ប្រព័ន្ធផ្សព្វផ្សាយរបស់ចិនបានធ្វើការចុះផ្សាយថា សហរដ្ឋអាមេរិចកំពុងព្យាយាមបង្ក្រាបក្រុមហ៊ុនបច្ចេកវិទ្យាចិន Huawei និងទប់ស្កាត់ការពង្រីកខ្លួនជុំវិញសកលោករបស់ក្រុមហ៊ុននេះ តាមរយៈការចាប់ខ្លួនមន្ត្រីជាន់ខ្ពស់របស់ក្រុមហ៊ុន។
កាលពីថ្ងៃទី ១ខែធ្នូ អាជ្ញាធរកាណាដា បានចាប់ខ្លួនប្រធានផ្នែកហិរញ្ញវត្ថិរបស់ក្រុមហ៊ុន Huawei គឺអ្នកស្រី Meng Wanzhou និងបានធ្វើការឃុំខ្លួនគាត់។ នៅក្នុងថ្ងៃដដែលនោះ ប្រធានាធិបតីអាមេរិច ដូណាល់ ត្រាំ និងប្រធានាធិបតីចិន ស៊ី ជិនពីងកំពុងពិសារអាហារជាមួយគ្នា នៅកិច្ចប្រជុំកំពូល G20។
មន្ត្រីអាមេរិចពីរនាក់ បាននិយាយកាលពីថ្ងៃព្រហស្បតិ៍ម្សិលមិញថា លោកត្រាំ មិនបានដឹងពីគំរោងចាប់ខ្លួនមន្ត្រីជាន់ខ្ពស់របស់ក្រុមហ៊ុនទូរគមនាគមន៍យក្សចិនឡើយ។
ចំណែកនាយករដ្ឋមន្ត្រីកាណាដាវិញ គឺលោក Justin Trudeau ក៏បានព្យាយាមដកខ្លួនលោកឲ្យឆ្ងាយពីការចាប់ខ្លួននោះដែរ ដោយបញ្ជាក់ថា ការចាប់ខ្លួននោះមិនទាក់ទងទៅនឹងរឿងនយោបាយ ឬការជ្រៀតជ្រែកទេ។
ក្រោយពេលការចាប់ខ្លួន ទីក្រុងប៉េងកាំងបានធ្វើការទាមទារឲ្យមានការដោះលែងពលរដ្ឋខ្លួនជាបន្ទាប់ និងបានតវ៉ាថា ទាំងកាណាដា និងអាមេរិច មិនបានផ្តល់ហេតុផលពីការចាប់ខ្លួននោះឡើយ។
មន្ត្រីរបស់កាសែតចិន China Daily បាននិយាយនៅក្នុងការចេញផ្សាយថា មិនទាន់មានការប្រាប់ពីមូលហេតុដែលនាំអោយមានការចាប់ និងឃុំខ្លួនពលរដ្ឋចិនឡើយ ហើយវាហាក់ដូចជាផ្នែកមួយ នៃផែនការណ៍របស់អាមេរិចក្នុងការដាក់សម្ពាធប្រទេសសម្ព័ន្ធមិត្តខ្លួនមិនឲ្យប្រើប្រាស់ទំនិញរបស់ក្រុមហ៊ុន Huawei។
ការសែតបញ្ជាក់ទៀតថា “ប៉ុន្តែមានរឿងមួយដែលច្បាស់នោះគឺបានបង្ហាញថា អាមេរិចកំពុងតែព្យាយាមធ្វើអ្វីៗគ្រប់យ៉ាងដើម្បីទប់ទល់នឹងការពង្រីកខ្លួនរបស់ក្រុមហ៊ុន Huawei ទៅកាន់ទីផ្សារពិភពលោក ព្រោះក្រុមហ៊ុនគឺជាមេដ៏សំខាន់សម្រាប់ក្រុមហ៊ុនបច្ចេកវិទ្យាចិនផ្សេងៗទៀត”៕ សុភ័ក្ត្រ
ប្រភព៖ Channelnewsasia