ភ្នំពេញ ៖ ប្រទេសកាណាដាសម្រេចបន្តផ្តល់វគ្គបណ្តុះបណ្តាលជំនាញការពារព្រំដែន ដល់មន្ត្រីកម្ពុជាឡើងវិញ ក្រោយផ្អាកមួយរយៈនិងរំពឹងថាទំនាក់ទំនងរវាងកម្ពុជានិងប្រទេសកាណាដា កាន់តែរីកចំរើនបន្ថែមទៀត ។
ថ្លែងនៅក្នុងកិច្ចជំនួបជាមួយសម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ នារសៀលថ្ងៃទៅ២៧ ខែវិច្ឆិកា ឆ្នាំ២០១៨នេះ នៅទីស្តីការក្រសួង លោកស្រី Donica Pottie ឯកអគ្គរដ្ឋទូតកាណាដាប្រចាំនៅកម្ពុជា បានលើកឡើងថា ប្រទេសកាណារីករាយ និងការជួយផ្តល់វគ្គបណ្តុះបណ្តាល ជំនាញការពារព្រំដែន ដល់កម្ពុជាឡើងវិញ បន្ទាប់ពីមូលនិធិដែលបានជួយលើវិស័យនេះត្រូវបានផ្អាកមួយរយៈនោះ។
ទាក់ទងនិងការលើកឡើងរបស់លោកស្រី Donica Pottie សម្តេចក្រឡាហោម ស ខេង ក៏បានសម្តែងការស្វាគមន៍ ចំពោះប្រទេសកាណាដា ដែលបានសម្រេចបន្តផ្តល់ជំនួយផ្នែកនេះ ឡើងវិញដល់កម្ពុជា ហើយសម្តេចបានប្រាប់ដល់លោកស្រី Donica Pottie ថាលទ្ធិប្រជាធិបតេយ្យកម្ពុជា គ្មានការប្រែប្រួលនោះទេ កម្ពុជាកំពុងអនុវត្តអ្វីគ្រប់យ៉ាង គឺស្របតាមរដ្ឋធម្មនុញ្ញ ដោយរៀបចំការបោះឆ្នោតជាទៀងទាត់ផងដែរ។
សម្តេចបានប្រាប់ដល់លោកស្រីឯកអគ្គរដ្ឋទូតបន្ថែមថា ពលរដ្ឋកម្ពុជា បានទៅបោះឆ្នោតកាលពីខែកក្កដា ឆ្នាំ២០១៨កន្លងទៅនេះ យ៉ាងច្រើនដែលនេះបញ្ជាក់ឲ្យឃើញ យ៉ាងច្បាស់ថាពលរដ្ឋលើសលុប បានប្រើប្រាស់សិទ្ធិរបស់ពួកគាត់តាមច្បាប់កំណត់និងតាមលទ្ធិប្រជាធិបតេយ្យពិតប្រាដកនោះ។
ដោយឡែកសម្រាប់អង្គការសង្គមស៊ីវិល សម្តេចក្រឡាហោម ស ខេងបានប្រាប់ដល់លោកស្រី Donica Pottie ថារាជរដ្ឋាភិបាលកម្ពុជាបានលើកកម្ពស់កិច្ចសហប្រតិបត្តិការ រវាងរាជរដ្ឋាភិបាលជាមួយសមាគម និងអង្គការក្រៅរដ្ឋាភិបាល ពិសេសការបង្កើតក្រុមការងារពិគ្រោះយោបល់ និងការមិនតម្រូវឲ្យជូនដំណឹង មកអាជ្ញាធរមុនពេលធ្វើសកម្មភាព៕ ដោយ ៖ បញ្ញាស័ក្តិ
