ខេត្តស្វាយរៀង ៖ លោកស្រី ឡាយ ណាវីន រដ្ឋលេខាធិការក្រសួងឧស្សាហកម្មនិងសិប្បកម្ម លោក ហែម ពិសិដ្ឋ អភិបាលរងខេត្តស្វាយរៀងនារសៀលថ្ងៃទី៧ខែធ្នូឆ្នាំ២០១៨ នេះបានអញ្ជើញជាអធិបតីនៅក្នុងពិធីប្រកាសតែងតាំងប្រគល់ភារកិច្ចនិងផ្ទេរភារកិច្ចមន្ត្រីរាជការនៃមន្ទីរឧស្សាហកម្មនិងសិប្បកម្មខេត្តស្វាយរៀងដែលបានប្រព្រឹត្តទៅនាសាលាប្រជុំរបស់មន្ទីរឧស្សាហកម្មនិងសិប្បកម្មខេត្ត។
នៅក្នុងឱកាសនោះផងដែរលោកស្រី ឡាយ ណាវីន រដ្ឋលេខាធិការក្រសួងឧស្សាហកម្មនិងសិប្បកម្ម និងលោក ហែម ពិសិដ្ឋ អភិបាលរងខេត្តស្វាយរៀងក៍បានថ្លែងនូវអំណរគុណចំពោះថ្នាក់ដឹកនាំមន្ត្រីរាជការគ្រប់លំដាប់ថ្នាក់នៃមន្ទីរឧស្សាហកម្មនិងសិប្បកម្មខេត្តស្វាយរៀង និងអង្គភាពរដ្ឋាករទឹកដែលកន្លងមកបានរួមសហការគ្នាបំពេញតួនាទីភារកិច្ចរបស់ខ្លួនយ៉ាងល្អប្រសើររួមចំណែកជាមួយរដ្ឋបាលខេត្តក្នុងការគាំទ្រដល់បរិយាកាសនៃការវិនិយោគនិងដំណើរការប្រព្រឹត្តទៅនៃសហគ្រាសធុនតូច ធុនមធ្យមនិងសិប្បកម្មក្នុងខេត្តជាពិសេសក្នុងវិស័យទឹកស្អាតស្របតាមគោលនយោបាយដឹកនាំរបស់សម្តេចតេជោនាយករដ្ឋមន្ត្រី ក្នុងការអភិវឌ្ឍវិស័យឧស្សាហកម្មនឹងការផ្គត់ផ្គង់ទឹកស្អាតជូនប្រជាពលរដ្ឋដែលទាំងអស់នេះគឺជាផ្នែកមួយដ៏សំខាន់មិនត្រឹមតែចូលរួមចំណែកក្នុងការលើកស្ទួយសេដ្ឋកិច្ចជាតិប៉ុណ្ណោះទេប៉ុន្តែក៏ចូលរួមចំណែកលើកកម្ពស់សុខុមាលភាព ជីវភាពរស់នៅ និងកាត់បន្ថយភាពក្រីក្ររបស់ប្រជាពលរដ្ឋផងដែរ។
ចំពោះមន្ត្រីរាជការក្នុងរចនាសម្ព័ន្ធនៃមន្ទីរឧស្សាហកម្មនិងសិប្បកម្មខេត្តស្វាយរៀងដែលត្រូវប្រកាសតែងតាំងប្រគល់ភារកិច្ចនិងផ្ទេរភារកិច្ចនៅថ្ងៃនេះដែលសុទ្ធសឹងជាមន្ត្រីធ្លាប់មានបទពិសោធន៍ការងារនិងមានស្នាដៃល្អក្នុងការបំពេញតួនាទីភារកិច្ចរបស់ខ្លួនហើយសូមឱ្យមន្ត្រីរាជការទាំងអស់គ្នាចាត់ទុកថានេះគឺជាកម្លាំងចលករជំរុញទឹកចិត្តឱ្យកាន់ខិតខំប្រឹងប្រែងដើម្បីកសាងបាននូវស្នាដៃនិងសមិទ្ធផលថ្មីៗបន្ថែមទៀតក្នុងភារកិច្ចនិងការទទួលខុសត្រូវរបស់ខ្លួននាពេលខាងមុខសម្រាប់បម្រើឱ្យផលប្រយោជន៍រួមរបស់អង្គភាព។
