សៀមរាប ៖ ព្រះមហាក្សត្រ នៃព្រះរាជាណាចក្រកម្ពុជា មានព្រះរាជបន្ទូលថា កិច្ចអភិរក្សនិងអភិវឌ្ឍន៍បេតិកភណ្ឌ ជាពិសេសនៅតំបន់រមណីយដ្ឋានអង្គរ ជាការងារគ្មានទីបញ្ចប់ និងទាមទារ ឲ្យមានការចូលរួមពីគ្រប់មជ្ឈដ្ឋាន ជាតិ និងអន្តរជាតិ គឺស្រទាប់យុវជន ជាអ្នកបន្តវេណ ដើម្បីប្រែក្លាយតំបន់រមណីយដ្ឋានអង្គរ ជាទីតាំងបុរាណវិទ្យា ដ៏ធំជាងគេ របស់អង្គការយូណេស្កូ សម្រាប់កិច្ចការបណ្តុះបណ្តាលធនធានមនុស្ស។
ព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត សព្វព្រះរាជហឫទ័យស្តេចយាងជាព្រះរាជាធិបតីដ៏ខ្ពង់ខ្ពស់បំផុត ក្នុងពិធីបិទជាផ្លូវការ នៃពិធីអបអរសាទរខួប២៥ឆ្នាំ ការបង្កើតគណៈកម្មាធិការ អន្តរជាតិសម្របសម្រួលកិច្ចគាំពារ និងអភិវឌ្ឍន៍តំបន់អង្គរ ហៅកាត់ថា អាយ ស៊ី ស៊ី អង្គរ (ICC-Angkor) នាលានព្រះជល់ដំរី ខេត្តសៀមរាប ដោយមានការចូលរួមពីបណ្តាឥស្សរជនជាន់ខ្ពស់នៃរាជរដ្ឋាភិបាល បណ្តាថ្នាក់ដឹកនាំនៃ អាយស៊ី ស៊ី អង្គរ ព្រមទាំងភ្ញៀវជាតិ អន្តរជាតិ ជាច្រើនផងដែរ ។
ព្រះរាជសុន្ទរកថាដ៏ឧត្តុង្គឧត្តម នៃព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ព្រះអង្គមានព្រះរាជបន្ទូលថា រមណីយដ្ឋានអង្គរបានចុះបញ្ជីបេតិកភណ្ឌរបស់អង្គការយូណេស្កូ នៅថ្ងៃទី១៤ខែធ្នូឆ្នាំ១៩៩២ ក្រោមព្រះរាជតម្រិះដ៏ថ្លៃថ្លា និងឈ្លាវវៃរបស់ព្រះករុណា ព្រះបរមរតនកោដ្ឋ ដែលព្រះអង្គបានអំពាវនាវទៅអង្គការយូណេស្កូ សូមឲ្យជួយស្រោចស្រងអង្គរ ។ ឆ្លើយតបនឹងការអំពាវនាវនេះ សន្និសីទអន្តរជាតិមួយបាន បានប្រារព្ធធ្វើឡើងនៅទីក្រុងតូក្យូនៅថ្ងៃទី១២ ១៣ ខែតុលា ឆ្នាំ១៩៩៣ ក្រោមការផ្តួចផ្តើម គំនិតរបស់រាជរដ្ឋាភិបាលជប៉ុន ដោយមានការគាំទ្រពីប្រទេសបារាំង និងអង្គការយូណេស្កូ ដើម្បីដាក់ចេញនូវយុទ្ធសាស្ត្រ និងផែនការសកម្មភាពនានាជាប្រយោជន៍ ដល់កិច្ចការអភិរក្សនិង អភិវឌ្ឍន៍រមណីយដ្ឋានអង្គរ។ ដើម្បីសម្រេចគោលដៅនេះ គណៈកម្មាធិការ អន្តរជាតិសម្របសម្រួលកិច្ចគាំពារ និងអភិវឌ្ឍន៍តំបន់អង្គរ ហៅកាត់ថា អាយ ស៊ី ស៊ី អង្គរ (ICC-Angkor) ត្រូវបានបង្កើតឡើងនាខែធ្នូ ឆ្នាំ១៩៩៣។ ការប្រារព្ធខួបនៃ២៥ឆ្នាំ ICC-Angkor នៃចំកណ្តាលបេះដូង នៃក្រុងអង្គរធំ ដែលជាស្នាព្រះហស្ត និងជានិមិត្តរូបដ៏ខ្ពង់ខ្ពស់ នៃមហាវីរក្សត្រសម័យអង្គរ ព្រះបាទជ័យវរ័ន្មទី៧ ជាព្រឹត្តិការណ៍ប្រវត្តិសាស្ត្រ មានតម្លៃជាសកលពិតប្រាកដណាស់ សម្រាប់យើងទាំងអស់គ្នា ដោយបានបង្ហាញ យ៉ាងច្បាស់អំពីជោគជ័យ ជាប្រវត្តិសាស្ត្រនៃយុត្តិការអន្តរជាតិមួយ ក្នុងកិច្ចដំណើរអភិរក្ស និងអភិវឌ្ឍន៍រមណីយដ្ឋានអង្គរ ប្រកបដោយចីរភាពនាពេលកន្លងមក ដែលផ្តើមចេញពីការចូលរួមពីគ្រប់ភាគីពាក់ព័ន្ធនានា ទាំងជាតិនិងអន្តរជាតិ ។ ពិធីនេះក៏បានរំលឹកដល់យើងទាំងអស់គ្នា អំពីកាតព្វកិច្ចមួយដែលបានចងភ្ជាប់យើងទាំងអស់គ្នា ចាប់តាំងពីខែកញ្ញា ឆ្នាំ១៩៩១មក ជាពេលវេលាមានតម្លៃជាប្រវត្តិសាស្ត្រ នៃកិច្ចចាប់ផ្តើមកិច្ចពិភាក្សាស្វែងរក ដំណោះស្រាយសុខសន្តិភាព នៃព្រះរាជាណាចក្រកម្ពុជា ហើយដែលក្រោយមក កិច្ចព្រមព្រៀងទីក្រុងប៉ារីសស្តីពីការបញ្ចប់ ជម្លោះផ្ទៃក្នុងរបស់កម្ពុជា ត្រូវបានចុះហត្ថលេខានៅថ្ងៃទី២៣ ខែតុលា ឆ្នាំ១៩៩១ ។
ព្រះករុណា បានមានព្រះរាជបន្ទូលថា “ខ្ញុំសូមវាយតម្លៃខ្ពស់ចំពោះកិច្ចខិតខំប្រឹងប្រែង យកអស់កម្លាំងកាយចិត្តរបស់សម្តេច ឯកឧត្តម លោកជំទាវ លោក លោកស្រី ដៃគូអភិវឌ្ឍន៍ជាតិ និងអន្តរជាតិ ព្រមទាំងមន្ត្រីគ្រប់លំដាប់ថ្នាក់នៃអាជ្ញាធរជាតិអប្សរា ជាពិសេសថ្នាក់ដឹកនាំដែលយើងមិនអាចបំភ្លេចបាន ហើយដែលបានលះបង់ពេលវេលាប្រាជ្ញាស្មារតី បំពេញភារកិច្ចដឹកនាំដោយការទទួលខុសត្រូវខ្ពស់ ធ្វើឲ្យរមណីយដ្ឋានអង្គរ កាន់តែល្បីល្បាញលើពិភពលោក។ ជោគជ័យនាពេលកន្លងមកនេះ ក៏បានបង្ហាញពីការអនុវត្ត គោលនយោបាយវប្បធម៌ដ៏ត្រឹមត្រូវ របស់រាជរដ្ឋាភិបាលកម្ពុជា ក្រោមការដឹកនាំដ៏ប៉ិនប្រសព្វ និងឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលជានិច្ចកាល តែងយកចិត្តទុកដាក់ខ្ពស់ ក្នុងការថែរក្សាការពារ អភិរក្សនិងអភិវឌ្ឍន៍ មរតកវប្បធម៌ជាតិ”។
ព្រះករុណា ក៏បានថ្លែងអំណរគុណដល់ ICC-Angkor ដែលផ្តល់អនុសាសន៍ដ៏មានសារសំខាន់ ក្នុងការជំរុញកិច្ចការអភិរក្ស ស្រាវជ្រាវបណ្តុះបណ្តាល និងអភិវឌ្ឍន៍រមណីយដ្ឋានអង្គរ ប្រកបដោយចីរភាព។ តាមរយៈយុត្តិការដែលក្លាយជាគំរូអន្តរជាតិ របស់អង្គការយូណេស្កូនេះ ICC-Angkor បានកៀរគរការចូលរួមកាន់តែច្រើនឡើងៗ ពីក្រុមអ្នកជំនាញការអន្តរជាតិ ជាច្រើនមកពីជុំវិញពិភពលោក ដែលបច្ចុប្បន្នបាននិងកំពុង ធ្វើកិច្ចសហប្រតិបត្តិការ និងស្នើសុំកិច្ចសហការជាមួយអាជ្ញាធរជាតិអប្សរា ជាបន្តបន្ទាប់ ក្នុងការអភិរក្សស្រាវជ្រាវ បណ្តុះបណ្តាលនិងអភិវឌ្ឍន៍ ។ ជាការពិតណាស់ សមិទ្ធផលដែលសម្រេចបានក្រោយយុត្តិការICC-Angkorមានច្រើនទម្រង់និងគ្រប់វិស័យ ប៉ុន្តែទន្ទឹមនឹងនេះ ការងារដែលត្រូវបន្តធ្វើពាក់ព័ន្ធនឹងកិច្ចអភិរក្សនិងអភិវឌ្ឍក៏កាន់តែកើតឡើងកាន់តែច្រើនផងដែរ ។ ក្នុងន័យនេះ កិច្ចអភិរក្សនិងអភិវឌ្ឍន៍បេតិកភណ្ឌ ជាការងារគ្មានទីបញ្ចប់ និងទាមទារ ឲ្យមានការចូលរួមពីគ្រប់មជ្ឈដ្ឋាន ជាតិ និងអន្តរជាតិ ជាពិសេសគឺស្រទាប់យុវជន ជាអ្នកបន្តវេណ ជាក់ស្តែង បច្ចុប្បន្នធនធានមនុស្សក្នុងវិស័យអភិរក្ស និងស្រាវជ្រាវរបស់កម្ពុជា កំពុងឈានមុខគេ ក្នុងចំណោមបណ្តាប្រទេស អាស៊ីអាគ្នេយ៍ ហើយរមណីយដ្ឋានអង្គរបានក្លាយជាទីតាំងបុរាណវិទ្យា ដ៏ធំជាងគេ របស់អង្គការយូណេស្កូ សម្រាប់កិច្ចការបណ្តុះបណ្តាលធនធានមនុស្ស លើវិស័យនេះ។
សូមបញ្ជាក់ថា ឆ្លៀតក្នុងឱកាសអញ្ជើញទស្សនកិច្ចនៅខេត្តសៀមរាបរយៈពេល២ថ្ងៃ ពីថ្ងៃទី៤-៥ ខែធ្នូ ឆ្នាំ២០១៨ ដើម្បីចូលរួមជាអធិបតី ក្នុងពិធីបើកជាផ្លូវការខួបលើកទី ២៥ឆ្នាំ នៃការបង្កើតគណៈកម្មាធិការអន្ដរជាតិ អាយស៊ីស៊ី-អង្គរ និងកិច្ចប្រជុំបច្ចេកទេសលើកទី៣១ កិច្ចប្រជុំពេញអង្គលើកទី២៥ នៃអាយស៊ីស៊ី-អង្គរ លោកស្រី Audrey AZOULAY អគ្គនាយិកាយូណេស្កូ បានធ្វើទស្សនកិច្ចតាមការដ្ឋានជួសជុល តាមប្រាសាទមួយចំនួន ក្នុងរមណីយដ្ឋានអង្គរ ដោយមានការអមដំណើរដោយលោក ហង់ ពៅ អគ្គនាយករងនៃអាជ្ញាធរជាតិអប្សរា និងមន្ត្រីមួយចំនួននៃអង្គការយូណេស្កូ។
លោកស្រីអគ្គនាយិកាយូណេស្កូ បានអញ្ជើញស្វែងយល់ពីការជួសជុលនៅការដ្ឋានមួយចំនួន ក្នុងប្រាសាទអង្គរវត្តដូចជា ការដ្ឋានសាកលវិទ្យាល័យសូហ្វីយ៉ា របស់ប្រទេសជប៉ុន និងការដ្ឋានគម្រោងអភរិក្សអាល្លឺម៉ង់-អប្សរា (GACP) ប្រទេសអាល្លីម៉ង់ ពិសេសគម្រោងអភិរក្ស ជួសជុលរបស់អាជ្ញាធរជាតិអប្សរានៅអង្គរវត្ត។ លោកស្រី បានអញ្ចើញពិនិត្យការដ្ឋានជប៉ុន-អប្សរា (JASA) នៅប្រាសាទបាយ័ន្ត ការដ្ឋានរបស់ប្រទេសឥណ្ឌា (ASI) នៅប្រាសាទតាព្រហ្ម និងចុះពិនិត្យការងារគ្រប់គ្រងទឹក របស់អាជ្ញាធរជាតិអប្សរានៅប្រាសាទនាគព័ន្ធ។
ក្រៅពីការទស្សនានៅតាមប្រាង្គប្រាសាទហើយនោះ លោកស្រីអគ្គនាយិកា និងថ្នាក់ដឹកនាំនៃអាជ្ញាធរជាតិអប្សរា ក៏បានពិភាក្សា ពន្យល់ ទៅលើការងារគ្រប់គ្រង ការអភិរក្សទូទៅ និងការបណ្តុះបណ្តាលធនធានមនុស្ស។
លើសពីនោះទៀត លោកស្រីក៏មានចំណាប់អារម្មណ៍ ចំពោះភ្ញៀវទេសចរ ដែលមកទស្សនាតំបន់អង្គរ ពិសេសគឺមរតកវប្បធម៌អរូបី ដោយបានស្វែងយល់ពីប្រពៃណី ទំនៀមទម្លាប់ ប្រាសាទការធ្វើបុណ្យ ការគោរពបូជាព្រះ ការដោះស្បែកជើងពេលដើរ លើប្រាសាទ ដោយសង្កត់ធ្ងន់ថា ចំពោះភ្ញៀវទេសចរខ្មែរ មិនមែនមកទស្សនាតែប្រាសាទទេ គឺមកដើម្បីបានគោរពបូជាព្រះ។ ដូច្នេះអង្គរមិនស្លាប់ទេ គឺនៅតែមានការគោរពបូជា យ៉ាងខ្ជាប់ខ្ជួនពីប្រជាជនខ្មែរ៕ ដោយ ៖ កូឡាប