តុលាការនៅក្នុងប្រទេសហ្វីលីពីន កាលពីថ្ងៃព្រហស្បតិ៍ (២៩ វិច្ឆិកា) បានរកឃើញមន្ត្រីប៉ូលីស ៣ នាក់ បានប្រព្រឹត្តកំហុសដ៏ធ្ងន់ធ្ងរមួយ ពីបទចោទប្រកាន់សម្លាប់សិស្សប្រុសម្នាក់ដែលពួកគេចោទថា ជាអ្នកជួញដូរគ្រឿងញៀន នៅក្នុងជាការផ្តន្ទាទោសដែលមហាជនបានលឺលើកដំបូង ស្ថិតក្រោមការបង្ក្រាបគ្រឿងញៀនដ៏សាហាវឃោរឃៅរបស់លោកប្រធានាធិបតីហ្វីលីពីន Rodrigo Duderte ។
ចៅក្រមជំនុំជម្រះក្នុងតំបន់ លោក Rodolfo Azucena Jr. បានសម្រេចថា ក្រុមមន្ត្រីប៉ូលីសរងការចោទប្រកាន់ទាំងនេះបានសម្លាប់ក្មេងប្រុសម្នាក់ឈ្មោះ Kian Loyd delos Santos ក្នុងអំឡុងប្រតិបត្តិការឆ្មក់ចូលក្នុងតំបន់អនាធិបតេយ្យមួយកន្លែងនៅតំបន់ Caloocan ក្នុងទីក្រុង Manila កាលពីឆ្នាំមុន ។
នៅក្នុងការកាត់ទោសនេះផងដែរ តុលាការក៏បានច្រានចោលការអះអាងរបស់ប៉ូលីសទាំងនោះដែលថា ក្មេងប្រុសអាយុ ១៧ ឆ្នាំ រងគ្រោះនោះបានបាញ់តដៃ ខណៈពេលរឹងទទឹងនឹងការចាប់ខ្លួនរបស់ពួកគេ ។
ជាចុងក្រោយ តុលាការបានផ្តន្ទាទោសប៉ូលីសឈ្មោះ Arnel Oares, Jeremias Pereda និង Jerwin Cruz ឱ្យជាប់គុកក្នុងរហូតដល់ ៤០ ឆ្នាំ ក្នុងម្នាក់ៗ ដោយគ្មានការដោះលែងឡើយ បើទោះបីពួកគេឡើងប្តឹងឧទ្ធរណ៍ក៏ដោយ ។
ក្រៅពីទោសជាប់ពន្ធនាគារ ប៉ូលីសដែលបានបង្ហាញខ្លួននៅក្នុងតុលាការជាមួយដៃជាប់ខ្នោះ និងពាក់អាវយឺតពណ៌លឿងទាំងនេះ ក៏ត្រូវបានបង្គាប់ឱ្យបង់ការខូចខាតដល់គ្រួសារក្រីក្រ Santos ផងដែរ ៕ ដោយ៖ ឧត្តម (ប្រភព៖ yahoo)