កាលពីចុងសប្ដាហ៍នេះ វីដេអូឃ្លីបមួយបានផ្សព្វផ្សាយយ៉ាងទូលំទូលាយនៅលើ WeChat និង Twitter ដែលអះអាងថា បុរសបរទេសម្នាក់ត្រូវបានគេវាយរហូតស្លាប់ នៅតាមដងផ្លូវមួយកន្លែងក្នុងប្រទេសចិន ដោយឪពុក និងបងប្រុសរបស់មិត្តស្រីរបស់គាត់ដែលមិនពេញចិត្ត ។
វីដេអូឃ្លីបនេះត្រូវបានផ្សព្វផ្សាយជាសាធារណៈជាលើកដំបូង ដោយអ្នកកាសែតប៉ាគីស្ថានឈ្មោះ Ali Arif នៅលើ Twitter ហើយបានអះអាងបង្ហាញពីការសំលាប់និស្សិតជនជាតិប៉ាគីស្ថានឈ្មោះ Usama Ahmad Khan ដែលកំពុងបន្តការសិក្សានៅ Shenyang ខេត្ត Liaoning ។ នៅក្នុងវីដេអូដ៏រន្ធត់មួយ Usama អាចត្រូវបានគេមើលឃើញកំពុងដេកផ្កាប់មុខ នៅលើផ្លូវថ្មើរជើងឆ្លងកាត់មួយ និងត្រូវបានគេវាយដំដោយមនុស្សប្រុស២នាក់ពោរពេញដោយកំហឹង ខណៈពេលដែលស្ត្រីម្នាក់ស្រែកយំ ហើយហាក់ដូចជាព្យាយាមបញ្ឈប់ការវាយដំដ៏ឃោរឃៅនោះ ។
នៅក្នុងវីដេអូរយៈពេល ៣៧ វិនាទី អ្នកថ្មើរជើង និងអ្នកបើកបរមួយចំនួន ត្រូវបានឃើញឆ្លងកាត់កន្លែងកើតហេតុ ប៉ុន្តែ ពុំបានឈប់ជួយអន្តរាគមន៍ទេ ។
បន្ទាប់វីដេអូនេះ បានរីករាលដាលនៅលើ Twitter និង WeChat វាបានបង្កឲ្យមានការផ្ទុះកំហឹងយ៉ាងខ្លាំង ក្នុងចំណោមក្រុមជនបរទេសនៅក្នុងប្រទេសចិន ដោយមនុស្សជាច្រើនបានលើករឿងរ៉ាវស្ថិតនៅពីក្រោយឃ្លីបនេះជាការពិត ។
ទោះយ៉ាងណា កាលពីថ្ងៃច័ន្ទ ការិយាល័យបរទេសរបស់ប៉ាគីស្ថាន បានធ្វើការអះអាងដោយនិយាយថា មនុស្សនៅក្នុងវីដេអូនេះ គឺពុំមែនជា Usama Ahmad Khan ទេ ដោយពួកគេបានពន្យល់ថា Usama បានស្លាប់ជំនួសឲ្យករណីនេះតាមរយៈការធ្វើអត្តឃាតខ្លួនឯងនៅ Shenyang ទីកន្លែងដែលគាត់កំពុងសិក្សានៅសកលវិទ្យាល័យ Shenyang Jianzhu ។
ការិយាល័យនេះបានប្រាប់សារព័ត៌មានថា៖ «មិនយូរប៉ុន្មាននៅពេលទទួលបានព័ត៌មាននេះ ឯកអគ្គរដ្ឋទូតប៉ាគីស្ថានប្រចាំប្រទេសចិន បានប្រគល់ភារកិច្ចនេះទៅឲ្យមន្ត្រីស្ថានទូតម្នាក់ ចុះទៅកាន់ Shenyang ។ នៅក្នុង Shenyang គាត់បានជួបនិស្សិតជាច្រើន ក៏ដូចជាអាជ្ញាធរមានសមត្ថកិច្ចផងដែរ ។ ក្នុងកិច្ចការងារនេះ គាត់នៅតែពុំអាចទាក់ទង ទៅកាន់ក្រុមគ្រួសាររបស់ជនរងគ្រោះបាននោះទេ» ។
«វីដេអូដែលបានរីករាលនៅលើប្រព័ន្ធផ្សព្វផ្សាយនេះ គឺពុំត្រឹមត្រូវទេ ឬ ក៏ពុំមានជាលោក Usama ដែរ ។ យើងក៏បានអំពាវនាវដល់ប្រព័ន្ធផ្សព្វផ្សាយទាំងអស់ ធ្វើការចុះផ្សាយដោយការប្រុងប្រយ័ត្ន ចំពោះករណីនេះ ដើម្បីជៀសវាការយល់ច្រឡំ និងបញ្ឈប់ការផ្សព្វផ្សាយព័ត៌មានក្លែងក្លាយទៀតទៅ» ។
ដូច្នេះ ប្រសិនវីដេអូនេះ មិនមែនជាជនបរទេសត្រូវបានសម្លាប់ដោយឪពុក និងបងប្រុសពោរពេញដោយកំហឹង របស់មិត្តស្រីចិនរបស់គាត់ទេ តើក្នុងវីដេអូនេះជាករណីអ្វីផ្សេង? ។ យោងតាមរបាយការណ៍ព័ត៌មានក្នុងស្រុក វីដេអូនេះបានកើតចេញពីហេតុការណ៍មួយ ដែលបានកើតឡើងនៅក្នុងទីក្រុង Fujian នៃខេត្ត Shishi ទីកន្លែងដែលស្ត្រីម្នាក់ បងប្រុស២នាក់របស់នាង និងប្តីរបស់នាង ត្រូវបានគេប្រទះឃើញធ្វើទង្វើហិង្សានេះនៅលើដងផ្លូវប៉ុណ្ណោះ ។
បុរសដែលដេកនៅលើដី ត្រូវបានគេនិយាយថា ជាប្តីរបស់ស្ត្រីម្នាក់ដែលបានបញ្ចេញកំហឹង បន្ទាប់ពីប្រពន្ធរបស់គាត់បានប្រាប់ថា នាងនឹងវិលត្រឡប់ទៅកាន់ស្រុកកំណើតរបស់នាងវិញ ហើយកំពុងកាន់កាំបិតមួយ ។ រីឯមានរបួសអ្វីផ្សេងៗ ពុំមាននរណាម្នាក់ត្រូវបានរាយការណ៍ថាត្រូវបានសម្លាប់នៅក្នុងករណីនេះដែរ ហើយគ្រួសារនោះហាក់បានផ្សះផ្សារគ្នាហើយ ។
ចំណែកអ្នកកាសែតប៉ាគីស្ថានដែលបានចែកចាយវីដេអូនេះរីករាលដំបូង ឥឡូវនេះ បានលុបចោលវាហើយ ប៉ុន្តែ ពុំបានចេញមុខសុំទោស ឬ ទាមទារដឹងព័ត៌មានបន្ថែមអំពីការស្លាប់របស់ Usama ទេ ។ ទោះយ៉ាងណា វីដេអូបង្ហាញបុរស២នាក់ព្យាយាមសម្លាប់បុរសម្នាក់ទៀត នៅតែបន្តរីករាលដាលនៅក្នុងប្រទេសចិន ៕ ដោយ៖ ឧត្តម (ប្រភព៖ shanghaiist)
