អាមេរិកពុំមែន ពុំយល់ដឹងថា ក្រោយសេចក្តីប្រកាសនេះ មានអ្វីកើតឡើងនោះទេ។ គេមានគោលដៅជាក់លាក់ ហើយសំខាន់គឺសម្រាប់ការដែលប្រធានាធិបតីរូបនេះចង់ថ្លែង “សារ” ទៅកាន់ពលរដ្ឋអាមេរិកទៅវិញទេ!។ ព្រោះថា ៖
១.ការផ្ទេរប្តូរស្ថានទូតទៅកាន់ “Jerusalem” ទាមទារពេលវេលាច្រើនឆ្នាំ ៖
រឿងរ៉ាវកើតមានរវាងអ៊ីស្រាអែល និង Palestine ពុំមែនជារឿងថ្មីទេ គ្រាន់តែរដ្ឋការលោក Trump បើកគម្របដបបន្ទុះបញ្ហាចេញមកក្រៅប៉ុណ្ណោះ។
លោក Trump និងសហការី ពុំមែនពុំយល់ថា អ្វីនឹងកើតឡើងទេ។ មុននោះប្រមុខការទូត Rex Tillerson ក្នុងជំនួបជាមួយសមភាគីនៅបារាំង បានបង្ហើបទុកជាមុនថា ៖ ការប្តូរស្ថានទូតអាមេរិកពី Tel Aviv ទៅកាន់ Jerusalem ពុំអាចអនុវត្តបានមុនឆ្នាំ ២០១៩ ឡើយ។
ហេតុការណ៍នៃសេចក្តីថ្លែងការរបស់លោក Trump ត្រូវបែកជា ២រឿងផ្សេងគ្នាគឺ ៖
-ការទទួលស្គាល់ Jerusalem ជារដ្ឋធានីរបស់ អ៊ីស្រាអែល ។
-ការផ្ទេរស្ថានទូតអាមេរិកពី Tel Aviv ទៅ Jerusalem។
ដូច្នេះការទទួលស្គាល់រដ្ឋធានី ជាជំហានដំបូង ហើយការផ្ទេរស្ថានទូតជាលទ្ធផល Cogic មួយ។ ប៉ុន្តែសូមកត់សម្គាល់ថា “ការផ្ទេរទីតាំងស្ថានទូត ទើបបញ្ជាក់បានពីអំណះអំណាង នៃការទទួលស្គាល់រដ្ឋធានី”!។
ម្យ៉ាងទៀតនៅ Jerusalem អាមេរិក មានស្ថានកុងស៊ុល១ស្រាប់ ហើយប្រសិនចង់បញ្ជាក់រឿងទី១នោះ បញ្ហាទី២ ពុំលំបាកឡើយ ដោយអាមេរិកអាចប្តូរស្ថានអគ្គកុងស៊ុល នោះទៅជាស្ថានទូតជាការស្រច!។ ប៉ុន្តែជាក់ស្តែងគឺ ប្រមុខការទូតអាមេរិក Tillerson និយាយថា ៖ អាមេរិកត្រូវការពេលវេលា “ច្រើនឆ្នាំ” ពុំមែនត្រឹមឆ្នាំ ២០១៨ ឬ ២០១៩ ឡើយ សម្រាប់ “ស្វែងរកទីតាំង” ដើម្បីសាងសង់… ស្ថានទូត។
នាក្រុងឡុងរបស់អង់គ្លេស អាមេរិកបានចំណាយពេល ៨ឆ្នាំ សម្រាប់ការសាងសង់ស្ថានទូត១ ដែលមានបុគ្គលិកធ្វើការ ១.០០០នាក់ ប្រហែលគ្នានឹងប្រទេសអ៊ីស្រាអែលដែរ។
