កោះកុង ៖ ខឹងគ្រួសារជំទាស់មិនឲ្យយកគ្នា គូរស្នេហ៍វ័យក្មេងមួយគូរ បានលេបថ្នាំកណ្តុរសម្លាប់ខ្លួន តែមិនស្លាប់ រួចបាននាំគ្នាទៅ កាន់មន្ទីរពេទ្យបង្អែកខេត្ត ដោយខ្លួនឯង ដើម្បីឲ្យក្រុមគ្រូពេទ្យជួយសង្គ្រោះ កាលពីម៉ោងប្រមាណ៨យប់ថ្ងៃទី៤ខែធ្នូឆ្នាំ២០១៨។
គូរស្នេហ៍នេះ ខាងប្រុសឈ្មោះ ជិន សុខឌី អាយុ២១ឆ្នាំមុខរបរកម្មករសំណង់ បច្ចុប្បន្នស្នាក់នៅភូមិ១ សង្កាត់ដងទង់ ក្រុងខេមរភូមិន្ទ ខេត្តកោះកុង ចំណែកខាងស្រីឈ្នោះ បុត សុភាព អាយុ២៣ឆ្នាំ មុខរបរលក់បន្លែ ទីលំនៅភូមិ២ សង្កាត់ដងទង់ ក្រុងខេមរភូមិន្ទ ខេត្តកោះកុង។ គូរស្នេហ៍វ័យក្មេងមួយគូរនេះ បានស្រឡាញ់គ្នាអស់រយៈពេលជាយូរមកហើយ តែដោយសារគ្រួសារខាងស្រីមិនពេញចិត្ត ពួកគេទាំងពីរនាក់ នាំគ្នាគិតខ្លីសម្រេចចិត្តផឹកថ្នាំកណ្តុរដើម្បីសម្លាប់ខ្លួន ប៉ុន្តែប្រហែលជាមានការពិបាកខ្លាំងនៅក្នុងខ្លួន។ ពួកគេក៏នាំគ្នាមកកាន់មន្ទីរពេទ្យដើម្បីឲ្យក្រុមគ្រូពេទ្យជួយសង្គ្រោះ។ រហូតមកដល់ពេលនេះ ពួកគេទាំងពីរបានរួចផុតពីគ្រោះថ្នាក់ដល់អាយុជីវិតហើយ បន្ទាប់ពីក្រុមគ្រូពេទ្យ ជួយសង្គ្រោះបានទាន់ពេលវេលា៕ ដោយ ៖ បញ្ញាស័ក្តិ
