ភ្នំពេញ ៖ ប្រតិភូបញ្ជាការដ្ឋានយោធានៃរដ្ឋធានីហាណួយ សាធារណៈរដ្ឋសង្គមនិយមវៀតណាម ដឹកនាំដោយលោកឧត្តមសេនីទោង្វៀង ថេកេត ប្រធាននយោបាយនៃបញ្ជាការដ្ឋានយោធាទីក្រុងហាណូយ និងគណៈប្រតិភូ បានចូលជួបសំដែងការគួរសមជាមួយលោក ឃួង ស្រេង អភិបាលនៃគណៈអភិបាលរាជធា នីភ្នំពេញនាឱកាសដែលរាជធានីភ្នំពេញ ធ្វើជាម្ចាស់ផ្ទះនៃកិច្ចប្រជុំប្រចាំឆ្នាំលើកទី៦ រវាងបញ្ជាការដ្ឋានយោធាប្រទេសទាំង៣ភ្នំពេញ.ហាណូយ.វៀងចន្ទន៍ ដោយផ្តោតទៅលើការពង្រឹងចំណងសាមគ្គីភាព មិត្តភាពជាប្រពៃណីនៃប្រទេសទាំង៣ ប្រជាជនទាំង៣ និងកងទព័ទាំង៣ឲ្យកាន់តែរឹងមាំ ស្ថេរភាពនិងយូអង្វែង។
លោកឃួង ស្រេង បានថ្លែងថា ៖ ចំណងមិត្តភាពនិងកិច្ចសហប្រតិបត្តិការរវាងប្រទេសជិតខាងយើងទាំង២គឺមានតំលៃ និងមានផលប្រយោជន៍សម្រាប់ប្រជាជន និងប្រទេសយើងទាំង២ ក្នុងការជួយគ្នាទៅវិញទៅមក ព្រោះនៅពេលយើងមានបញ្ហា គឺមានតែប្រទេសជិតខាងនឹងហើយ ដែលជួយយើងមុនគេ ពិសេសមិត្តវៀតណាម បានជួយកម្ពុជាក្នុងការរំដោះប្រជាជនកម្ពុជា ចេញផុតពីរបបប្រល័យពូជសាសន៍ប៉ុលពត។ នេះជាការពិតដែលកម្ពុជា តែងបានប្រាប់ទៅ យុវវ័យជំនាន់ក្រោយ មិនត្រូវភ្លេចពីគុណបំណាច់នេះ។
លោកង្វៀង ថេកេត បានលើកឡើងថា ភាពសប្បាយរីករាយ និងការអភិវឌ្ឍរបស់ប្រជាជនកម្ពុជា គឺជាភាពសប្បាយរីករាយរបស់រដ្ឋ,ប្រជាជន និងកងទ័ពវៀតណាមដែរ។ លោកបន្តថា កម្ពុជា,វៀតណាម,ឡាវមានភូមិផងរបងជាមួយគ្នានៅពេលមានបញ្ហា យើងត្រូវ រួមគ្នាដោះស្រាយដោយសន្តិវិធី។
នៅព្រឹកថ្ងៃដដែលនេះដែរ គណៈប្រតិភូកងទ័ពឡាវ ដឹកនៃដោយវរសេនីយ៍ឯកស៊ី ថាក់វីសៃ មេបញ្ជាការ បញ្ជាការដ្ឋានកងទ័ពរដ្ឋធានីវៀងចន្ទន៍ ក៏បានចូលជួបសំដែងការគួសម ជាមួយលោកឃួង ស្រេងនៅរដ្ឋបាលរាជធានីភ្នំពេញ។
លោក អភិបាលបានរំលឹកឡើងវិញចំណងមិត្តភាពសាម គ្គីភាពកម្ពុជា.ឡាវ ដែលមានវប្បធម៌ប្រពៃណីទំនៀមទម្លាប់ស្រដៀងគ្នា នឹងជាមិត្តចាស់របស់កម្ពុជា។ យើងបានដោះស្រាយបញ្ហាប្រឈម ការវិវាទនានាតាមបណ្តោយព្រំដែនប្រកបដោយមិត្តភាព សាមគ្គីភាពនិងមានផលប្រយោជន៍ទៅវិញទៅមកដោយស្មើភាព។
លោកស៊ី ថាក់វីសៃ បានលើកឡើងពីកិច្ចប្រជុំប្តូរវេន តាមរបៀបវិលជុំ១ឆ្នាំម្តង រវាងបញ្ជាការដ្ឋានទីក្រុងទាំង៣ភ្នំពេញ.ហាណូយ.វៀងចន្ទន៍ ដោយបានឯកភាពគ្នាលើបញ្ហាជាច្រើន និងបន្តកិច្ចសហប្រតិបត្តិការគ្នាទាំង៣ ទីក្រុង ហើយនឹងដោះស្រាយបញ្ហាជាមួយគ្នាក្នុងក្របខ័ណ្ឌសន្តិវិធី ហើយបើមានបញ្ហាណាមួយកើតឡើង យើងរួមគ្នាដោះស្រាយ៕ ដោយ ៖ បញ្ញាស័ក្តិ