ចំពោះមន្ត្រីរាជការដែលទើបទទួលបានការតែងតាំងថ្មីនិងប្រកាសចូលកាន់មុខតំណែងនាពេលនេះត្រូវបន្តបេសកកម្ម ចូលរួមសហការក្នុងការជំរុញលើកកម្ពស់និងអភិវឌ្ឍន៍វិស័យឧស្សាហកម្ម សិប្បកម្មនិងទឹកស្អាតនៅក្នុងខេត្តឱ្យកាន់តែទទួលបានលទ្ធផលល្អប្រសើរថែមទៀតស្របតាមគោលនយោបាយអភិវឌ្ឍន៍វិស័យឧស្សាហកម្ម សិប្បកម្មកម្ពុជា ឆ្នាំ២០១៥-២០២៥និងគោលនយោបាយទឹកស្អាតរបស់សម្តេចតេជោដែលផ្តោតលើការផ្គត់ផ្គង់ទឹកស្អាតជូនប្រជាពលរដ្ឋឱ្យបានគ្រប់ទីប្រជុំជននៅឆ្នាំ២០២៥ជាពិសេសត្រូវខិតខំពង្រឹងការសាមគ្គីភាពឯកភាពផ្ទៃក្នុងគោរពតាមឋានានុក្រមដឹកនាំស្របតាមការបែងចែកភារកិច្ចទទួលខុសត្រូវឱ្យបានល្អ ។
សូមបញ្ជាក់ផងដែរថា ៖ តាមដីកាស្តីពីការតែងតាំងប្រគល់ភារកិច្ចជូនមន្ត្រីរាជការរបស់រដ្ឋបាលខេត្តស្វាយរៀងលេខ ០៤៧/១៨ ដក.តត ចុះថ្ងៃទី៤ខែធ្នូឆ្នាំ២០១៨ សម្រចត្រូវបានតែងតាំ”ងមន្ត្រីរាជការចំនួន៣រូបនៅមន្ទីរឧស្សាហកម្មនិងសិប្បកម្មខេត្តស្វាយរៀង ទី១.លោក.ចាន់ វណ្ណសុខា ឋានន្តរស័ក្កិវរមន្ត្រីថ្នាក់លេខ៤នៃក្របខ័ណ្ឌមន្ត្រីគ្រប់គ្រងរដ្ឋបាលក្រសួង ឧស្សាហកម្មនិងសិប្បកម្ម ជាអនុប្រធានមន្ទីរឧស្សាហកម្មនិងសិប្បកម្មខេត្តស្វាយរៀង ទី២.លោក កែវ ផល្លាសម្បត្តិ ឋានន្តរស័ក្កិ អនុមន្ត្រីថ្នាក់លេខ១ នៃក្របខ័ណ្ឌមន្ត្រីគ្រប់គ្រងរដ្ឋបាលក្រសួងឧស្សាហកម្មនិងសិប្បកម្ម ជាប្រធានការិយាល័យទឹកស្អាត ទី៣.លោក លន់ ម៉ារ៉ាឌី ឋានន្តរស័ក្ក ក្រមការថ្នាក់លេខ៤ នៃក្របខ័ណ្ឌមន្ត្រីក្រមការនៃក្របខ័ណ្ឌក្រសួងឧស្សាហកម្មនិងសិប្បកម្ម ជាអនុប្រធានការិយាល័យស្តង់ដារ និងមាត្រាសាស្ត្រ ទី៤. ត្រូវបានប្រគល់ភារកិច្ចជូនលោកស្រី ទេព ពិសាល ឋានន្តរស័ក្កិលេខាធិការរដ្ឋបាលថ្នាក់លេខ៤ នៃក្របខ័ណ្ឌលេខាធិការរដ្ឋបាល ក្រសួងឧស្សាហកម្មនិងសិប្បកម្ម ជាអនុប្រធានការិយាល័យទឹកស្អាត ទី៥. ត្រូវបានផ្ទេរភារកិច្ចលោក អ៊ឹម មេសា ឋានន្តរស័ក្កិអនុមន្ត្រីថ្នាក់លេខ២នៃក្របខ័ណ្ឌមន្ត្រីគ្រប់គ្រងរដ្ឋបាលក្រសួង ឧស្សាហកម្មនិងសិប្បកម្ម ពីប្រធានការិយាល័យទឹកស្អាតជាប្រធានអង្គភាពរដ្ឋាករទឹកខេត្តស្វាយរៀង៕ ដោយ ៖ វ៉ៃគោ