ភ្នំពេញ ៖ លោកថោង ខុន រដ្ឋមន្ត្រីក្រសួងទេសចរណ៍ និងប្រធានអនុគណៈកម្មការរៀបចំពិព័រណ៍ទេសចរណ៍ ពាណិជ្ជកម្ម សកម្មកីឡា និងពិធីឆ្លងឆ្នាំសកលឆ្នាំ២០១៩ បានរៀបចំកិច្ចប្រជុំត្រួតពិនិត្យការងារត្រៀមរៀបចំព្រឹត្តិការណ៍នោះ នៅទីស្ដីការក្រសួងទេសចរណ៍ កាលពីថ្ងៃទី២១ ខែធ្នូ ឆ្នាំ២០១៨ ហើយដោយបានអំពាវនាវ និងជំរុញដល់រដ្ឋបាលរាជធានី-ខេត្តនានា និងគ្រប់ភាគីពាក់ព័ន្ធរួសរាន់ ក្នុងការរៀបចំខ្លួនចូលរួមតាំងពិព័រណ៍សមិទ្ធផល ក្នុងឱកាសពិធីសម្ពោធវិមានអនុស្សាវរីយ៍នៃនយោបាយឈ្នះ ឈ្នះ ឱ្យបានកាន់តែរហ័ស និងទាន់ពេលវេលា។
ពិធីសម្ពោធវិមានអនុស្សាវរីយ៍នៃនយោបាយ ឈ្នះ ឈ្នះ និងពិធីអបអរសាទរខួបលើកទី២០ នៃការបញ្ចប់សង្គ្រាមស៊ីវិលនៅកម្ពុជា និងការអនុវត្តប្រកបដោយជោគជ័យនូវនយោបាយ ឈ្នះ ឈ្នះ នឹងប្រព្រឹត្តទៅរយៈពេល៣ថ្ងៃ ចាប់ពីថ្ងៃទី២៩-៣០-៣១ ខែធ្នូ ឆ្នាំ២០១៨ ខាងមុខ។
នៅក្នុងកិច្ចប្រជុំនោះ លោក ថោង ខុន បានពិភាក្សា និងពិគ្រោះយោបល់ជាមួយក្រុមការងារនីមួយៗ ដូចជាស្ដង់ពិព័រណ៍សមិទ្ធផល ២០ឆ្នាំ របស់ក្រសួង-ស្ថាប័ន ពិព័រណ៍សមិទ្ធផល របស់រដ្ឋបាលរាជធានី-ខេត្តទាំង២៥ ពិព័រណ៍ទេសចរណ៍ ពាណិជ្ជកម្ម ម្ហូបអាហារ ការសម្តែង ទស្សនីយ ភាពសិល្បៈ ព្រឹត្តិការណ៍កីឡា និងពិធីឆ្លងឆ្នាំសកល ព្រមជាមួយនឹងការណែនាំអំពីការរៀបចំរាល់សកម្មភាព ពិព័រណ៍សិល្បៈ កីឡាឱ្យបានសម្បូរបែប និងប្រកបដោយភាពទាក់ទាញ ។
យោងតាមកិច្ចប្រជុំនោះបានបង្ហាញថា ស្តង់ពិព័រណ៍មានចំនួនសរុប ជាង ៥៦២ស្ដង់ មកពីក្រសួងស្ថាបនផ្សេងៗគ្នាចែកជាបួន តំបន់ A,B,C,D តំបន់ A និង B សម្រាប់ពិព័រណ៍សមិទ្ធផល ខណដែលតំបន់ C និង D គឺសម្រាប់ពិព័រណ៍ម្ហូបអាហារ (ភូមិម្ហូបឆ្ងាញ់)។ តំបន់ទាំង៤នេះ មានការចូលរួមពីគ្រប់ក្រសួង -ស្ថាប័ន រដ្ឋបាលរាជធានី-ខេត្ត និងស្ដង់ពិព័រណ៍ពាណិជ្ជកម្ម ទេសចរណ៍ ម្ហូបអាហារ និងការវិនិយោគរបស់ក្រុមហ៊ុននានា និងមានការចូលរួមពីប្រទេសជាមិត្តមួយចំនួនថែមទៀត។ ដោយឡែក ចំពោះពិព័រណ៍សមិទ្ធផលក្រសួង-ស្ថាប័នបានត្រៀមរួចរាល់ហើយ ហើយពិព័រណ៍ពាណិជ្ជកម្ម ទេសចរណ៍ ម្ហូបអាហារ វិនិយោគ ក្រុមការងារបានទទួលការចុះឈ្មោះជិតរួចរាល់ហើយ ។ ចំពោះព្រឹត្តិការណ៍ និងសកម្មភាពកីឡាមាន១២ប្រភេទកីឡាក៏បានត្រៀមរួចរាល់រួមទាំងកម្មវិធីឆ្លងឆ្នាំសកល ក៏បានត្រៀមរៀបចំរួចរាល់ ទាំងកម្មវិធីព្រឹត្តិការណ៍ឆ្លងឆ្នាំ ទាំងកម្មវិធីលៀងសាយភោជន៍។
លោក ថោង ខុន ក៏បានអំពាវនាវដល់អាជ្ញាធររាជធានី រួមទាំងស្ថាប័នពាក់ព័ន្ធត្រូវរៀបចំកែលម្អ ការតាំងភ្លើងនៅតាមចំណុចសំខាន់ៗ ប្រកបដោយសោភ័ណភាព និងភាពទាក់ទាញបន្ថែមទៀត និងធ្វើប្រព័ន្ធផ្សព្វផ្សាយតាមវិទ្យុ ទូរទស្សន៍ជាពិសេសតាមប្រព័ន្ធស្មាតហ្វូនជាដើម ដែលធ្វើយ៉ាងណាឲ្យព្រឹត្តិការណ៍សម្ពោធ វិមានឈ្នះឈ្នះកាន់តែល្បីរន្ទឺគ្រប់ទិសទីទាំងក្នុង និងក្រៅប្រទេស។
ទន្ទឹមនោះ លោករដ្ឋមន្ត្រីក៏បានក្រើនរំលឹកគ្រប់ផ្នែក ក្នុងអនុគណៈកម្មការបន្តសហការគ្នា និងបន្តសហការជាមួយ អនុគណៈកម្មការដទៃឱ្យបានល្អ ដើម្បីជោគជ័យត្រចះត្រចង់ នៃពិធីបុណ្យដ៏មានអត្ថន័យជាប្រវត្តិសាស្ត្រនេះ។
វិមាន ឈ្នះ ឈ្នះគឺជាសំណង់និមិត្តរូបតំណាងឲ្យវរៈភាពរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលសម្តេចបានហ៊ានលះបង់ជីវិតគ្រប់បែបយ៉ាងដើម្បីបុព្វហេតុជាតិមាតុភូមិទាំងមូល ហើយមិនតែប៉ុណ្ណោះវិមានដ៏ប្រវត្តិសាស្ត្រមួយនេះនឹងក្លាយ ទៅជាមរតកជាតិ និងសារមន្ទីរជាតិដ៏ធំសម្រាប់កម្ពុជា និងជាងនេះទៅទៀតសំណង់នេះ នឹងក្លាយទៅជានិក្ខេបទសម្រាប់នាយទាហានសកម្មជំនាន់ក្រោយផងដែរ។
សំណង់វិមាន ឈ្នះឈ្នះ បានចាប់ផ្តើមសាងសង់ឡើងកាលពីខែកុម្ភៈ ឆ្នាំ២០១៦កន្លងទៅ ដោយទំហំដី៨ហិចតា ស្ថិតនៅសង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ។ ថវិកាដែលចំណាយសាងសង់នូវវិមាននេះ គឺជាថវិកាបដិភាគរបស់រាជរដ្ឋាភិបាលដោយពុំទាក់ទងនឹងថវិការបស់រដ្ឋនោះឡើយ។
