ភ្នំពេញ ៖ បុរសម្នាក់ដែលទើបតែមកពីស្រុកកំណើត មកដល់ផ្ទះ អង្គុយលេងជាមួយអ្នកជិតខាង ស្រាប់តែមានអការៈមិនស្រួលខ្លួន រួចបានទៅទិញភេសជ្ជៈខារ៉ាបាវមួយកំប៉ុង ដើម្បីផឹកឲ្យមានកម្លាំងឡើងវិញ ស្រាប់តែធ្វើឲ្យស្លាក់ខ្យល់ស្ទះដង្ហើម ដាច់ខ្យល់ស្លាប់នៅលើគ្រែ កាលពីម៉ោង១២រំលងអធ្រាត ឈានចូលថ្ងៃទី២១ ខែធ្នូ ឆ្នាំ២០១៨ ស្ថិតតាមបណ្ដោយផ្លូវលេខ៤២B ក្នុងភូមិរោងចក្រ សង្កាត់គោកឃ្លាង ខណ្ឌសែនសុខ រាជធានីភ្នំពេញ ។
សមត្ថកិច្ចមូលដ្ឋាន បានឲ្យដឹងថា បុរសដែលស្លាប់ឈ្មោះ កៃ ប៉ាន ភេទប្រុស អាយុ៥០ឆ្នាំ មុខរបលក់លៀសហាស ស្នាក់នៅទីតាងកើតហេតុខាងលើ បានស្រុកកំណើត នៅស្រុកសាមគ្គីមានជ័យ ខេត្តកំពង់ឆ្នាំង បានចោលប្រពន្ធ និងកូនស្រីតូច កំពុងយំសោកបោកខ្លួន ។
តាមប្រភពព័ត៌មាន ពីសាច់ញាតិជនរងគ្រោះ បានឲ្យដឹងថា ជនរងគ្រោះ ទើបតែមកពីស្រុកកំណើត ហើយបានអង្គុយលេង ជាមួយអ្នកជិតខាង ស្រាប់តែមានអការៈមិនស្រួលខ្លួន រួចបានទៅទិញភេសជ្ជៈខារ៉ាបាវមួយកំប៉ុងមកផឹក ។ ក្រោយមកស្រាប់តែ ជនរងគ្រោះស្ទាក់ខ្យល់ប្រកាច់ស្លាប់នៅលើគ្រែមួយរំពេច ។ សមត្ថកិច្ចមូលដ្ឋាន និងសមត្ថកិច្ចជំនាញ ចុះធ្វើកោលសល្យវិច័យ រួចប្រគល់ឲ្យក្រុមគ្រួសារ យកទៅស្រុកកំណើត ធ្វើបុណ្យតាមប្រពៃណី៕ ដោយ ៖ បញ្ញាស័ក្តិ
