យោងតាម Detik បុរសម្នាក់មានឈ្មោះថា Fuad បាននៅជាមួយបងប្អូនជីដូនមួយរបស់គាត់ នៅឯហាងកាហ្វេមួយ នៅពេលនោះ ពួកគេបានប្រទះឃើញគូស្នេហ៍១គូ កំពុងអង្គុយនៅក្បែរតុមួយ កំពុងស្ទាបអង្អែលគ្នា និងធ្វើសកម្មភាពផ្សេងៗដ៏ពុំសមរម្យ ។ ហើយអ្វីដែលគួរឲ្យចាប់អារម្មណ៍នោះ គឺត្រង់ថា ខាងស្រីពាក់កន្សែងក្បាលទៀតផង ។
ឃើញស្ថានភាពបែបនេះ Fuad ក៏បានដកទូរស័ព្ទ និងចាប់ផ្តើមថតគូស្នេហ៍នេះកំពុងធ្វើសកម្មភាពយ៉ាងស្រើបស្រាល មុនពេលបង្ហោះវីដេអូនេះ ដែលមានបំណងចង់អប់រំដល់សាធារណៈជនប៉ុណ្ណោះ កាលពីថ្ងៃទី១៧ ធ្នូ ។ ហើយគាត់ក៏ពុំដឹងថា វីដេអូនេះមានទោសកំហុសល្មើសនឹងច្បាប់ រហូតត្រូវប៉ូលីសចាប់ខ្លួននៅបន្ទាប់សោះ ។
យោងតាមប៉ូលីស Fuad បានអះអាងថា រូបគាត់បានថតវីដេអូនេះឡើង ព្រោះគាត់មិនពេញចិត្តនឹងសកម្មភាពរបៀបនេះនៅទីសាធារណៈ ។ Fuad បានពន្យល់ថា៖ «ខ្ញុំបានថតវា គឺក្នុងបំណងអប់រំដល់សាធារណៈជនប៉ុណ្ណោះឯង ។ ខ្ញុំមិនពេញចិត្តនឹងទង្វើស្រើបស្រាលគ្នាបែបនេះនៅទីសាធារណៈទេ» ។ ទោះយ៉ាងណា ទោសកំហុសមួយនេះរបស់គាត់ យើងក៏ពុំទាន់ដឹងថា សមត្ថកិច្ចនឹងបន្ធូរបន្ថយទោសឲ្យ ឬ យ៉ាងណានោះទេ ៕ ដោយ៖ ឧត្តម