វិមាននេះតំណាងឲ្យវីរភាពរបស់សមមិត្តហ៊ុន សែនដែលហ៊ានប្រថុយជីវិត ធ្វើដំណើរទៅកាន់ប្រទេសវៀតណាម ដើម្បីស្នើសុំកម្លាំងភាគីវៀតណាម ជួយផ្តួលរំលំរបបប្រល័យជូពសាសន៍ប៉ុល ពត។ មួយវិញទៀតការសាងសង់វិមាន ឈ្នះឈ្នះ នេះគឺដើម្បីរំលឹកដល់គុណូបការៈ របស់បុព្វបុរសខ្មែរគ្រប់សម័យកាលដែលបានលះបង់ជីវិត ក្នុងបុព្វហេតុជាតិមាតុភូមិផងដែរ ហើយរួមទាំងជានិម្មិតរូបនៃសុខសន្តិភាពដែលកម្ពុជា ទទួលបានក្រោយពីបញ្ចប់សង្គ្រាមស៊ីវិល ដ៏រ៉ាំរ៉ៃជាច្រើនទសវត្សរ៍កន្លងមក និងក៏ទុកជាកេរ្តិ៍មរតកសម្រាប់កូនចៅជំនាន់ក្រោយជាដើម។
បើតាមសម្តេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ និងជាប្រធានគណៈកម្មការអន្តរក្រសួងនៃការសម្ពោធវិមាន ឈ្នះឈ្នះនេះបានថ្លែងឲ្យដឹងថា ការសម្ពោធវិមាន ឈ្នះឈ្នះដែលនឹងប្រព្រឹត្តិទៅចំនួនបីថ្ងៃ គឺចាប់ពីថ្ងៃទី២៩ដល់ថ្ងៃទី៣១ ខែធ្នូឆ្នាំ២០១៨ខាងមុខនេះ ប្រកបដោយភាពអធិកអធម្មបំផុត ដែលមិនធ្លាប់មានពីមុនមកនៅប្រទេសកម្ពុជា ខណៈវិមាននេះប្រៀបបានដូចជាជង្រុកដ៏ធំមួយ សម្រាប់ផ្ទុកនៅឯកសារសន្តិភាពរបស់កម្ពុជាទាំងមូលនោះ។
ដោយឡែកសម្រាប់រចនាបទថដែលបានឆ្លាក់នៅក្នុងបរិវេណសំណង់វិមាននេះ គឺប្រកបដោយអត្ថន័យជ្រាលជ្រៅបំផុត ដូចជាចម្លាក់សត្វដំរី នាគ ហង្ស គ្រុឌ តោ និងសត្វជាច្រើនទៀតរាប់រយផ្ទាំង ហើយរូបសត្វទាំងនោះ គឺសុទ្ធតែតាំងដោយមានស្លាប តំណាងឲ្យសត្វទេព្យដូចរូបចម្លាក់នៅព័ទ្ធជុំវិញ នៃប្រាសាទសំបូរព្រៃគុក។
សូមបញ្ជាក់ផងដែរថា សម្តេចតេជោ ហ៊ុន សែន នាយករដ្ឋមន្ត្រីបានដាក់ចេញនូវនយោបាយឈ្នះ ឈ្នះនៅដើមឆ្នាំ ១៩៩៦ រហូតដល់ឆ្នាំ ១៩៩៨ បានរំលាយចោលរចនាសម្ព័ន្ធយោធាខ្មែរក្រហម និងធ្វើសមាហរណកម្ម ពួកគេមកក្នុងសង្គមជាតិកម្ពុជា។ ក្រោយពីដាក់ចេញនូវនយោបាយឈ្នះ ឈ្នះនេះរាជរដ្ឋាភិបាល បានដឹកនាំប្រទេសប្រកបដោយសុខសន្តិភាព និងការអភិវឌ្ឍប្រទេសមានការរីកចម្រើនជាបន្តបន្ទាប់រហូតដល់បច្ចុប្បន្ននេះ៕ ដោយ ៖ រចនា
