កែប៖ រដ្ឋបាលខេត្តកែប នឹងរៀបចំព្រឹត្តិការណ៍ អុំទូកផ្កាចារសមុទ្រ បង្ហើរខ្លែង បង្ហោះគោម និងប្រគំតន្ត្រី អុចកាំជ្រូច ក្នុងពិធីឆ្លងឆ្នាំសកល ២០១៨-២០១៩ ដែលនឹងប្រព្រឹត្តទៅនៅថ្ងៃទី៣០-៣១ ខែធ្នូ ឆ្នាំ២០១៨។
បើតាមសេចក្តីអំពាវនាវ ដើម្បីចូលរួមចំណែកផ្ដល់លទ្ធភាពដល់រដ្ឋបាលខេត្តក្នុងការរៀបចំព្រឹត្តិការណ៍កម្សាន្តខាងលើ រដ្ឋបាលខេត្តកែប អំពាវនាវឲ្យម្ចាស់សណ្ឋាគារ ផ្ទះសំណាក់ បង់ហ្កាឡូ រីសត អាជីវករ សិប្បករ ក្រុមហ៊ុនឯកជន និងសប្បុរសជនទាំងអស់ ជួយឧបត្ថម្ភជាសម្ភារ ថវិកា សម្រាប់ចូលរួមចំណែកដល់ព្រឹត្តិការណ៍នេះ និងអំពាវនាវឲ្យប្រជាពលរដ្ឋ និងភ្ញៀវជាតិ អន្តរជាតិ ចូលរួមឲ្យបានច្រើនកុះករផងដែរ។
លោក កែន សត្ថា អភិបាល នៃគណៈអភិបាលខេត្តកែប កាលពីថ្ងៃទី២២ ខែធ្នូ ឆ្នាំ២០១៨ “បានអំពាវនាវដល់ម្ចាស់សណ្ឋាគារ ផ្ទះសំណាក់ បង់ហ្កាឡូ រីសត អាជីវករ សិប្បករ ក្រុមហ៊ុនឯកជន និងសប្បុរជនទាំងអស់ ជ្រាបថា ជារៀងរាល់ឆ្នាំរដ្ឋបាលខេត្តកែបតែងតែរៀបចំឲ្យមានព្រឹត្តិការណ៍កម្សាន្តសប្បាយជូនបងប្អូនប្រជាពលរដ្ឋ ក៏ដូចជាភ្ញៀវទេសចរ ជាតិ អន្តរជាតិ ។ នៅឆ្នាំនេះរដ្ឋបាលខេត្តកែប នឹងរៀបចំព្រឹត្តិការណ៍ អុំទូកផ្កាចារសមុទ្រ បង្ហើរខ្លែង បង្ហោះគោម និងប្រគំតន្ត្រី អុចកាំជ្រួច ក្នុងពិធីឆ្លងឆ្នាំសកល ២០១៨ -២០១៩ ដើម្បីអបអរសាទរខួបលើកទី៤០ នៃទិវាបុណ្យជាតិជ័យជម្នះ៧មករា ដែលនឹងប្រព្រឹត្តទៅនៅថ្ងៃទី ៣០ ៣១ ខែធ្នូឆ្នាំ២០១៨”៕ រចនា
