បាត់ដំបង ៖ កម្ពុជា- ថៃ បានសហការរៀបចំបង្កើត បានភូមិសគ្មានគ្រឿងញៀនចំនួន៥ហើយ គឺនៅខេត្តស្ទឹងត្រែង ចំនួន២ភូមិ និងខេត្តព្រះវិហារ ចំនួនបីភូមិ ហើយនៅពេលនេះភាគីទាំងពីរបានសិក្សារួមគ្នា ពិភាក្សាបង្កើតភូមិស គ្មានគ្រឿងញៀន រវាងភូមិអូរអន្លក់និង ភូមិសនស៊ុម។
ថ្ងៃទី២៩ ខែវិច្ឆិកា ឆ្នាំ២០១៨ ក្រុមការងារកម្ពុជាដឹកនាំដោយលោក ឧត្តមសេនីយ៍ឯក នាក់ យុទ្ធា អគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀនកម្ពុជា និងក្រុមការងារថៃ ដឹកនាំដោយលោកចារ៉ែ ប៉ុកប៉ា ទីប្រឹក្សាជាន់ខ្ពស់ទទួលការងារគ្រឿងញៀនថៃប្រចាំកម្ពុជា ដោយមានការចូលរួមពីអាជ្ញាធរភូមិអូរអន្លក់ ឃុំតាសែន ស្រុកកំរៀង ខេត្តបាត់ដំបង(កម្ពុជា) និងតំណាងក្រុមប្រឹក្សាត្រួតពិនិត្យគ្រឿងញៀនថៃតំបន់២ អាជ្ញាធរភូមិសនស៊ុម ស្រុកសយដាវ ស្រុកប៉ុងណាំរ៉ង ខេត្តចាន់បុរី (ថៃ) ដែលពិធីនេះប្រារព្ធធ្វើនេះនៅភូមិអូរអន្លក់ ឃុំតាសែន ស្រុកកំរឿង ខេត្តបាត់ដំបង។
លោក ឧត្តមសេនីយ៍ឯក ហួត សុផល្លី បានមានប្រសាសន៍ថា ការរៀបចំភូមិសគ្មានគ្រឿងញៀន នៅតាមព្រំដែន គឺទទួលបានការគាំទ្រពីប្រមុខរាជរដ្ឋាភិបាល ប្រទេសយើងទាំងពីរកម្ពុជា-ថៃ និងអាជ្ញាធរជាតិប្រយុទ្ធប្រឆាំងគ្រឿងញៀន(កម្ពុជា) ក្រុមប្រឹក្សាត្រួតពិនិត្យគ្រឿងញៀន(ថៃ)។
ក្នុងឱកាសនោះ លោក ឧត្តមសេនីយ៍ឯក នាក់ យុទ្ធា អគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀនបានប្រសាសន៍ថា ភូមិស គ្មានគ្រឿងញៀន គឺជាភូមិគ្មានការដាំដុះ រក្សាទុក ជួញដូរ ចែកចាយ និងប្រើប្រាស់គ្រឿងញៀន និងជារបាំងដ៏រឹងមាំទប់ស្កាត់បញ្ហាគ្រឿងញៀនឆ្លងកាត់ព្រំដែន ។
លោក ឧត្តមសេនីយ៍ឯក នាក់ យុទ្ធា បានថ្លែងបន្តថា ការរៀបចំយន្តការភូមិស គ្មានគ្រឿងញៀនគឺរៀបចំឲ្យមាន មានកន្លែងព្យាបាលអ្នកញៀនគ្រឿងញៀនជាសះស្បើយពីភាពញៀន មានសកម្មភាពផ្សព្វផ្សាយអប់រំ ឲ្យប្រជាពលរដ្ឋមានការយល់ដឹងពីផលប៉ះពាល់នៃគ្រឿងញៀន ទប់ស្កាត់ការចរាចរណ៍ប្រើប្រាស់គ្រឿងញៀនពិសេសក្មួយៗ ដែលចំណាកស្រុក ទៅធ្វើការនៅឆ្ងាយ អាជ្ញាធរ-មន្ត្រីអនុវត្តច្បាប់ មានសមត្ថកិច្ចជួយផ្សព្វផ្សាយអប់រំប្រជាពលរដ្ឋ អ្នកមិនទាន់ប្រើប្រាស់ បានយល់ដឹងដោយមិនទៅជិតប៉ះពាល់គ្រឿងញៀន និងជម្រុញអ្នកប្រើប្រាស់ ឲ្យទៅទទួលយកសេវាព្យាបាល នៅតាមមណ្ឌលសុខភាព ក្នុងឃុំដោយមិនគិតថ្លៃ។
លោកចារ៉េ ប៉ុកប៉ា ទីប្រឹក្សាជាន់ខ្ពស់ទទួលការងារគ្រឿងញៀនថៃប្រចាំកម្ពុជា បានមានប្រសាសន៍ថា ការចូលរួមពីគ្រប់ផ្នែកពាក់ព័ន្ធក្នុងមូលដ្ឋាន គឺជាកម្លាំងដ៏សំខាន់ ធ្វើឲ្យភូមិឃុំរបស់យើងក្លាយជាភូមិសគ្មានគ្រឿងញៀន៕ ដោយ ៖ បញ្ញាស័ក្តិ