តាកែវ ៖ នៅក្នុងឱកាសអញ្ជើញធ្វើជាអធិបតីភាពនៅក្នុងពិធីប្រកាសតែងតាំង លោក គិន ភក្តី ជាអភិបាលស្រុកកោះអណ្ដែតថ្មី នៅរសៀលថ្ងៃ អង្គារ ទី១១ ខែធ្នូ ឆ្នាំ២០១៨ នៅសាលាស្រុកកោះអណ្ដែត ឯកឧត្តម អ៊ូច ភា អភិបាលខេត្តតាកែវបានធ្វើការណែនាំដល់សមត្ថកិច្ចតាមព្រំដែន ជាពិសេសធាជ្ញាធរស្រុកដែលនៅជាប់ព្រំដែនប្រទេសវៀតណាមត្រូវចុះធ្វើការត្រួតពិនិត្យមើលឲ្យបានជាប់ជាប្រចាំ ដោយហាមដាច់ខាតចំពោះការជួលដីស្រែខ្មែរយើងឲ្យជនជាតិវៀតណាមធ្វើ។
ថ្លែងនៅចំពោះមុខសមត្ថកិច្ចតាមព្រំដែននិងអាជ្ញាធរពាក់ព័ន្ធដែលបានចូលរួមនៅក្នុងពិធីប្រកាសតែងតាំងនោះឯកឧត្តម អ៊ូច ភា បានថ្លែងថា សមត្ថកិច្ចដែលឈរនៅតាមខ្សែរបន្ទាត់ព្រំដែនទាំងទាហ៊ាននិងនគបាលជាពិសេសអាជ្ញាធរស្រុក៤ គឺស្រុកបូរីជលសារ ស្រុកកោះអណ្ដែត ស្រុកគីរីវង់ និងស្រុកអង្គបូរី ត្រូវធ្វើយ៉ាងណាទប់ស្កាត់ឲ្យខាងតែបានចំពោះការជួលដីស្រែឲ្យជនជាតិវៀតណាមធ្វើ។ បញ្ហាជួលដីស្រែនៅតាមបណ្ដោយព្រំដែនទាំងព្រំដែនជាប់ប្រទេសថៃ ប្រទេសវៀតណាមនិងប្រទេសឡាវ កន្លងមករាជរដ្ឋា ភិបាលកម្ពុជាបានចេញសារាចរណ៍ណែនាំ ដោយហាមដាច់ខាតចំពោះការជួលដីស្រែនេះ ហើយបើម្ចាស់ដីជនជាតិខ្មែរយើងមិនធ្វើទេគឺសុខចិត្តទុកឲ្យទំនេរចោលតែម្ដង។
ឯកឧត្តមអភិបាលខេត្តតាកែវបានមានប្រសាសន៍បន្តថា បញ្ហាជួលដីស្រែនៅតាមបណ្ដោយព្រំដែនឲ្យបរទេសធ្វើនេះជាពិសេសជួលឲ្យជនជាតិវៀតណាមធ្វើ វាជាបញ្ហារសើបមួយ ដែលអ្នកនយោបាយឱកាសនិយមខ្លះឆ្លៀតយកបញ្ហានេះរិះគន់រាជរដ្ឋាភិបាលនិងបានចោទប្រកាន់រាជរដ្ឋាភិបាលថាលក់ដីស្រែខ្មែរឲ្យបរទេសជាដើម។ ដូច្នេះដើម្បីលុបបំបាត់ការយករឿងជួលដីស្រែតាមបណ្ដោយព្រំដែននេះមកវាយប្រហាររាជរដ្ឋាភិបាលដោយអយុត្តិធម៌នោះ អាជ្ញាធរពាក់ព័ន្ធទាំងអស់ជាពិសេសអាជ្ញាធរស្រុកដែលជាប់ព្រំដែនត្រូវធ្វើការទប់ស្កាត់ឲ្យបានជាដាច់ខាតចំពោះការជួលដីស្រែនេះ។
នៅក្នុងឱកាសនោះឯកឧត្តម អ៊ូច ភា ក៏បានធ្វើការព្រមានចំពោះមន្ត្រីពាក់ព័ន្ធទាំងឡាយណាដែលធ្លាប់ស៊ុំគ្រលំរឿងជួលដីស្រែឲ្យជនបរទេសនេះ ត្រូវដកខ្លួនជាបន្ទាន់ ហើយប្រសិនបើអាជ្ញាធរស៊ើបដឹងត្រូវតែដកតំណែងចោលតែម្ដងហើយក៏ត្រូវតែទទួលខុសត្រូវចំពោះរាជរដ្ឋាភិបាលផងដែរ ព្រោះរាជរដ្ឋាភិបាលបានចេញសេចក្ដីណែនាំជាច្រើនដងមកហើយ៕ ដោយ ៖ តាកែវ