ហេតុនេះអាចនិយាយបានថា ៖ ការទទួលស្គាល់រដ្ឋធានី ជារឿងមួយងាយធ្វើតាមរយៈសេចក្តីថ្លែងការមួយប៉ុណ្ណោះ តែការ “ផ្ទេរ…” ដែលដើរតួនាទីជា “ការធានាជាក់លាក់សម្រាប់សេចក្តីថ្លែងការទទួលស្គាល់រដ្ឋធានី “វាតម្រូវឲ្យចំណាយពេលវេលាអូសបន្លាយ… ច្រើនឆ្នាំឯណោះ”។ រឿងនេះ គេបានឃើញលោក Trump ព្រមទាំងប្រមុខការទូត Tillerson “បោះពាក្យ” ច្រើនលើកហើយ។
២.អាមេរិកពុំធ្លាប់គាំទ្រការប្រកាសរបស់អ៊ីស្រាអែល ចំពោះអធិយបតេយ្យភាពចំពោះ Jerusalem ៖
ប្រធានាធិបតី Trump បាននិយាយដល់ Jerusalem តែ Jerusalem រួមមានប៉ែកខាងកើត និងខាងលិច ហើយលោកក៏ពុំបានប្រើពាក្យ “Jerusalem ពុំបានកាត់ផ្តាច់” ដូចអ៊ីស្រាអែល តែងប្រើឡើយ។ ដូច្នេះការទទួលស្គាល់ Jerusalem ជារដ្ឋធានីរបស់អ៊ីស្រាអែល (បច្ចុប្បន្នអ៊ីស្រាអែលកំពុងកាន់កាប់ប៉ែកខាងលិច) ពុំមានការបញ្ជាក់ថា អាមេរិក ទទួលស្គាល់ប៉ែកខាងកើត ក៏ជារដ្ឋធានីជារបស់អ៊ីស្រាអែលឯណា? (មុននោះមានសំណើរផ្តួចផ្តើមមួយ ដោយបែងចែកភាគខាងកើត Jerusalem ជារដ្ឋធានីរបស់ Palestine)។
លោក Trump នៅបានលើកច្បាស់ៗថា ការទទួលស្គាល់នេះ ពុំបង្ហាញពីអាកប្បកិរិយាទស្សនៈរបស់អាមេរិក អំពីអធិបតេយ្យភាពរបស់អ៊ីស្រាអែល នៅ Jerusalem ក៏ដូចជាគោលការណ៍នៃកិច្ចព្រមព្រៀងរវាងអ៊ីស្រាអែល និង Palestine ទេ។
តាមនោះអាចយល់បានថា ទង្វើលោក Trump គឺផ្តោតលើពលរដ្ឋអាមេរិក (នយោបាយក្នុងស្រុក)។ លោកចង់បង្ហាញខ្លួនថា បើសន្យាគឺត្រូវអនុវត្ត ពុំចេះតែនិយាយហើយពុំធ្វើនោះទេ។
លោក Trump បានច្រានបញ្ហាឲ្យដូចជា រឿងជ្រុលហួស តែមានដែនកំណត់។
លុះត្រាស្ថានទូតអាមេរិក ស្ថិតនៅ Jerusalem (អាចយកស្ថានកុងស៊ុលមកធ្វើជាស្ថានទូត) ពុំមែនគ្រាន់តែចាំរកទីតាំងសង់ ហើយត្រូវចំណាយពេលវេលា… “ច្រើនឆ្នាំ” នោះទេ ឬក៏ ៖ អាមេរិកទទួលស្គាល់ Jerusalem ដោយបញ្ជាក់ច្បាស់ថា តាំងខាងកើត និងខាងលិច (ពុំមែនតែខាងលិច) ជារដ្ឋធានីរបស់អ៊ីស្រាអែល ទើបរឿងនេះអាចជាការពិត។
និយាយរួមវាគ្រាន់តែជាការឆ្កឹះបញ្ហាមួយដែលកំពុងមានដំណោះស្រាយស្រាប់តាមបែបខាងលិច-ខាងកើត Jerusalem ប៉ុណ្ណោះ៕ បូព៌ា
