មណ្ឌលគិរី ៖ ស្នងការដ្ឋាននគរបាលខេត្តទាំងពីរ មណ្ឌលគិរី (កម្ពុជា) ខេត្តដាក់ឡាក់ (វៀតណាម) បើកកិច្ចប្រជុំកិច្ចសហប្រតិបត្តិការ បង្ការ ទប់ស្កាត់ និងបង្ក្រាបបទល្មើសនៅតាមតំបន់ព្រំដែន បានប្រព្រឹត្តទៅនៅផ្ទះសំណាក់ពេជ្រដា ស្ថិតនៅក្រុងសែនមនោរម្យ ខេត្តមណ្ឌលគិរី នាព្រឹកថ្ងៃទី២៣ ខែធ្នូ ឆ្នាំ២០១៨។
កិច្ចប្រជុំកិច្ចសហប្រតិបត្តិការ បង្ការ ទប់ស្កាត់ និងបង្ក្រាបបទល្មើសនៅតាមតំបន់ព្រំដែន រវាងស្នងការដ្ឋាននគរបាលខេត្តមណ្ឌលគិរី(កម្ពុជា) និងស្នងការដ្ឋាននគរបាលខេត្តដាក់ឡាក់ (វៀតណាម) ក្រោមអធិបតី លោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី និងលោកវរសេនីយ៍ឯក វូ ហុងវាំង ស្នងការនគរបាលខេត្តដាក់ឡាក់ ព្រមទាំងមានការចូលរួមពីសំណាក់លោក លោកស្រីស្នងការរង លោកអធិការនគរបាលក្រុង និងលោកមេបញ្ជាការវរការពារព្រំដែន នៃប្រទេសទាំងពីរ។
កិច្ចប្រជុំខាងលើនេះ ភាគីទាំង២ បានផ្តោតយ៉ាងសំខាន់ដើម្បីធ្វើការប្តេជ្ញារួមគ្នា ទប់ស្កាត់រាល់បញ្ហាបទល្មើស ផ្សេងៗ ដែលកើតមាននៅតាមបន្ទាត់ព្រំដែនកម្ពុជា និងវៀតណាម ក្នុងខេត្តមណ្ឌលគិរី ឈានទៅរកការអភិវឌ្ឍន៍រីកចម្រើននៃប្រទេសទាំងឲ្យកាន់តែប្រសើរឡើង៕ ដោយ ៖ បញ្ញាស័ក្តិ
