ភ្នំពេញ ៖ លោក វ៉ាង វិនធៀន (Wang Wentian) ឯកអគ្គរដ្ឋទូត នៃសាធារណរដ្ឋប្រជាមានិតចិន ដែលទើបតែងតាំងថ្មី ប្រចាំព្រះរាជាណាចក្រកម្ពុជា បានអះអាងថា ប្រទេសចិន និងកម្ពុជា ជាមិត្តល្អដែលមានការយោគយល់ និងគាំទ្រគ្នាទៅវិញទៅមក។ ចិនបន្តគាំទ្រដល់ការអភិវឌ្ឍនៅកម្ពុជាតាម លទ្ធភាពរបស់ខ្លួនទៀត។
លោក វ៉ាង វិនធៀន បានលើកឡើងបែបនេះ នៅពេលចូលជួបសម្តែងការគួរសមជាមួយ សម្តេចអគ្គមហាពញាចក្រី ហេង សំរិន ប្រធានរដ្ឋសភា នាព្រឹកថ្ងៃចន្ទ ទី២៤ ខែធ្នូ ឆ្នាំ២០១៨ វិមានរដ្ឋសភា។ សម្តេចប្រធានរដ្ឋសភា បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ ស្ថានទូតចិន អតីតឯកអគ្គរដ្ឋទូតចិនមុនៗប្រចាំកម្ពុជា ក្នុងកិច្ចការទំនាក់ទំនង ពង្រឹងពង្រីកកិច្ចសហប្រតិបត្តិការលើគ្រប់វិស័យ។ ឆ្នាំ២០១៨នេះ ជាឆ្នាំខួបទី៦០ នៃទំនាក់ទំនងការទូតជាប្រវត្តិសាស្ត្ររវាងកម្ពុជា-ចិន ដែលបានកសាងឡើងដោយ អតីតព្រះមហាវីរក្សត្រ ព្រះបរមរតនកោដ្ឋ នរោត្តម សីហនុ និងអតីតប្រមុខដឹកនាំមហាប្រទេសចិន។
សម្តេចបានគូសបញ្ជាក់ថា ចាប់ពីឆ្នាំ២០១០មក ទំនាក់ទំនងប្រទេសទាំងពីរបានឈានដល់កម្រិតជាប្រវត្តិសាស្ត្រមួយ គឺ “កិច្ចសហប្រតិបត្តិការ ភាពជាដៃគូយុទ្ធសាស្ត្រគ្រប់ជ្រុងជ្រោយ” ដែលបានកំពុងផ្តល់ផ្លែផ្កាជាក់ស្តែងលើគ្រប់វិស័យដល់សង្គមជាតិទាំងពីរ ។
លោក វ៉ាង វិនធៀន បានលើកឡើងថា ទំនាក់ទំនងកម្ពុជា ជាទំនាក់ទំនងអ្នកជិតខាង ជាទំនាក់ទំនងបងប្អូនមិត្តភ័ក្តិយ៉ាងជិតស្និទ្ធ គោរព យោគយល់ និងបានគាំទ្រគ្នាទៅវិញទៅមក។ ប្រទេសចិនបានគាំទ្រដល់ការសម្រេចចិត្តរបស់កម្ពុជា គោរពបូរណភាពទឹកដី និងឯករាជ្យភាពរបស់ កម្ពុជា ។
លោក ឯកអគ្គរដ្ឋទូត បានអះអាងថា លោក ធ្លាប់បានមកទស្សនកិច្ចនៅកម្ពុជាក្នុងឆ្នាំ២០០០។ រយៈពេល១៨ឆ្នាំកន្លងមកនេះ លោក បាន សង្កេតឃើញថា កម្ពុជាមានការអភិវឌ្ឍគួរឲ្យកត់សម្គាល់ ក្រោមម្លប់ព្រះមហាក្សត្រ និងថ្នាក់ដឹកនាំរាជរដ្ឋាភិបាល ព្រមទាំងសភា ដែលធ្វើឲ្យកម្ពុជា មានសុខសន្តិភាព។ សន្តិភាព និងការអភិវឌ្ឍបែបនេះ បានឆ្លុះបញ្ចាំងឲ្យឃើញនូវលទ្ធផលនៃការបោះឆ្នោតជ្រើសតាំងសមាជិករដ្ឋសភានីតិកាលទី៦ ដែលជាការសម្រេចចិត្តរបស់ពលរដ្ឋ។ លោក វ៉ាង វិនធៀន បានគូសបញ្ជាក់ថា ប្រទេសចិនបន្តគាំទ្រដល់ការអភិវឌ្ឍនៅកម្ពុជាតទៅទៀតតាម លទ្ធភាព។
សម្តេចអគ្គមហាពញាចក្រី ហេង សំរិន មានជំនឿយ៉ាងមុតមាំថា ក្នុងអាណត្តិការទូតរបស់ឯកឧត្តមនឹងបន្តសហការជាមួយបណ្តាក្រសួង មន្ទីរ ស្ថាប័ននានា នៃព្រះរាជាណាចក្រកម្ពុជា ដើម្បីធ្វើយ៉ាងណាឲ្យស្មារតីមិត្តភាព សាមគ្គីភាព និងកិច្ចសហប្រតិបត្តិការវាងកម្ពុជា-ចិននេះ កាន់តែល្អប្រសើរ និងស៊ីជម្រៅថែមទៀត។ ចំណែករដ្ឋសភាកម្ពុជាត្រៀមខ្លួនជាស្រេច ដើម្បីធ្វើកិច្ចសហការពេញលេញ ដើម្បីឲ្យបេសកកម្មការទូតរបស់ឯកឧត្តម នៅកម្ពុជាទទួលបានជោគជ័យ ៕ ដោយ ៖ កូឡាប
