បន្ទាយមានជ័យ ៖ យុវជនប្រុសស្រីចំនួន៤នាក់ ត្រូវបានកម្លាំងអាវុធហត្ថក្រុងសិរីសោភ័ណ ធ្វើការឃាត់ខ្លួនបន្ទាប់ពីសង្ស័យថា បានរក្សាទុក និងចែកចាយថ្នាំញៀនដោយខុសច្បាប់ប្រព្រឹត្តនៅចំណុចក្បាលស្ពានថ្មព្រះពន្លា ស្ថិតក្នុងភូមិ៣ សង្កាត់ព្រះពន្លា កាលពីថ្ងៃទី៩ ខែធ្នូ ឆ្នាំ២០១៧។
លោកវរសេនីយ៍ ស ប៊ុនសឿង មេបញ្ជាការរងកងរាជអាវុធហត្ថខេត្តបន្ទាយមានជ័យ បានអោយដឹងថា យុវជនប្រុសស្រីទាំងបួននាក់ ខាងលើ គឺជាមុខសញ្ញាជួញដូរគ្រឿងញៀនយ៉ាងសកម្មក្នុងក្រុងសិរីសោភ័ណ ហើយមុខសញ្ញានេះជាមុខសញ្ញាចាស់ខ្លះធ្លាប់ទាំងជាប់គុក និងជាប់មណ្ឌលកែប្រែជាច្រើនដងផងដែរ។ កម្លាំងជំនាញបានធ្វើការតាមដានអស់រយៈពេលជាច្រើនថ្ងៃទម្រាំឈានដល់ការឃាត់ខ្លួនបាន។
ជនសង្ស័យទាំងបួននាក់មានឈ្មោះ ១-ជា ណុច ភេទប្រុស អាយុ ៣៣ឆ្នាំ ២-ស៊ិម ច្រិប ភេទស្រីអាយុ៣៨ឆ្នាំ ៣-ឌុន សុបញ្ញា ភេទប្រុសអាយុ១៩ឆ្នាំ និង៤-ប៉ក់ ស៊ីណា ហៅ ចិន អាយុ៣២ឆ្នាំ។ក្រោយឃាត់ខ្លួនជនសង្ស័យ សមត្ថកិច្ចបានដកហូតគ្រឿងញៀន ប្រភេទមេតំហ្វេតាមីន ទឹកកកសរុបចំនួន៤២កូនថង់ ស្មើនឹងទម្ងន់១៨,៨៤ក្រាម មេតំហ្វតាមីនគ្រាប់១៥៧គ្រាប់ ទូរសព្ទ័៤គ្រឿង នាឡិកាមួយគ្រឿង និងម៉ូតូហុងដាទ្រីមមួយគ្រឿង ៕ ដោយ ៖ បន្ទាយ
