រដ្ឋបាលរបស់លោក ដូណាល់ ត្រាំ បានដាក់ទណ្ឌកម្មបន្ថែមប្រឆាំងទៅនឹងមន្ត្រីជាន់ខ្ពស់កូរ៉េខាងជើងចំនួន៣នាក់ កាលពីថ្ងៃច័ន្ទម្សិលមិញនេះ ដើម្បីឆ្លើយតបទៅនឹងទីក្រុងព្យុងយ៉ាងដែលនៅតែបន្តការរំលោភសិទ្ធិមនុស្ស។
ការប្រកាសការដាក់ទណ្ឌកម្មលើបុគ្គលកូរ៉េខាងជើង ៣នាក់បន្ថែមកើតឡើង ខណៈដែលលោកត្រាំ ហាក់បណ្តែតបណ្តោយចំពោះគំរោងនៃជំនួបកំពូលលើកទី ២ជាមួយនឹងមេដឹកនាំកូរ៉េខាងជើង គីម ជុងអ៊ុន។
រដ្ឋមន្ត្រីក្រសួងរតនាគារអាមេរិច Steven Mnuchin បានថ្លែងនៅក្នុងសេចក្តីប្រកាសថា “ទណ្ឌកម្មទាំងនេះបង្ហាញពីការបន្តការគាំទ្ររបស់អាមេរិចចំពោះសេរីភាពនៃការបញ្ចេញមតិ និងការប្រឆាំងទៅនឹងរាល់ការរឹតត្បិត និងការរំលោភសិទ្ធិមនុស្ស”។
ក្រសួងរដ្ឋរតនាគារដដែលបញ្ជាក់ទៀតថា ទណ្ឌកម្មថ្មីៗនោះបង្ហាញពីប្រព្រឹត្តរបស់ជនទាំងនោះនៅក្នុងប្រទេសកូរ៉េខាងជើង និងក៏ជាក្រើនរំលឹកទៅដល់ការព្យាបាបរហូតដល់ស្លាប់របស់និស្សិតអាមេរិចកាំងម្នាក់ ដែលបានស្លាប់កាលពី ១៨ខែមុន បន្ទាប់ពីមានការឃុំខ្លួនក្នុងគុកក្នុងកូរ៉េខាងជើង៕ សុភ័ក្ត្រ
ប្រភពៈ CNN
