ដូនជី ២នាក់ នៅក្នុងសាលាសាសនាកាតូលិចមួយក្នុងរដ្ឋកាលីហ្វញ៉ា បានទទួលស្គាល់ថាពួកគេបានកិបកេងលុយប្រហែល៥០០.០០០ដុល្លារអាមេរិចពីមូលនិធិសាលា និងបានយកវាទៅលេងល្បែងស៊ីសង ក្នុងទីក្រុង Las Vegas និងដើរលេងកំសាន្តអស់រយៈពេលជាច្រើនឆ្នាំ។
ដូនជីខិលខូចទាំងពីរខាងលើមានឈ្មោះថា Mary Margaret Kreuper និង Lana Chang ដែលអ្នកទាំងពីរជាមិត្តជិតស្និទ្ធនឹងគ្នា។
ពួកគេបានកិបគេងលុយពីសាលាបង្រៀនសាសនាកាតូលិចឈ្មោះ James Catholic School ដែលបានមកពីការបង្រៀន ថ្លៃសាលា និងការបរិច្ចាកផ្សេងៗ។
លុយទាំងនោះត្រូវបានគេដឹងថាបាត់ បន្ទាប់ពីខាងសាលាបានធ្វើការជម្រះបញ្ជី ហើយខាងសាលាមានការជឿជាក់ថា ដូនជីទាំងពីរអ្នកនោះជាអ្នកលួចលុយអស់ជាង ១០ឆ្នាំមកហើយ។
ដូនជី Mary Margaret Kreuper គឺជាអតីតនាយកសាលា ដែលគាត់បានធ្វើការអស់ ២០ឆ្នាំមកហើយ មុនពេលគាត់ចូលនិវត្តន៍កាលពីដើមឆ្នាំនេះ ចំណែក Lana Chang គឺជាគ្រូបង្រៀននៅសាលាខាងលើអស់រយៈពេល ២០ឆ្នាំដែរ និងបានចូលនិវត្តន៍ក្នុងឆ្នាំជាមួយគ្នាដែរ ៕ សុភ័ក្ត្រ
ប្រភព៖ Channelnewsasia