ដោយ ៖ កូឡាប
